Read Tobelo O IBRANI 9 Bible Online

O IBRANI 9 - Tobelo bible

O IBRANI 9

¹O jaji madodihiraka toënanga demapupuji madatoro de toënaö dema pupuji mangï o nyawa yadodiai.

² Gahumu moi o tau-tau ihi goko, mahidoku mahimangoka ihiromanga o Ngï i Tebi-tebini. Genangoka naga o hilo matotodenge de madidiki, deʼ nagali o meja demaroti ihihuba-huba ma Jou Madutuika.

³ Magoronaka, enagënanga o guba mahinotoka maporetoko naga o ngï ihiromanga o Ngï Duru i Tebi-tebini.

⁴ O ngï magoronaka gënanga naga o huhuba mangï o gurasi la o dupa yotuhuku, deʼ nagali o Jaji ma Peti mata-mataika ihilape de o gurasi. O Peti gënanga magoronaka yamäke o bohoko gurasi madol̄a o manna, o Harun aidiki-diki itötori-torioka, deʼ o bëlaka hinoto o helewo mal̄okuuku yatulihi o tita ngimoi ma Jou Madutuino.

⁵ O Peti mal̄okuoka gënanga naga o Malaekat hinoto, enagënanga o dodadi dema gögahuhuoka ihinonako genangokadau ma Jou Madutu wohimangika. O dodadi hinoto gënanga magahuhu yoderefeika o Peti madadamunu mal̄okuku, enagënanga o baradoha maapongo mangï. Mä mata-mata gënanga yakunua hohitararono hatëngo-tëngo.

⁶ Hokogënanga mata-mata yatatoro. O wange ihigëto-gëtongo o imam-imam yowohama mahidoku mahimangino o tau magoronaika gënanga la ihidagi toona manga manarama.

⁷ Yöngohama mahidoku duru magogoronaika o tau gënanga duga-duga ma imam womomulia dika. Unanga wodiai gënanga duga-duga o taongo moi mamoi. Gënanga wodiai de wao o awunu la wohihuba ma Jou Madutuika karana aidiri mahirete deʼ karana hagala o baradoha Ai umati yadodiai imanäko-näkoua.

⁸De o datoro yahöhëto-hëtongo, ma Jou Madutu ai Womaha ihimatoko de madodiai, madëkana de magürutu o tau mahidoku mahimangoka gënanga kaima okoinohi, o ngëkomo yöngohama o Ngï Duru i Tebi-tebini magoronaika ihelengaowahi.

⁹Nënanga ihinonako o örahananga; mamangarati o huhuba-huhuba deʼ o huhuba-huhuba o aiwani ihihuba-huba ma Jou Madutuika, yakunua ihitotomo manga hininga madobote o nyawa yoao-ao manga huhuba.

¹⁰Hababu o agama madodiai-madodiai gënanga duga-duga imateke korona de o inomo, haoke-okere, deʼ irupa-rupa o dedebini madodiai. Mata-mata ganga duga-duga o datoro hamömäke-mäke ilaku hiädono maöraha ma Jou Madutu wahungi.

¹¹Mä o Kristus woböaka hokä o Imam womo Mulia o hali maoa-oaino ibobötoka naga. Ma Jou ai Tau kiakauna wagöraka aimanarama hokä o Imam womo Mulia ganga o tau iholoi imulia deʼ iholoi itotomo. Gënanga o nyawaua yodiai; mamangarati maahali o duniainoua ihidödädadi nënanga.

¹²O Kristus wowohama o Ngï Duru i Tebi-tebini o tau magoronaika gënanga duga-duga kamamoi dika de kahiado-adonika. Orahaganga ünanga waoua o kabingi manauru maawunu ekola o hapi mangohaka maawunu la ihihuba; Unanga woao Ai awunu mahirete, deʼ de gënanga Unanga wonahilapahi ngone mangale kahiado-adonika.

¹³ O kabingi maawunu deʼ o hapi manauru maawunu inoli o hapi mangohaka ihihuba-huba makafo, yapäke la yädohurero hagala o nyawa yopese-pesekika imoteke o agama madatoro hupaya önanga idadi yotebini.

