Read Tobelo O TITUS 3 Bible Online

O TITUS 3 - Tobelo bible

O TITUS 3

¹Nahidöaka o hohininga ani jemaat-jemaat mangoha-ngohaka hupaya önanga yotomoteke o tutuda-tutudaika deʼ yakokuaha o negara, deʼ ihi ngounu deʼ imasadia yodiai moi-moi o hali maoa-oa.

²Nätemo onangika hupaya uha hi ade-ade itotorou ekola imateke roributu de o nagonaö dika, duga-duga hupaya önanga manga jako yongamo-ngamoua. Kokiani önanga salalu manga jako manga hininga ibole-bole o nyawaika mata-mata.

³Hababu mahira ngoneö mahirete hobodo, hanïki o ngëkomo ihowo-howono deʼ hohi ngounua. Ngone imägilaongo hagala rupa o hininga itotorou deʼ o nahihu; deʼ ngone howango de nanga niati itotorou deʼ o hininga homa kogogono, de kahoma kokodohatika.

⁴Mä ma Jou Madutu, Wonahi hohalamati ngone wohimatoko ngoneino Ai dora deʼ Ai hininga maoa.

⁵Unanga wonahi halamati ngone, koigoungua karana ngone hodiaioka okianaga moi maoa-oa, duga-duga karana Unanga mahirete wonä dora ngone. Unanga wonahi halamati ngone madodagi de ma Jou Madutu ai Womaha, inahi döaka ngoneino o dodadi mahungi deʼ o ngango mahungi de mangëkomo ina ihoro ngone.

⁶Ma Jou Madutu wona doburaraha ai Womaha ngoneuku de mangëkomo o Yesus Kristus, nanga Koano Wonahi hohalamati,

⁷hupaya de o Yesus ai hayanga de Ai dora, ngone homateke oa-oa okali de ma Jou Madutu deʼ ngone hamäke o ngango madutu deʼ ikokakali ganga ngone höngano-nganono.

⁸O demo nënanga igoungu itiai. Ngohi tomau ngona nohiduku o hali-o hali nënanga, hupaya hagala o nyawa iwi ngaku-ngaku ma Jou Madutuika i gou-goungu yousaha mangale yodiai o manarama maoa-oa deʼ iföfaidä mangale o nyawa mata-mata.

⁹Maʼ nomahi rehene ima teke roributu o demo maföfaidäua, o jarita kiaino nanga ahali, o ributu deʼ o gangamo mangale o agama matita. Mata-mata gënanga koiwa mafaidä deʼ koiwa mautumu.

¹⁰O nyawa yododiai o hababu o gitingaka o jemaat magoronaka, kokiani ngona nätaaëre nohigali mamoi mahinoto; iböto de gënanga uhali nimateke dodiawoli dede önanga.

¹¹Ngona nohi öriki o nyawa hoko gënanga marupa manga kalakuanga itorou, deʼ hagala manga baradoha ihi nyata igoungu önanga yahowono.

¹² Ipaha de ngohi tähuloko o Artemas ekola o Tikhikus ngonaika itaiti nomahi dailako de majapati laʼ naino ngohino o Nikopolisino, hababu ngohi ahi dungutu togögogere dokengoka madëkana o duma mäta maöraha.

¹³ Nohi dailako nagou-goungu mangale näriwo o Zenas, wosö sosawaro mangale o hukumu gënanga, deʼ o Apolos, hupaya önanga yakunu yoiki yosobo deʼ makuranga okia-kiaua.

¹⁴Hagala nanga nyawa kokiani imä dotoko yodiai o hali maoa-oa hupaya yakunu yäwëdono okia naga yapö päke-päke duru yopöparalu; uha hiädono önanga yowango mafaidä koiwa.

¹⁵O riadodoto mata-mata mima kokomoteke dede ngohi, ihi dingoto manga tabea ngonaika. Nohingahu mia tabea nanga dodiawoika homa teke o ngongaku moi. Tanu ma Jou wahi barakati o Riadodoto mata-mata. Tongomi mia horomati, o Paulus