Read Tobelo O IBRANI 10 Bible Online

O IBRANI 10 - Tobelo bible

O IBRANI 10

¹O agama Yahudi matita duga-duga ihidöaka o dulada ihohanänere mangale o hali-o hali maoa aha iböböa-böa, deʼ koigoungua o hali-o hali gënanga o dulada madiai. Idadiua o tita gënanga yakunu yahitotomo o nyawa yaino iwihuba-huba ma Jou Madutu de yoao o huhuba ngarokä o taongo higëtongo igila-gila ihihuba o huhuba-o huhuba imakoketero.

²O demo maade hagala o nyawa iwihöhuba-huba ma Jou Madutu duru itiai manga baradoha itebinoka, toönanga manga mamäo yobaradoha aha kowalioka, deʼ o huhuba aha ihihubaokaua.

³Mä manyonyata o huhuba-huhuba ihihöhuba-huba o taongo ihigetongo gënanga duru yakokorona kaihidöaka o hohininga mangale toönanga manga baradoha,

⁴hababu itiai o hapi maawunu deʼ o kabingi manauru maawunu yakunua yaehe o baradoha.

⁵ Mahababu gënanga maöraha o Kristus wowohama o duniaino, Unanga wotemo ma Jou Madutuika, ”Ngona nomaua o huhuba deʼ o ngongike ihihuba-huba; i idulu yaino Ngona nasadiaka o röehe mangale Ngohi.

⁶Ngona anihininga yadäenua mangale o huhuba iharo-harongo ekola o huhuba mangale o baradoha maapongo.

⁷De ino ngohi totemo, ’Ngohi nënanga, ya Jou Madutu! Ngohi toböa la tadiai Animau, hokä ihitulihoka mangale Ahidiri Ma Jou Ai Demo ma Buku magoronaka.’ ”

⁸Madodihiraka o Kristus wotemo, ”Ngona nömaua o huhuba deʼ o ngongike ihihuba-huba; Ngona nömaua mangale o huhuba o aiwani iharo-harongo hokä o ngongike ihihuba-huba deʼ o huhuba mangale o baradoha maapongo.” O Kristus wotemo hokogënanga, ngarokö hagala o huhuba gënanga ihihuba imoteke o agama Yahudi matita.

⁹Gënanga de iböto o Kristus wotemo, ”Ngohi nënanga, ya Jou Madutu! Ngohi toböa la tadiai Animau.” Hoʼ ma Jou Madutu waehe hagala o huhuba ihöhira-hira gënanga, deʼ wohitururu de o Kristus aihuhuba.

¹⁰O Yesus Kristus wadiaioka okia ma Jou Madutu wömau-mau deʼ wohihubaka Ai diri hokä o huhuba. De o ngongike ihihuba-huba gënanga, idiai duga-duga kamamoi dika de kahiado-adonika, ngone mata-mata itebini nanga baradoha.

¹¹ Moi-moi o Yahudioka manga imam ihidagi manga manarama hokä o imam o wange ihigëto-gëtongo deʼ wögogilio ünanga wohihuba o huhuba-huhuba imakoketero. Mä o huhuba-huhuba gënanga duruë yakunua yaehe o baradoha.

¹² Iidulu yaino, o Kristus wohidöaka o huhuba duga-duga o huhuba moi dika, mangale o baradoha maapongo, deʼ o huhuba gënanga idadi ilaku kahiado-adonika. De iböto wohihuba o huhuba gënanga, o Kristus wogogeruku ma Jou Madutu ainirakoka deʼ wopareta dede Una.

¹³Deʼ oraha nanga o Kristus wotamä hiädono ma Jou Madutu wadiai Ai haturü-haturü imahi döaka Unangika.

¹⁴Hoʼ de o huhuba moi, o Kristus wahitotomo hagala o nyawa manga baradoha itebi-tebinoka.

¹⁵Yakorona o hali gënanga ma Jou Madutu ai Womaha ihidöakoli mahakihi ngoneino. Ma Jou Madutu ai Womaha itemo,

¹⁶ ” ’Nënanga doka majaji aha Tadiai dede önanga mawange aha i böböa-böa,’ ma Jou wato, ’Ngohi aha takelenga hagala Ahi tita to önanga manga hininga magoronaka, deʼ Tatulihi to önanga manga hininga magoronaka.’ ”

¹⁷ Ma Jou Madutuö wotemo, ”Ngohi aha tawöhanga hagala manga baradoha deʼ hagala toönanga manga dorou.”

¹⁸Hoʼ, hagala o baradoha deʼ hagala o dorou gënanga iapongoka, ho iparaluokaua ihihuba o huhuba mangale o baradoha maapongo.

¹⁹Aa, Roriadodoto, mangale ma Jou Yesus aihonenge gënanga ngone örahananga hobarani höngohama o Ngï Duru i Tebi-tebini.

