Read Tobelo O IBRANI 6 Bible Online

O IBRANI 6 - Tobelo bible

O IBRANI 6

¹Hababu gënanga, niaino ngone hotagi nanga himangika o dodötoko-dodötokika iholoi ikurutika hogila-gila mangale o baluhu o Harani mawowango, deʼ uha duga-duga höhohininga tongone nanga agama madodötoko mahohol̄e madodihiraka. Uha ngone högilioli o dodötoko mahohol̄e madodihiraka o nyawa kokiani imatogumu yodiai hagala o hali mafofaidäua deʼ kokiani hingaku ma Jou Madutuika,

²ekola o dodötoko madodihiraka yakorona o gohiki madebi-debini ekola yakorona o giama yägogelenga o nyawauku, ekola yakorona yohonengoka de yowangoli ekola o hukumanga ikokakali.

³Niaino ngone, nako ma Jou Madutu wonahigumal̄a, hotagi nangahimangika o dodötoko-do dötokika iholoi ikurutika igila-gila!

⁴Hababu hagala o nyawa yosetiaokaua o agamaika, idadiua yätuda yäkilio. Onanga mahira naga ma Jou Madutuino Ai dararono magoronaka, deʼ onanga yajameoka Ai ngongike. Onangö ma Jou Madutu ai Womaha yäkuahaoka.

⁵De okianaga yamäke-mäke de yadodiai önanga ihiöriki ma Jou Madutu aidemo gënanga yaoa, deʼ onanga yamäoka o ngongike-ngongike yäomanga de o kuaha o öraha aha iböboa-boaka de yaino.

⁶Mä iböto de gënanga önanga yosetiaokauao agamaika! Kiakayakunu önanga yätuda yäkilio la yotobali o baradoha yodiaiokaua. Hababu önanga magogiria iwisaliboli ma Jou Madutu ai Ngohaka deʼ yadiai Unanga iwihikauku o kawaha manga himangoka.

⁷O tonaka mamoi-moi yödotawana enanguku yahihihi o awana ma akere, done ihihasili hagala o joro de mafofaidäoka matonaka yamomanaramika, o tonaka gënanga ma Jou Madutu wohibarakati.

⁸ Mä nako o tonaka gënanga ihihasili o nguhumu deʼ o momo mahohihika, done o tonaka gënanga koiwa mafaidä deʼ done aha ma Jou Madutu walolai deʼ mabobahaka yamata yatuhuku.

⁹Mä o Roriadodoto tinïhohininga, ngarokä ngomi mitemo hokogënanga, mä ngomi mingaku igoungu mangale ngini. Ngomi mingaku igoungu ngini niatarimaka hagala o hali iholoi yaoa, enagënanga hagala o barakati marupa niahalamatino mahidoku.

¹⁰Ma Jou Madutu koigoungua ma Jou Madutu woadi-adilua. Unanga kowawohangua okia ngini nimanarama Unangika, deʼ o dora nihimato-matokoka Unangika maöraha niariwo o roriadodoto o ngongaku moi, örahanënanga de mahira.

¹¹Ngomi duru mioigo hupaya ngini moi-moi gila-gila inïmagawe hiädono mabobaha, hiädono ngini niatarima okia ngini niongano-nganono gënanga.

¹²Ngomi mioluku ngini idadi inïtebeturu. Mä ngomi mioigo hupaya ngini niwango hokä o nyawa yatotarima okia ma Jou Madutu wohijäjaji, karana ngomi miwingaku Unangika deʼ karana mitamä de miasabari.

¹³Maöraha ma Jou Madutu wïjaji o Abrahamika, Unanga wokoboto Unanga aha wadiai okia wohijöjäjajioka. Deʼ karana koiwa naga iholoi yokurutil̄e de ma Jou Madutu ho Unanga wokoboto de touna Ai romanga mahirete.

¹⁴ Unanga wotemo, ”Ngohi tojaji aha tonihibarakati ngona deʼ Tadiai anidifauku idadi yowöe.”

¹⁵O Abraham wotamä de aisabari, ho ünanga watarima okia wihijöjäjajioka ma Jou Madutu unangika.

¹⁶Nako o nyawa yokoboto, ünanga wokoboto de o nyawa mahomoa manga romanga iholoi yokurutil̄e de ünanga, ho o koboto gënanga yamata-mataka hagala o ributu.

¹⁷Ma Jou Madutu womau wohitotiaika hagala o nyawaika yatotarima Ai jaji, Unanga aha kowangaliua touna Ai datoro. Mahababu gënanga Unanga wödogo o koboto o jajika gënanga.

¹⁸O hali hinoto gënanga yakunua ingali: Ma Jou Madutu idadiua woëluku yakorona Ai jaji deʼ Ai koboto. Hababu gënanga, ngone homahöhohongoka ma Jou Madutuika, ihidöaka o hititila ikua-kuata la homahijojö ikëkete o ngonganonika nangahimangoka imahoheika.

¹⁹ Tongone nanga ngonganono gënanga hokä o tapu imahibaiti duru kahalukuku deʼ imahirupa o jojö ikua-kuata deʼ koiwa o hawana nanga ngangoika. O ngonganono gënanga yatotara o Ngï Duru i Tebi-tebini maguba ma Jou ai Tauoka o horoga magoronaka.

²⁰ O Yesus wahelengaoka o ngëkomo o ngïika gënanga mangale ngone, deʼ wowohamoka dokengika wodadi tongone nanga Imam womo Mulia kahiado-adonika, hokä ma Imam Melkisedek.