Read Tobelo O TITUS 1 Bible Online

O TITUS 1 - Tobelo bible

O TITUS 1

¹Titus ahingohaka! Ngohi, o Paulus, totulihi o hurata nënanga hokä ma Jou Madutu ai gilaongo deʼ o Yesus Kristus ai rasul. Ngohi ihi iriki deʼ ihi huloko la täriwo ma Jou Madutu ai ngongiriki manyawa hupaya yodadi yokuata toönanga manga ngongaku magoronaka. Ngohiö kokiani tätuda önanga hupaya ihi öriki o dodötoko madiai tongone nanga agama yädoto-dotoko.

²O dodötoko gënanga imahi hol̄e o ngonganono ngone aha hatarima o wowango madutu deʼ i kokakali. Ma Jou Madutu wohi jajioka o ngango gënanga ihira de o öraha madodihiraka — deʼ ma Jou Madutu idadiua woeluku.

³Maöraha yakokorona, ma Jou Madutu wohinyata Ai jaji gënanga Ai behehongo magoronaka. O behehongo gënanga wohihi gogöanoka ngohino, deʼ ngohi ënanga tohingahu de ma Jou Madutu ai pareta Wonahi hohalamati ngone.

⁴ Titus, ngona ganga igou-goungu tongohi ahingohaka, hababu ngona dede ngohi homa mote-moteke hingakuoka o Kristusika. Ngohi tonganono tanu ma Jou Madutu o Ama deʼ o Kristus Yesus nanga Koano Wonahi hohalamati, wonihi döaka o barakati deʼ o lolä ngonaka.

⁵Ngohi toni mal̄aika ngona o Kreta mabereraka hupaya ngona yakunu nohidailako o hali-o hali kai pöparalu ohi natatoro. Inoli hupaya ngona nägöraka o jemaat-jemaat matutuda o kota yögëtongo. Deʼ nöhohininga tongohi ahi hidumutu-hidumutu nënanga:

⁶ O jemaat matutuda womatëngo kokiani womatëngo koiwa ai howono; ünanga kokiani ngoi hekata duga-duga momatëngo; ai ngoha-ngohaka kokiani iwi ngakuoka o Kristusika deʼ koigoungua yahi öriki hokä o ngoha-ngohaka yo ora-ora deʼ yakunua yätatoro.

⁷O jemaat yotötailako ganga o nyawa ihidö dailako ma Jou Madutu ai manarama, ünanga yakunua de ai howono. Unanga yakunua woma hil̄e ekola wotoba ngamo, ekola wotoba daluku, ekola wöigo imaka ngamo, ekola yokal̄il̄u o tiwi.

⁸Unanga kokiani wosanangi wätarima o nyawa ai tauoka, wöigo o hali maoa-oa, yakunu watumungu ai diri, wolälalimua, wotebini, o atoranga wanäko.

⁹Unanga kokiani wasosö ikëkete o dodötoko yakunu yangö ngaku-ngakuika, hokä iwï dotokoka unangika. De hoko gënanga ünanga wakunu wänasihati o nyawa imahi hol̄e o dodötoko madiai de wohimatoko hagala o nyawa iwi lawa-lawani manga howono.

¹⁰Hababu o nyawa manga ngöe yöigo yomalawani, maboboloi hagala o nyawa hoko kangano manga agama o Yahudioka manga agama; önanga yätipu o nyawa mahomoa de toönanga manga demo ihi hohomoa.

¹¹Hagala o nyawa hoko gënanga kokiani hatamunu manga uru, hababu önanga yäruae manga ngöe o roriadodoto de manga tau madol̄a, de o dodötoko-dodötoko magoungua. Onanga yadiai gënanga duga-duga karana yomau yolingiri o utumu i patu-patutua!

¹²Mamoi iböto toönanga mahirete manga nabi womatëngo, ai ahali o Kreta maberera inoli, wotemo, ”Hagala o Kreta manyawa salalu yoelu-eluku, de hokä o aiwani madorou ikokal̄il̄u de yätebeturu.”

¹³Okia wahëto-hëtongo manabi gënanga i goungu itiai. Mahababu gënanga kokiani ngona nataaere önanga nahi totiai ika; hupaya önanga itatapu ima hijojö o dodötoko madiai ika,

¹⁴deʼ imahi jojö okaua o Yahudioka manga jojarita i hira-hiraika ekola o datoro-datoro yadodiai hagala o nyawa yaolu-oluku o dodötoko madiai gënanga.

¹⁵Hagala moi-moi ganga itebini o nyawa yotebi-tebinika. Mä hagala o nyawa manga dibanga ipese-pesekika deʼ manga ngongaku koiwa-iwa okianaga moiö de koiwa naga itebini, hababu toönanga manga dibanga de manga hininga mädobote itebi-tebini ipesekoka!

¹⁶Onanga yotemo bari önanga iwi nako ma Jou Madutu, enahioko toönanga manga manarama iwi hipongono. Onanga kahä emono, deʼ onanga yoluku yotomoteke; önanga ganga o nyawa ya aku-akunua yodiai okianaga moi maoa-oa.