²⁰O Yesus wahelengaka o ngëkomo moi mahungi mangale ngone, enagënanga o ngëkomo inahidöa-döaka o wowango. O ngëkomo gënanga hatilakuru o guba, enagënanga o Yesus airöehe mahirete.

²¹Deʼ ngone örahananga de nanga imam womomulia womatëngo, womahi tago-tagongo mabobaluhu ma Jou Madutu ai tauoka.

²² Hababu gënanga, niaino ngone homahitigika ma Jou Madutuika de nanga hininga madebi-debini deʼ nanga ngongaku ibitu-bitumu; de nanga hininga ihitebinoka de o mamäo ihöhowo-howono deʼ de o röehe ihitebi-tebinoka de o akere madödodono.

²³Kokiani ngone homahijojö habitu-bitumu o ngonganonika ngone homomangakuoka, hababu ma Jou Madutu yakunu hïngaku deʼ Unanga aha wohiganapu Ai jaji.

²⁴Deʼ kokiani ngone homateke tailako, hupaya ngone yakunu homahikodöaka o hititila la hädora nanga dodiawo deʼ hodiai hagala o hali maoa-oa.

²⁵Kokiani ngone itatapu homatoomu homa kokomoteke, deʼ uhali hoalipä hokä o nyawa mahomoa. Ngone igoungu kokiani iholoi hosetia homa hikukuata, hababu ngone hohiöriki itedekanokaua ma Jou aha woböa.

²⁶Hababu nako o abari madiai ma Jou Madutuino ihiadonoka ngoneino, mä ngone kagila-gila dika hohangaja o baradoha hodiai, done koiwaka naga o huhuba la yaehe tongone nanga baradoha.

²⁷ Imatötëngo-tëngo nanga naga mangale ngone enagenangala höhimanga ma Jou Madutu aiadili de Ai dohata mauku deʼ aha yatuhuku yamata-mata hagala o nyawa iwilawa-lawani Unanga!

²⁸ O nyawa ihingou-ngounua o tita o Musa wohidöa-döaka, yähukumu yähohonenge maapongo koiwa, nako de o hakihi yahinoto ekola yaruange, ünanga inyata igoungu wahowono.

²⁹ Hokokia iholoi madubuho mahukumanga yägogelenga o nyawauku iwidö doko-doko ma Jou Madutu ai Ngohaka. O nyawa gënanga yapulono okiauayadäene ma Jou Madutu aijaji maawunu, enagënanga o Kristus ai honenge yatö tebi-tebini manga baradoha. Unanga wohikauku o Womaha ihidödöa-döaka o hayanga de o dora.

³⁰ Ngone hohi öriki o naguna geünanga wotö temo-temo, ”Ngohi aha tabalahi! Ngohi aha tähukumu!” deʼ yotötemo-temo, ”Ma Jou aha wahihakimi Ai umati.”

³¹Hokokia duru maborohono nako hotifa ma Jou Madutu Wo Wango-wango aigiamika!

³²Niohohininga sarakia ngini naga Roriadodoto maöraha ipöpaha-paha. Orahagënanga, ipaha de ma Jou Madutu ailetongo inidararono, ngini kania ngöe niatagongo o huha de o hangihara; mä ngini itatapu niparangi niakaigoungu.

³³Naga mamoiani inihikauku deʼ inihidapara itorou o kawaha manga himangoka. Nagali mamoiani ngini niatagongo o huha de o hangihara dede önanga yahidapara hoko gënanga,

³⁴deʼ nginiö niamäo mahuha de o nyawa yäböbui-bui. Deʼ maöraha mata-mata niakiahonanga tingini yaora, ngini niatarima gënanga de niahininga isosanangi, hababu ngini nianako kanagahi niakianaga moi iholoi yaoa, aha itongohono kahiado-adonika.

³⁵Mangale karana gënanga, uha niangonganono itoaka, hababu nako ngini itatapu ningaku, done naga niahewa iholoi ilamoko o hidoku gënanga!

³⁶Ngini iparalu nisabari, hupaya ngini yakunu niadiai ma Jou Madutu aimau deʼ dehokogënanga niatarima okia inihijöjäjajioka.

³⁷ Hababu Ma Jou Ai Demo ma Buku magoronaka itulihi, ”Duga-duga mahutuohi dika, done Unanga woböböa-böa gënanga, aha itaiti woböa; Unanga aha watuda-tudaokaua Ai böa.

³⁸Deʼ Ahi umati yototiai aha yongaku deʼ yowango; mä nako naga to önanga manga higoronaka imadohuku, done Ngohi tosanangiua onangika.”

³⁹Ngone nënanga koigoungua o umati hodohu-dohuku de hohïhihanga. Iidulu yaino, ngone ganga o umati hongaku-ngaku ma Jou Madutuika deʼ inahi hohalamati.