Read Tobelo O IBRANI 4 Bible Online

O IBRANI 4 - Tobelo bible

O IBRANI 4

¹Aa, ma Jou Madutu aijaji kaipäkeohi, deʼ ngone aha inahidöaka o dodogumu wonahijäjaji. Hoʼ, kokiani ngone högöana hupaya kao nyawa moiö mauha naga niahidogoronaka inyata yajameua o dodogumu inahijäjaji gënanga.

²Hababu o Abari ma Oa gënanga ihingahuoka ngoneino imatero hokä onangika. Mä onangika, o abari gënanga koiwa mafaidä. Hababu maöraha önanga yoihene, önanga yongakuua.

³ Mä ngone hangöngaku-ngaku hatarima o dodogumu ma Jou Madutu wonahijäjaji gënanga. Gënanga imadäene de okia ma Jou Madutu wahëto-hëtongo, hokonënanga, ”Ngohi tongamo deʼ tokoboto, ’Onanga aha koyowohamua la yamäke o dodogumu dede Ngohi.’ ” Ma Jou Madutu wotemo hokogënanga ngarokö Ai manarama ibötoka kade madero Unanga wohidadi o dunia nënanga.

⁴ Hababu mangale o wange matumidi, naga itulihi Ma Jou Ai Demo ma Buku magoronaka hokonënanga, ”O wange matumidoka ma Jou Madutu womahibatongo de touna Ai manarama mata-mata.”

⁵ Yakorona o hali gënanga ituliholi hokonënanga, ”Onanga aha yowohamua o bereraika gënanga la yamäke o dodogumu dede Ngohi.”

⁶Hoʼ, önanga madodihiraka yoihe-ihene o abari mangale o Abari ma Oa gënanga, yatarimaua o dodogumu gënanga karana önanga yongakuua. Nako hokogënanga itararonoka naga o nyawa mahomoa yakunu yatarima o dodogumu gënanga.

⁷ Hababu ma Jou Madutu wohitantuoka moi o wange mahomoaoli, yahëtongo ”O Wange Nënanga”. Ipahaika de matao-taongo ma Jou Madutu wotemo-temo yakorona o hali gënanga de madodagi ma Koano Daud, ma ayat yahëto-hëtongo kangano magoronaka, ”Nako o wange nënanga ngini niihene ma Jou Madutu ai ilingi, uhali ngini niatogowini niahäeke.”

⁸ Ade-ade nako o Yosua wahidöakoka o nyawa geönanga o dodogumu ma Jou Madutu wohijäjajioka, done ma Jou Madutu aha wohiade-adeokaua mangale o wange mahomoa.

⁹Hoʼ, mangale ma Jou Madutu aiumati kanagahi o jaji la imahibatongo hokä ma Jou Madutu womahibatongo o wange matumidoka gënanga.

¹⁰ Karana o nyawa yatotarima o dodogumu ma Jou Madutu wahijäjajioka onangika gënanga, aha imahibatongoli de toona manga manarama mata-mata, imatero hokä ma Jou Madutu.

¹¹Mangale gënanga, niaino ngone homahidailako hagou-goungu la hatarima o dodogumu ma Jou Madutu wohijäjajioka gënanga. Uha hiädono nanga hidogoronaka womatëngo wodadiua hokä önanga mahiraino, karana yongakuua ma Jou Madutuika.

¹²Ma Jou Madutu aidemo ganga o demo mangango deʼ ikuata; iholoi idöto de o oworo madöto mahimanga de maporete kaidöto. O demo gënanga yatohoko hiädono mabatingi o jiwa deʼ o womaha mahigorona; yadono mabatingi nanga donga-donga de nanga kobongo maniara mabatingi, hiädono ihiöriki o nyawa madibanga iluku-lukuuku deʼ o nyawa mahininga mamau.

¹³O dodadi moiö ma koiwa naga yakunu iiunu ma Jou Madutu ailolegaoka. Hagala moi-moi i talajanga deʼ ihelengaika Ai himangoka. Deʼ ngone kokiani hohidöaka nanga bobaluhu Unangika.

¹⁴Mahababu gënanga kokiani ngone homa hijojö hakëkekete tongone nanga ngongakuika hohimato-matokoka. Hababu ngone dema ënanga nanga Imam womo Mulia wolamo-amoko, wowohamoka hiädono ma Jou Madutu aihimangika — ge Unanga doka o Yesus ma Jou Madutu Ai Ngohaka.

¹⁵Tongone nanga Imam womo Mulia gënanga koigoungua o imam wakunua wamoteke wamäo tongone nanga bole-bole. Iidulu yaino, Unanga iwitailoka hagala o hali magoronaka, imaketero hokä ngone mahirete; duga-duga Unanga wodiaiua o baradoha!

¹⁶Hababu gënanga, niaino la ngone hogogomangil̄e de homanau-nauru hïhïmanga ma Jou Madutu, wopopareta de aihininga maoa. Ma Jou Madutu aha wonädora ngone deʼ wonahibarakati ngone hupaya ngone hamäke o roriwo maöraha yakokorona.