Read Tobelo O IBRANI 2 Bible Online

O IBRANI 2 - Tobelo bible

O IBRANI 2

¹Mahababu gënanga kokiani ngone iholoi hagou-goungu homahijöjö o dodötoko-dodötokika ngone hoihe-ihenoka, hupaya uha ngone hodogumal̄aika tongone nanga ngongaku.

²Hagala o behehongo ihingö ngahu-ngahuoka omömalaekat nangaete de nangatohoraika inyata itiai, deʼ o nyawa ihimote-motekua ekola ihingounua yatarima o hukumanga imatero de manga manarama.

³Okia hongoli de o halamati iholoi ikökua-kuata o behehongo-behehongino gënanga! Nako ngone hatailako hohidodiaiua o halamatika gënanga, ngone maraioka aha holapahiua de o hukumanga. Hababu ma Jou mahirete madodihiraka wohingahuoka o halamati gënanga, deʼ hagala o nyawa yoihe-ihene madodihiraka igoungu ihinyataoka toënanga madiai ngoneino.

⁴Imako moteke degënanga, ma Jou Madutu womahimoteke wohikuata hagala o nyawa gënanga mangahakihi de wodiai hagala irupa ihëra-hëranga deʼ hagala o hali kabiahaua, inoli wohikokodoku o ngongike-ngongike ma Jou Madutu ai Womahino imoteke to ünanga Ai mau mahirete.

⁵Hagala o malaekat yamäkeua o kuaha ma Jou Madutuino la yapareta o dunia mahungi aha iböböa-böa, ënangaganga o dunia magogiria ngone hohi ade-ade nënanga.

⁶ Iidulu yaino, mahidoku moioka Ma Jou Ai Demo ma Buku magoronaka itulihi hokonënanga, ”Okia gënanga o nyawa, ya Jou Madutu, hiädono Ngona nomau nähininga? O nyawa duga-duga kao nyawa dika, mä Ngona kanä totailako!

⁷O öraha madodipokoino Ngona nihidadioka ünanga ma huhutulu iholoi wotipokouku de o malaekat. Ngona nihidöaka unangika o ngï imomulia deʼ duru dema horomati,

⁸inoli nihidadi ünanga wakokuaha hagala moi-moi.” Aa, nako hahëtongo ma Jou Madutu wahidadi o nyawa ”yakokuaha hagala moi-moi”, gënanga mamangarati kamoiö de koiwa naga o nyawa manga kuaha matimiukuua. Mangaro hokogënanga, ngone hamäkeua örahananga o nyawa yakuaha hagala moi-moi.

⁹Mä ngone hamäkeoka örahananga o Yesus wokuaha! Unanga iwidiai mahuhutulu iholoi wotipokouku de o malaekat o öraha madodipokoino, hupaya de ma Jou Madutu aihininga maoa Unanga yakunu wohonenge mangale o umati mata-mata. Ngone hamäkeoka örahananga iwihidöaka Unangika o ngï imomulia deʼ duru de mahoromati, karana Unanga watagongoka o huha de o hangihara hiädono wohonenge.

¹⁰Igoungu mapatutu ma Jou Madutu — wohidödadadi hagala moi-moi mangale Ai dungutu mahirete — wadiai o Yesus wohihohalamati itötotomo dema ngëkomo o huha de o hangihara. De gënanga ma Jou Madutu yakunu wahigaro o nyawa mangangöe mangale imakomoteke de o Yesus yahimulia. Hababu Unanga o ngëkomo mabobelenga onangika la yakunu yahihalamati.

¹¹O Yesus watebini o nyawa manga baradoha; deʼ Unanga wahi tebi-tebini, de inoli önanga wahitötebi-tebinoka gënanga mata-mata manga Ama kamoi. Mahababu gënanga o Yesus iwimal̄ekua womangaku önanga ganga hokä Ai riadodoto.

¹² O Yesus wïtemo ma Jou Madutuika, ”Ngohi aha tohingahu Ahi roriadodotika mangale Ngona. Ngohi aha tonihigiriri Ngona to önanga manga doomu magoronaka.”

¹³ O Yesus wotemooli, ”Ngohi aha takelenga Ahi nganono ma Jou Madutuika.” Deʼ Unanga wotemoli, ”Nënanga Ngohi, kamamoi de o ngoha-ngohaka ma Jou Madutu wohihidöa-döakoka Ngohino.”

¹⁴Mangale mahababu hagala o nyawa Unanga wähëtongo o ngohaka gënanga, ganga o nyawa o dodadi yakunu ihonenge, ho o Yesus mahirete wodadi imaketero dede önanga deʼ wowango marupa o nyawa magoronaka. Unanga wodiai hokogënanga, hupaya de to Una Ai honenge Unanga wakunu wawedere o Ibilihi yakokuaha o honenge.

¹⁵De madodagi hokogënanga Unanga wahilapahi o nyawa manga umuru magurutu yogilaongo karana yömodongo o honengika.

¹⁶Inyata o malaekatua Unanga wöriwo, duga-duga o Abraham aidifauku.

¹⁷Nënanga mamangarati kokiani Unanga imaketero de Ai roriadodoto hagala o hali magoronaka. Deʼ de gënanga Unanga wakunu wodadi o Imam womo Mulia de wososetia deʼ de Ai dora de Ai hayanga. De Ai leleani gënanga o nyawa manga baradoha yakunu iapongo.

¹⁸Deʼ mangale gënanga Unanga mahirete mamoi iböto watagongo o huha de o hangihara deʼ iwi taili, Unanga wakunu wäriwo hagala o nyawa yäkokorona o bobaja, hababu Unanga mahirete mamoi iböto iwitaili deʼ watagongo o huha de o hangihara.