Read Tobelo O FILEMON 1 Bible Online

O FILEMON 1 - Tobelo bible

O FILEMON 1

¹Riadodoto Filemon, mia dodiawo deʼ ngomi homateke manarama moi! Ngohi o Paulus, o bui manyawa moi karana o Kristus Yesus, mimanïki de o Timotius tongone nanga riadodoto, totulihi o hurata nënanga ngonaika

² deʼ o jemaatika ima totoomu ani tauoka; kogenangö tongone nanga birangika, o ngo Apfia de nanga doomu o manarama moi o Arkhipus.

³Ngomi minganono tanu ma Jou Madutu o Ama deʼ ma Jou Yesus Kristus wonihi döaka o barakati deʼ o lolä ngonaika.

⁴Tomä niata mahigetongo, ngohi tahetongo Riadodoto ani romanga deʼ totemo tarima kasi ma Jou Madutuika.

⁵Hababu ngohi toihene i gou-goungu Riadodoto nïngaku ma Jou Yesusika de nahininga ma Jou Madutu ai umati mata-mata.

⁶Ngohi toma niata tanu ho riadodoto hokä o nyawa yongaku-ngaku ihihasili o mangarati i holoi i lamoko mangale hagala o barakati ngoneoka karana homa teke rimoi de o Kristus.

⁷Riadodoto Filemon, ani dora ma Jou Madutu ai umatika mata-mata ihi mörene ngohi, deʼ ihi döaka o hihitomo ngohino! Ma Jou Madutu ai umati mata-mata yadiaioka yomörene karana ngona Riadodoto.

⁸Mahababu gënanga, hokä o nyawa o riadodoto o ngongaku moi, ngohi kai yakunu dika toni pareta Riadodoto mangale okia Riadodoto kiani nadiai.

⁹Mä karana ngohi tonihininga Riadodoto, duga-duga ngohi kato gahoko dika. Ngohi nënanga o dimono moi deʼ oraha nënanga magogiria ihi tumunguku o bui magoronaka karana o Kristus Yesus.

¹⁰ Ngohi, o Paulus laʼ nohi öriki o gogahoko moi tohi ädono ngonaika mangale o Onesimus, ahingohaka mangale o Kristus. Hababu o bui magoronaka nënanga ngohi todadioka ai ama o rohanioka.

¹¹Mahira ünanga wobaragunaua mangale ngona, mä oraha nënanga ünanga wobaraguna, kangonaua dika, mä mangale ngohiö.

¹²Oraha nënanga o nyawa tihohininga gënanga tihidingotoli ngonaika.

¹³Imoteke madiai ngohi tomau titumungu ünanga wogogere dede ngohi hokä ani dagali, laʼ unanga yakunu wohi riwo-riwo ngohi, hokokia madekana ngohi ihi tumunguku o bui nënanga magoronaka karana tohi ngahu o Abari ma Oa ma Jou Madutuino.

¹⁴Mä ngohi toluku okianaga todiai nako Riadodoto nomodekuahi. Ngohi iholoi toigo nako Riadodoto nodiai de ani hininga mangigo mahirete; ngohi toluku toni pakisa.

¹⁵Marai o Onesimus woma tingaka öraha mahuhutulu, laʼ Riadodoto mangale nimäke okali ünanga kahi ado-adonika.

¹⁶Oraha nënanga ünanga igoungua duga-duga o nyawa o gilaongo moi mangale Riadodoto; ünanga iholoi de gënanga. Unanga ganga nanga dodiawo o Haranioka manyawa duru hihohininga. Unanga duru wobaraguna mangale ngohi okia hongoli mangale ngona! Marai ünanga duru wobaraguna yaoa hokä o gilaongo yaoa hokä o nyawa moi o riadodoto mangale ma Jou!

¹⁷Mahababu gënanga, karana Riadodoto nohipulono ngohi ani dodiawo homahiho Harani, nitarimali o Onesimus hokä imatero Riadodoto nohitarima ngohi.

¹⁸Nako ünanga wahowono ekola wonagimi ngonaika, mal̄aika laʼ ngohi tatagongo mata-mata gënanga.

¹⁹Aa, yaoa ngohi mahirete totulihi nenangokadau: Ngohi, o Paulus aha tafangu tamata-mata. (Marai iparalu okaua ngohi toni hitoihene Riadodoto mahirete de ani nagimi ngohino, enagënanga ani wowango mahungi hokä o Haranioka manyawa.)

²⁰Hababu gënanga, de ma Jou abeika nohiriwo ngohi, namörene ahi hininga hokä o riadodoto o Kristusoka.

²¹Totulihi o hurata nënanga karana tongaku Riadodoto aha nadiai okia ngohi togahoko. Igoungu ngohi tohi öriki Riadodoto aha nadiai iholoi de gënanga.

²²Oraha mahuhutulu gënanga, tögahoko nasadia ani tauoka o kamari mangale ngohi, hababu ngohi tonganono ma Jou Madutu watarima o Riadodoto mata-mata nia niata, deʼ wohi aokali ngohi nginika.

²³ O Epafras, naga dede ngohi o bui magoronaka karana o Kristus Yesus, wohidingoto ai tabea ngonaika.

²⁴ Natarimaö manga tabea ahi dodiawo-ahi dodiawo: o Markus, o Aristarkhus, o Demas deʼ o Lukas.

²⁵Tanu ma Jou Yesus Kristus winihi barakati ngini. Tongomi mia horomati, o Paulus