Read Tobelo O IBRANI 5 Bible Online

O IBRANI 5 - Tobelo bible

O IBRANI 5

¹Moi-moi o imam yomomulia yäiriki o umati manga higoronaka, deʼ yägöraka la iwïleleani ma Jou Madutu hokä toönanga manga dururu. Ai manarama gënanga la wohihuba ma Jou Madutuika o ngongike-ngongike deʼ o huhuba-huhuba mangale o baradoha ma apongo.

²O imam womomulia gënanga una mahirete wobole o hali mangöe magoronaka, deʼ karana gënanga ünanga yakunu wadiai wäbole-bole hagala o nyawaika okia-kiaua yanako deʼ o ngëkomo madiai yahohongohu.

³ Deʼ karana gënanga ünanga mahirete wobole, done ünanga kokiani wohihuba o huhuba, karana kaoumatua dika hagala manga baradoha, mä karanaö hagala aibaradoha mahirete.

⁴ Kao nyawa moiö makoiwa naga yagöraka manga diri mahirete yodadi o imam womomulia. O nyawa yodadi o imam womomulia nako mangale gënanga ma Jou Madutu wïahoko — imatero hokä o Harun.

⁵ Hokogenangö o Kristus. Unanga womagörakua Ai diri mahirete wodadi o Imam womo Mulia. Ma Jou Madutu mahirete wïgöraka Unanga. Ma Jou Madutu wïtemo Unangika, ”Ngona ahi Ngohaka; o wange nënanga ngohi todadi Ani Ama.”

⁶ O ngï mahomoaka ma Jou Madutu wotemoli, ”Ngona ganga o imam kahiado-adonika, hokä ma Imam Melkisedek.”

⁷ Maöraha o Yesus wowango o duniaka nënanga, Unanga womäniata deʼ wogahoko de Ai böaka de wïgari ma Jou Madutuika, wa aku-akunu wihihalamati o honengino. Deʼ karana Unanga womahimoteke ma Jou Madutuika de Ai horomati ioma-omanga, ho Unanga wihigihene.

⁸O Yesus ganga ma Jou Madutu ai Ngohaka, mä ngarokö hokogënanga Unanga womädotoko wohingounu de madodagi Ai huha de Ai hangihara.

⁹Ho iböto Unanga wodadioka wohihohalamati itötotomo, Unanga wodadi o halamati matiti ikokakali mangale o nyawa mata-mata yomote-moteke Unangika,

¹⁰deʼ ma Jou Madutu mawohinyata Unanga hokä o Imam womo Mulia, hokä ma Imam Melkisedek!

¹¹Yakorona o Yesus aipangkati hokä o Imam womo Mulia, mangöe naga iparalu ngomi mihingahu nginika, mä ihuha mangale hohitararono hababu ngini itaituaholi nimangarati.

¹² Imoteke madiai ngini maorahoka la ngini nidadi o guru, mä manyonyata ngini kaiparaluohi nimädotoko o nyawa mahomoaika mangale mahohol̄e madodihiraka ma Jou Madutu aidodötoko. Ngini yakunowahi niatarima o inomo madodogowini; ngini kokiani niokere kaohuhuohi dika.

¹³O nyawa kayohuhuohi, mamangarati Unanga kaongohaka magil̄auohi; ünanga koiwahi wödibanga i kurutika mangale okia itiai de okia ihowono.

¹⁴O inomo itotogowini ganga mangale o nyawa yobalu-baluhoka karana yamömäke-mäke deyadodiai, yakunoka ihilihowono kiaka maoa deʼ kiaka madorou.