Read Tobelo O IBRANI 8 Bible Online

O IBRANI 8 - Tobelo bible

O IBRANI 8

¹ Nanga ade-ade mata-mata nënanga matiti enagenangala: Tongone de maënanga o Imam womo Mulia hokä hokogënanga, wogogeruku wopareta de ma Jou Madutu Duru wo Lamo-amoko o horogaka.

²Unanga wagöraka o manarama hokä o Imam womo Mulia o Ngï Duru i Tebi-tebinoka, enagënanga ma Jou aitau madutu magoronaka, ma Jou wohigoko, ko o nyawaua.

³Moi-moi o imam womomulia yägöraka la ihihuba o huhuba ekola ihihuba ma Jou Madutuika. Hokogenangoli nanga Imam womo Mulia; Unanga kokiani de touna Ai kianaga moiani la wohihuba.

⁴O demo maade Unanga naga o duniaka nënanga, Unanga aha wodadiua o imam, hababu naga iböto o imam wohihuba-huba o huhuba yagaho-gahoko o agama Yahudi matitaka.

⁵ O manarama önanga yadodiai hokä o imam gënanga imoteke madiai ganga duga-duga o dulada moi de okianaga o horogaka magurumini. Gënanga mahira ma Jou Madutu wohingahuoka o Musaika, maöraha o Musa womau wohigoko ma Jou ai Tau-tau. Ma Jou Madutu wïtemo o Musaika hokonënanga, ”Nohohininga! Mata-mata gënanga kokiani ngona nadiai imoteke inihimato-matokoka mapahitaka o l̄oku mal̄okuoka.”

⁶Mä orahananga o Yesus wamäke o imam mamanarama iholoi ikurutika mamulia de yamo manarama o imam-imam gënanga. Hababu o jaji yadodiai ma Jou Madutu deʼ o nyawa mahigoronaka, ganga o jaji iholoi yaoa karana imahihol̄e de o jaji mangale o hali-o hali i holoi yaoa.

⁷O demo maade koiwa naga makuranga o jaji madodihiraka, done i paralua yadiai o jaji mahinotoka.

⁸ Mä ma Jou Madutu wamäkeoka mahowono aiumatoka, hiädono ma Jou Madutu wotemo, ”Niohohininga, aha iböa maöraha, Ngohi aha tadiai o jaji mahungi de o Israeloka deʼ deo Yehudaoka.

⁹Koigoungua hokä o jaji Tadodiai de mangaete de mangatohora maöraha Ngohi tätuda önanga tähihupu o Mesir mabereraino. Onanga yosetiaua o jajika Ngohi tadodiai dede önanga; mahababu gënanga Ngohi tähaduli okaua önanga.

¹⁰Mä oraha nanga, nënangadoka o jaji aha Ngohi tododiai de Ahi umati o Israeloka mawangeoka aha iböböa-böa, ma Jou wato: Ngohi aha tögelenga Ahi tita to önanga manga dibanga magoronaka, de tatulihi toönanga manga hiningaka. Ngohi aha todadi toona manga Jou Madutu, deʼ onanga aha yodadi Ahi umati.

¹¹Onanga iparaluua imakodotoko imahi kokoönanga, ekola ihingahu manga riadodotika, ’Niwinako ma Jou.’ Hababu mata-mata önanga, yoeteke de yopako, aha ihinako Ngohi.

¹²Ngohi aha tahi apongo toönanga manga howono, deʼ Tohiningaokaua toönanga manga baradoha.”

¹³De ihihihira moi o jaji mahungi, ma Jou Madutu wadiai o jaji madodihiraka gënanga idadioka madeka-dekanuku deʼ hokabiahaokaua yapäke; deʼ okia madeka-dekanuku, aha itaitoli ihihanga.