Read Tobelo O YAKOBUS 1 Bible Online

O YAKOBUS 1 - Tobelo bible

O YAKOBUS 1

¹ Roriadodoto ma Jou Madutu ai umati mata-mata yodogilianga o dunia ingodumu! Ahi tabea ngohioka, o Yakobus, ma Jou Madutu ai gilaongo deʼ ma Jou Yesus Kristus ai gilaongo.

²Roriadodoto! Nako ngini nia ohana o cocoba irupa-rupa, kiani ngini niamäo niutumu.

³Hababu ngini nihi öriki, nako ngini nitatapu ningaku ma Jouika maöraha nia ohana o cocoba, mahasili enagënanga: ngini idadi nitongohono.

⁴Nio göana la nia hininga madongohono gënanga gila-gila ihero hiädono ngini igou-goungu nidadi nitotomo deʼ nikurangua o hali okiaö magoronaka.

⁵Nako naga o nyawa imatëngo nia hidogoronaka ikuranga yobarija, kiani önanga imä gahoko ma Jou Madutuika, ma Jou Madutu aha wahidöaka o barija onangika; hababu o nyawa moi-moika, ma Jou Madutu wahi döaka de Ai hininga mamura deʼ Ai ma mäo o dora de ai hayanga.

⁶Mä o nyawa yogo gaho-gahoko, kiani yongaku; ünanga yakunua wobibanga. Hababu o nyawa yobobibibanga ganga matero-tero o lulu o ngötoka o hidal̄oko yawuwu yakaika yakaino.

⁷O nyawa hoko gënanga manga dibanga itatäpua; ünanga wakunua wal̄ë okianaga maputuhu hagala moi-moi wadodiai magoronaka. Karana gënanga, ngarouhaö ünanga wonganono mangale okia naga wamäke ma Jouino.

⁹O Haranioka manyawa nimomihikini kokiani niamäo nimörene, nako ma Jou Madutu winihikurutil̄e.

¹⁰ De o Haranioka manyawa niko kaya-kaya, kokianiö nimäo ni mörene, nako ma Jou Madutu winihitipokouku. Hababu o nyawa yoko kaya-kaya aha yohihanga hokä o momo mahuri irero.

¹¹Maöraha o wange iböa de yodihiwara duru kohahauku, done o momo gënanga aha idadi imaai hiädono i rero mahuri, de makaramatö maihihanga. Hoko genangoli de o nyawa yokö kaya-kaya; ünanga aha wowedere maöraha ünanga wohidagi magogiria ai hidailako.

¹²Youtumu o nyawa yototongohono maöraha ünanga waohana o cocoba. Hababu ünanga wohasiloka watäna o cocoba magoronaka gënanga, ünanga aha watarima ai hewa, enagënanga o wowango ma Jou Madutu wohi jäjajioka o nyawa iwi hohiningaika ma Jou Madutu.

¹³Nako o nyawa moi-moi yadäene o bobaja mangale o cocoba marupa hoko gënanga, uha ünanga wotemo, ”O bobaja nënanga ma Jou Madutuoka deyaino,” hababu ma Jou Madutu wabajaua de o dorou, deʼ kao nyawa moiö dika mawabajaua.

¹⁴Mä o nyawa yadäene o bobaja nako ünanga iwitauru deʼ yadehoro ai nahihu mahirete itotorou.

¹⁵Ipaha, nako o nahihu madorou gënanga yamoteke, imakil̄au o baradoha; deʼ nako o baradoha iohakoka, mabaha enagënanga o honenge.

¹⁶Uha ngini initipu, Roriadodoto tinihohininga!

¹⁷O ngongike moi-moi maoa-oa deʼ o parasengi itototomo iböa o horogauku, ma Jou Madutuoka wohiguti wohidö dädadi o dararono o dihangoka. Unanga ma Jou Madutu wongali-ngaliua, deʼ okia dika o huhutu yakunua idiai o hababu.

¹⁸De Ai mau mahirete Unanga wonahidadi ngone Ai ngoha-ngohaka imanïki Ai demo itotiai. Unanga wodiai gënanga laʼ ngone hamäke o ngï duru mal̄okuoka mata-mata o dodadi wohidö dädadi mahidogoronaka.

¹⁹Nënanga niohininga nihidodiai, Roriadodoto tini hohininga! O nyawa moi-moi kiani itaiti mangale yoihene, mä itaitua mangale yotemo deʼ itaitua yongamo.

²⁰O nyawa yongamo yakunua yadiai maoa-oa, yasanangi ma Jou Madutu ai hininga.

²¹Hababu gënanga, nia umo moi-moi o biaha ipese-peseke de itotorou. Nia tarima de nia hininga maboluluku o demo ma Jou Madutu wodato-datomo nia hininga magoronaka, hababu o demo gënanga toënanga makuata inihi halamati ngini.

²²Kiani ngini niadiai okia ma Jou Madutu wotemoka, uha duga-duga kani ihene dika, hiädono de hoko gënanga nia tipu nia diri mahirete.

²³O nyawa yoihene ma Jou Madutu ai demo, mä yadiaiua, ganga hokä o nyawa magogiria ima lega manga biono de madiai o kahinä mahimangoka.

²⁴Onanga ima tailako ihidodiai iböto, onangö yoiki deʼ gila-gila yawohanga sarakia manga biono marupa gënanga.

²⁵Ma Jou Madutu ai tita itotomo deʼ toënanga de makuatoka mangale hilapahi o nyawa. Deʼ o nyawa yatailako de yohininga ihi dodiai deʼ yadiai o tita-o tita gënanga, deʼ kayo ihenua dika daha yawohangoka, o nyawa gënanga ma Jou Madutu aha wahi barakati o hali moi-moi magoronaka yadodiai.

²⁶Nako naga womatëngo womamäo ai diri o nyawa moi wohingounu o agama, mä unanga wogoanua ai äkiri, ünanga watipu ai diri mahirete; de ai puji koiwa mabaraguna.

²⁷O domoteke madutu idödodono o agamaka, ima moteke ma Jou Madutu nanga Ama ai lolegaka enagënanga: yariwo o ngoha-ngohaka o gohihi madutu de o bobao-bobao yohöhangihara deʼ yogöana manga diri mahirete laʼ uha o dunia nënanga yakilianga.