¹⁴Aa, nako o awunu deʼ o kafo gënanga yakunu yatebini hagala o nyawa gënanga manga peseke, okia hongoli o Kristus aiawunu! De madodagi o Womaha ikokakali, o Kristus wohihuba Ai diri mahirete ma Jou Madutuika, hokä o huhuba itötotomo. Ai awunu yatebini tongone nanga hininga madobote de o agama madodiai mafofaidäua, hupaya ngone hakunu hïleleani ma Jou Madutu wowango-wango.

¹⁵Mahababu gënanga o Kristus wodadi o Dodohanga mangale moi o jaji mahungi, hupaya o nyawa wä aho-ahokoka ma Jou Madutu yakunu yatarima o barakati ikokakali wohijäjajioka ma Jou Madutu. Mata-mata gënanga yakunu idadi karana naga iböto yohonengoka, enagënanga o Kristus; deʼ Ai honenge gënanga wahilapahi o nyawa de hagala manga howono önanga yadodiai maöraha o jaji madodihiraka kailakuohi.

¹⁶Nako naga o puhaka mahurata, kokiani nagali manyonyata igoungu o nyawa yododiai o hurata gënanga yohonengoka.

¹⁷Hababu o puhaka mahurata ilakuua madëkana de magurutu o nyawa wadodiai kawowangohi. O hurata gënanga ilaku duga-duga o nyawa gënanga wohonengoka.

¹⁸Karana gënanga o jaji madodihiraka gënanga ma kokiani ihigoungu de o awunu.

¹⁹ Madodihiraka o Musa wahiädono o pareta mata-mata ma Jou Madutu aitita o Israel manyawaika. Gënanga iböto o Musa wal̄ë o hapi mangohaka maawunu deʼ o kabingi manauru maawunu daha wohikaganuino de o akere, ipaha yodohurero o Tita-tita ma Bukuika ma Jou Madutuino deʼ mata-mata o Israel manyawaika de yapäke o hisop mahoka deʼ o duba magogo duru madödoka-dokara.

²⁰Magogiriaka wodiai gënanga o Musa wotemo, ”Nënanga doka o awunu ihigögou-goungu o jaji ma Jou Madutuino kokiani ngini nihingounu.”

²¹ Ipaha de madodagi kaimatero, o Musa wodohurero o awunu genangoli ma Jou ai Tau-tauika deʼ mata-mata o pupuji mapakakahika.

²² Itiai imoteke o agama Yahudi matita, ngadeke hagala moi-moi ihitebini de o awunu; deʼ o baradoha yakunu i apongo duga-duga nako naga o awunu ikopoa.

²³De madodagi hokogënanga dika o bara-baranga ihinononako hagala o hali o horogaka, kokiani ihitebini: Mä mangale o hali-o hali o horogaka gënanga mahirete iparalu o huhuba iholoi yaoa.

²⁴Hababu o Kristus wowohamua o Ngï i Tebi-tebini o nyawa yadodiai, duga-duga ihinonako o Ngï i Tebi-tebini madutu. O Kristus wowohama o horogaika womatëngo; dokengoka örahananga Unanga wïhïmanga ma Jou Madutu mangale tongone nanga paralu.

²⁵O Yahudioka manga imam womomulia o taongo ihigëto-gëtongo wowohama o Ngï Duru i Tebi-tebinika ma Jou ai Tau magoronaka de woao o aiwani o dutumoi maawunu. Mä o Kristus wowohamua mangale wohihuba Ai diri wögogilio.

²⁶Hababu nako hokogënanga, gënanga mamangarati Unanga wögogilioka watagongo o huha de o hangihara kademadero o dunia nënanga ihidadi. Mä manyonyata, örahananga o öraha mabobahaka nënanga, Unanga woböaka mamoidika la waehe o baradoha de wohihuba Ai diri mahirete.

²⁷Ma Jou Madutu wohi tatapuoka o nyawa kamamoi dika yohonenge deʼ ipaha de gënanga ma Jou Madutu wa hidero o adili.

²⁸ Hokogenangoli o Kristus kamamoi dika wohonenge wihihuba hokä o huhuba la yaehe o nyawa manga ngöe manga baradoha. Unanga aha woböali mahinotoka, koigoungua mangale wohitiai o baradoha mahali, mä mangale wahihalamati hagala o nyawa yododamä Ai böa.