Read Tobelo O IBRANI 13 Bible Online

O IBRANI 13 - Tobelo bible

O IBRANI 13

¹Kokiani ngini itatapu nimäkodora moi de moi hokä o roriadodoto o Haranioka manyawa.

² Uha nidodato niatarima niatauoka o nyawa niänäko-näkoowahi. Hababu de nidiai hoko gënanga, mamoi iböto o nyawa, yanäko-näkoua, yätarimaka o malaekat manga tauoka.

³Niahininga hagala o nyawa o bui magoronaka, hokä nginiö naga dede önanga o bui magoronaka. Deʼ hagala o nyawa yahidapara isabarangika, kokiani ngini nimahininga onangika hokä nginiö inihi dapara hokogënanga.

⁴O nyawa mata-mata kokiani ihimatoko manga jako de mahoromati o gogil̄akika, mahababu gënanga o hekata de o rokata kiani yosetia moi de moi. O nyawa manga wowango isösafarune deʼ o nyawa yohowo-howono aha ma Jou Madutu wahidero o adili.

⁵ Uha aniwowango yakuaha yönahihu o tiwika, mä kokiani ngini niamäo yaoaka de okia nginioka naga de maënanga. Hababu ma Jou Madutu wotemoka, ”Ngohi aha tonihigumal̄aua ekola aha toni mal̄aika ngona.”

⁶ Hababu gënanga ngone hobarani hotemo, ”Ma Jou ganga ahi Roriwo, ngohi tohawanua. Okia yakunu o nyawa yodiai ngohino?”

⁷Uhali niäwöhanga initötuda-tudaika ihingöngahu-ngahu ma Jou Madutu aibehehongo nginika. Niatailako sarakia önanga yowango deʼ sarakia önanga yohönenge, deʼ nimäduru toona manga ngongaku.

⁸O Yesus Kristus itatapu imatero, yaoa ihiraino, öraha nanga, deʼ hiädono kahiado-adonika.

⁹Uhali nihigumal̄a hagala o rupa o dodötoko ihëra-hëranga done ngini nianonua o ngëkomo madiai. Nanga hininga kokiani ihikuata de ma Jou Madutu aihininga maoa, gënanga doka yaoa-oa; uha mangale o inomo madatoro. Hagala o nyawa mahira ihingou-ngounu hagala o datoro gënanga koyamäkeua mafaidä.

¹⁰Tongone naga de nanga huhuba mangï o gahumu moi la hohihuba o huhuba ma Jou Madutuika. Deʼ o imam-imam yolöleleani ma Jou ai Tau magoronaka, manga haku koiwa yaol̄omo o huhuba naga o huhuba mangï mal̄okuoka.

¹¹ O aiwani ma awunu ihi huba-huba hokä o huhuba mangale o baradoha maapongo, ma imam womomulia waö o Ngï Duru i Tebi-tebinika, mä o aiwani mahönenge mahirete gënanga yatuhuku o tau-tau maporetoka.

¹²Mahababu gënanga doka o Yesusö wohonenge o kota mangorana maporetoka la watebini Ai umati manga baradoha de Ai awunu mahirete.

¹³Karana gënanga, niaino ngone hoiki Unangika o tau-tau maporetika deʼ ngone dede Una kamamoi inähikauku.

¹⁴Hababu o duniaka koiwa naga o ngï hogogere ikakali mangale ngone; ngone halingiri o ngï hogogere aha iböböa-böa.

¹⁵Hababu gënanga, homahidomoteke o Yesus, kokiani ngone hihigogiriri ma Jou Madutu; gënanga marupa tongone nanga huhuba sukur Unangika, kiaka ngone de nanga demo-demo nanga uruiha mangale hohimulia Ai romanga.

¹⁶Uha niawöhanga nidiai o oa deʼ nimäkokiriwo, hababu nënanga doka o huhuba-huhuba ma Jou Madutu aihininga yadäe-däene.

¹⁷Niamoteke niatutuda-tutuda mangapareta, deʼ nimaponu onangika. Hababu önanga salalu ihidailako niajiwa, deʼ onanga kokiani imahitagongo yohaluhu ma Jou Madutuika. Nako ngini niahingounu onangika, önanga yakunu yomanarama de manga hininga isanangi; nako kowali, done önanga aha yomanarama de manga hininga mahuha, deʼ genanga koiwa mautumu nginika.

¹⁸Kahokogenangika nimäniata mangale ngomi. Ngomi mihigoungu de miahininga madobote idödodono, hababu hagala o hali magoronaka ngomi salalu mimau miadiai okianaga itotiai.

¹⁹Maboboloi ngohi togahoko de magiria, hupaya ngini nihïhubayanga ngohi hupaya ma Jou Madutu de madataiti wohiao ngohi toma idulu nginika.

²⁰Ma Jou Madutu wihiwangoka o Yesus tongone nanga Jou, o hönenge mahigoronaka. Karana Ai hönenge gënanga Unanga örahananga wodadi o Gogöana womo Mulia mangale ngone, enagënanga Ai duba-duba. Ai honengö gënanga ihigoungu o jaji ikokakali dede ngone ma Jou Madutu wadödodiai.

²¹Tanu ma Jou Madutu o lolämatiti gënanga wödogo okianaga ikura-kuranga nginioka de hagala maoa-oa ngini nipöparalu la niadiai Ai mau. Tanu hidomoteke de o Yesus Kristus, ma Jou Madutu womanarama ngoneoka, okia wöigo-igo. Kokiani o Kristus iwihigiriri kahi ado-adonika! Amin.

²²Ngohi togahoko hupaya ngini niatailako nihidodiai hagala ahi nasihati nënanga de niasabari, hababu ahihurata nënanga hoko kiaua magurutu.

²³Kokiani ngini nihiöriki tongone nanga riadodoto o Timotius wohupuoka o buiino. Nako ünanga wainoka ahi ngï ino nënanga, ngohi aha tiao maöraha ngohi tinïädono ngini.

²⁴Nihingahu miatabea mata-mata niatutudaika, deʼ mata-mata ma Jou Madutu aiumatika. Nia tarimali manga tabea nanga roriadodotoka o Italia mabereraka.

²⁵Tanu ma Jou Madutu winihi barakati ngini riadodoto mata-mata.