Read Tobelo O TIMOTIUS MAHINOTOKA 4 Bible Online

O TIMOTIUS MAHINOTOKA 4 - Tobelo bible

O TIMOTIUS MAHINOTOKA 4

¹O Kristus Yesus aha woboali o duniaino nënanga, mangale watailako o nyawa yowango-wango deʼ yohone-honenge; deʼ Unanga aha woböa mangale wopareta hokä o Koano. Hababu gënanga ngohi to gahoko kohagiria ngonaika ma Jou Madutu ai himangoka de o Kristus Yesus:

²Kokiani ngona nohiabari o abari ma Jou Madutuino gënanga, deʼ gila-gila nahiributu hupaya o nyawa yoihene, boteka önanga yomodeke ekola kowali. Kokiani ngona nahi ngaku o nyawa nohi matoko manga howono, deʼ nahi döaka o hihitomo onangika. Nadotoko o nyawa de duru de ani sabaroka.

³Hababu maöraha aha iböa, o nyawa yolukoka yatarima o dodötoko madiai. I idulu yaino, önanga aha yanïki manga nahihu mahirete, deʼ yatoomu o guru-guru komangangöe laʼ yadotoko o hali-o hali önanga yarahai manga ngauku magogihenoka.

⁴Onanga aha manga ngauku yatamunu o diai ika, mä manga ngauku aha ihidakunu o ade-ade mahomoaika.

⁵Ngarokö hoko gënanga, ngona kiani nogöana ani diri sarakiaö dika marupa magoronaka. Notongohono natagongo o hangihara magoronaka, nadiai ani manarama hokä ihi ngahu-ngahu o Abari ma Oa gënanga de nohidagi nohidodiai ani manarama hokä ma Jou Madutu iwilë leleani.

⁶Imakorona tongohi ahi diri, yadonoka maöraha ngohi aha tohonenge hokä o huba ma Jou Madutuika. Kabötino okahi ngohi aha tamal̄a o dunia nënanga.

⁷Ngohi tanïkoka o rorebe tohidodiai, deʼ tadonoka mabatingi mabahaika. Ngohi tatapu tosetia o Kristusika hiädono mabaha.

⁸Deʼ oraha nënanga o utumu mangongike ihi damäoka ngohi. O Kiamati ma Wangeoka, ma Jou, o Hakimi woadi-adili gënanga aha wohi döaka o ngongike gënanga ngohino, karana ngohi towango yaoa de ma Jou Madutu. Deʼ kangohiua dika aha tatarima o ngongike gënanga, mä o nyawa mata-mataö ma Jou ai böa yododamä de duru manga ngigoka.

⁹Nohidailako duru demadataitoka naino ngohino,

¹⁰ hababu o Demas wohimal̄aka ngohi, karana wohininga o dunia nënanga. Unanga woikoka o Tesalonikaika. O Kreskes woikoka o Galatiaika, deʼ o Titus o Dalmatiaika.

¹¹ Duga-duga o Lukas wogogogere dede ngohi. Ningoho o Markus, deʼ niao ünanga nimanïki, hababu ünanga wakunu wohiriwo ahi manarama magoronaka.

¹² Ngohi tihulokoka o Tikhikus woiki o Efesusika.

¹³ Nako ngona naino, nao ahi mantele, ngohi tamal̄aika o Troasoka o Karpus ai tauoka. De nohidotao tongohi ahi buku-buku, duru mal̄okuoka ahi buku-buku yadodiai o karatahi o aiwani makaino.

¹⁴ O Aleksander, o tabaga wododiai gënanga wodiaioka o hali duru itotorou ngohino. Ma Jou aha wäbalahi unangika imoteke ai manarama.

¹⁵Ngona mahirete kiani nomahi dodiai unangika, hababu ünanga duru walawani tongone nanga abari.

¹⁶Maöraha madodihiraka ngohi tohingahu tomademo ahi diri, kao nyawa moi de koiwa ihi datekuku; mata-mata ihi mal̄aka ngohi. Tanu ma Jou Madutu wahihowonua önanga, o hali nënanga magoronaka!

¹⁷Mä ma Jou wohi datekuku ngohi. Unanga wohihi döaka o kuata hiädono ngohi takunu tohi ngahu o Abari ma Oa gënanga ingodu-ngodumu, laʼ yoihene mata-mata o Yahudi okaua manyawa. Deʼ ngohi tolapahi o honenge mahangiharaino.

¹⁸Igoungu, ma Jou aha wohihi lapahi ngohi moi-moi itotorou mamanarama ngohino. Unanga aha wohiao ngohi de mahalamatoka o horoga ai Pareta ma goronaika. Kokiani Unanga hihimulia kahi ado-adonika! Amin.

¹⁹ Tongohi ahi tabea o ngo Priskila deʼ o Akwilaika deʼ o Onesiforus ai tau madol̄aika.

²⁰ O Erastus wogogogere o Korintusoka, deʼ o Trofimus o panyake magoronaka timal̄aika o Miletusoka.

²¹Nohi dailako hoko gënanga marupa mangale naino o dumamäta maöraha uahi. O Ebulus, o Pudes, o Linus, deʼ o ngo Klaudia ihidingoto toönanga manga tabea ngonaika hoko genangö mata-mata o roriadodoto mahomoa o ngongaku moi.

²²Tanu ma Jou woni datekuku ngona. Tanu ma Jou winihi barakati Roriadodoto! Tongomi mia horomati, o Paulus