Read Tobelo O IBRANI 1 Bible Online

O IBRANI 1 - Tobelo bible

O IBRANI 1

¹Mahiraino haramangöe ma Jou Madutu wotemo-temo nangaete de nangatohoraika wäpäke o nabi-nabi de wäpäke irupa-rupa madodagi.

²Mä o öraha mabobahaoka nënanga Unanga wotemo-temo ngoneino imadohanga Ai Ngohaka. De madodagi Ai Ngohaka nënanga ma Jou Madutu wohidadi o alami de madol̄a. Deʼ ma Jou Madutu wohitantuoka Ai Ngohakö gënanga wahaku hagala mata-mata ka Unanga madutu.

³Unangino ihupu ma Jou Madutu aimulia ilöleto-letongo; Unanga ganga ma Jou Madutu aidiri mahirete madulada inyata-nyata. Unangoli ganga wapaliara o alami mata-mataika kamagahu-gahumu de to Unanga aidemo duru ikokuaha. Ipahaika Unanga wohigumal̄a o nyawa yolapahi de toona manga baradoha, Unanga wögogere Ai kuruhi imomulia o horogaka imatuonino de ma Jou Madutu, Wokokuaha wokökurutil̄e.

⁴O ngohaka gënanga wamäke aigogere iholoi ikurutil̄e de o malaekat, deʼ o romanga iwihidöa-döaka ma Jou Madutu iholoi ikurutika mahoromati de o romanga yahidöa-döaka o malaekatika.

⁵ O malaekatika kamoikaö mä ma Jou Madutu komaiwa wotemo hokonënanga, ”Ngona ahi Ngohaka; o wange nënanga Ngohi todadi ani Ama.” Yäkorona o malaekat okia dika, komaiwa ma Jou Madutu wotemo hokonënanga, ”Ngohi aha todadi ai Ama, deʼ Unanga aha wodadi ahi Ngohaka.”

⁶ Mä maöraha ma Jou Madutu wïhuloko Ai Ngohaka o riaka o duniauku nënanga, ma Jou Madutu wotemo hokonënanga, ”Mata-mata ma Jou Madutu aimalaekat mapatutu iwihuba ma Ngohaka gënanga.”

⁷ Yakorona hagala o malaekat, ma Jou Madutu wotemo hokonënanga, ”Ma Jou Madutu wadiai hagala aimalaekat yodadi o hidal̄oko, deʼ hagala iwïlöleleani yodadi o uku madokara.”

⁸ Mä ma Ngohakika gënanga, ma Jou Madutu wïtemo, ”Ani kuruhi imomulia ya Jou Madutu, aha ikakali kahi ado-adonika! Ani popareta ganga o popareta iadi-adili.

⁹Ngona nöigo o adili deʼ nödohata o lalimi; mahababu gënanga ma Jou Madutu, Ani Jou Madutu Ngona woniiriki deʼ Ngonaika wonihidöaka o horomati ya ao-ao o mörene, noholoi de anidodiawo.”

¹⁰ Ma Jou Madutu wotemoli, ”Ngona ma Jou, madodihirakahi o dunia nohidadi, deʼ Ngona mahirete nodiai o dihanga.

¹¹Mata-mata gënanga aha ihihanga, deʼ idadi madorou hokä o pakeanga; mä Ngona nongaliua.

¹²O alami mata-mataika nënanga aha natupukoro hokä o baju, deʼ aha mahomoali nohitururu. Mä Ngona komaiwa aha nongali, deʼ Ani ngango aha koiwa mabobaha.”

¹³ O malaekat kamoikaö ma komaiwahi ma Jou Madutu wotemo hokonënanga, ”Nogogeruku Ahi nirakoka, hiädono hagala Ani haturü tahidodokouku anil̄ou matimioka.”

¹⁴Nako hokogënanga, imoteke madiai hagala o malaekat gënanga okia? Onanga ganga hagala o womaha iwïlölöleleani ma Jou Madutu, deʼ ma Jou Madutu wahulo-huloko la yariwo hagala o nyawa aha yatotarima o halamati.