Read Tobelo O IBRANI 3 Bible Online

O IBRANI 3 - Tobelo bible

O IBRANI 3

¹Roriadodoto homahiteke ho Haranioka, ma Jou Madutuö winïahokoka. Abeika niatibanga nialuku-lukuku mangale o Yesus nënanga! Ma Jou Madutu wïhuloko Unanga madungutu magilamoko la wodadi o Imam womo Mulia tongone nanga agama magoronaka.

² Unanga wosetia ma Jou Madutuika wiiri-irikoka Unanga mangale o manarama gënanga, hokä o Musaö mahiraino wosetia wagöraka aimanarama ma Jou Madutu aitauoka.

³Mä o Yesus ipatutu wamäke o horomati iholoi ilamoko de o Musa. Hababu o nyawa higoko-goko o tau kokiani yamäke o horomati iholoi ilamoko de o tau gënanga mahirete.

⁴Itiai moi-moi o tau naga ihigögoko-goko, mä ihigögoko-goko moi-moi ganga ma Jou Madutu mahirete.

⁵O Musa wosetia hokä wolöleleani ma Jou Madutu aitau magoronaka deʼ wohiädono hagala o hali aha ma Jou Madutu wohingahu maöraha nanga himangika iböböa-böa.

⁶Mä o Kristus wosetia hokä o Ngohaka womahimoku mabobaluhu mangale ma Jou Madutu aitau. Dë ngone nënanga ma Jou Madutu aitau, nako ngone itatapu inamagawe deʼ itatapu hongaku la hamäke okia ngone höngano-nganono.

⁷ Gënanga mahababu, hokä ma Jou Madutu ai Womaha yato, ”Nako o wange nënanga ni ihene ma Jou Madutu aiilingi,

⁸uha ngini niahäeke niatogowini, hokä niaete de niatohora, maöraha önanga yolawani ma Jou Madutuika deʼ ma Jou Madutu iwiuji o tonaka i kökokakahaoka.

⁹’Dokengoka niaete de niatohora ihi taili ngohi, deʼ ihiuji ngohi,’ ma Jou Madutu wato, ’enahioko önanga yamäkeoka Ahi manarama madëkana o taongo moruata.’

¹⁰Mahababu gënanga ngohi tängamo onangika de ngohi totemo, ’Onanga salalu yosetiaua, deʼ yöigoua ihingounu hagala Ahi pareta.’

¹¹Ngohi tongamo deʼ tokoboto, ’Onanga aha koyöngohamua o berera gënanga la yamäke o dodogumu dede Ngohi.’ ”

¹²Roriadodoto, nimahidodiai uha hiädono naga niahidogoronaka womatëngo aihininga hokogënanga mamodorou deʼ koiwa aingongaku, hiädono ünanga womaidulu deʼ wïtingaka ma Jou Madutu wowango-wango!

¹³Hoʼ, hupaya kao nyawa moiö makoiwa naga niahidogoronaka o baradoha yätipu hiädono iwilawani ma Jou Madutu, kokiani ngini nimateke nasihati o wange higetongo hokokia madëkana ngone kahowangohi o öraha magoronaka yahëto-hëtongo ”O Wange Nënanga” Ma Jou Ai Demo ma Buku magoronaka.

¹⁴Ngone mata-mata ganga homa tekedodiawo o parangi oka de o Kristus, iti ngone hiädono mabobaha hasosö ibitumu o ngongaku magoungu kade mahirahi naga ngoneoka.

¹⁵ Nënanga doka yatötuli-tulihi Ma Jou Ai Demo ma Buku magoronaka, ”Nako o wange nënanga ngini niihene ma Jou Madutu aiilingi, uhali ngini niahäeke niatogowini, hokä niaete de niatohora, maöraha önanga yolawani ma Jou Madutuika.”

¹⁶ Aa, o nyawa nagona yoihe-ihene ma Jou Madutu aiilingi de yolawani Unangika? Genanga mata-mata o nyawa watötuda-tuda o Musa, yohupu o Mesir mabereraino, koigoungua?

¹⁷Deʼ o nagonaika ma Jou Madutu wängamo madekana o taongo moruatino? Onanga yoböbaradohaika, yohöhone-honenge o tonaka ikö kokakahaoka, koigoungua?

¹⁸Maöraha ma Jou Madutu wokoboto hoko nënanga, ”Onanga aha koyö ngohamua o berera gënanga la yamäke o dodogumu dede Ngohi” — o nagonali ma Jou Madutu wädungutu? Wädungutu ganga hagala o nyawa yolölawa-lawani ma Jou Madutuika, koigoungua?

¹⁹Orahananga ngone homangarati önanga yakunua yowohama karana önanga yongakua ma Jou Madutuika.