Read Tobelo O YAKOBUS 2 Bible Online

O YAKOBUS 2 - Tobelo bible

O YAKOBUS 2

¹Roriadodoto! Hokä o nyawa yongaku-ngaku ma Jou Yesus Kristusika, o Jou Wo Mo Mo Mulia, uha ngini ni iri-iriki o nyawa, nihihababu de o hali-o hali nia pulono ma poretino.

²Hababu nako naga o kaya manyawa moi womahi noaoko o ali-ali gurasi deʼ ai pakeanga marorahai woböa ani doomuika, daha woboali o mihikini manyawa moi, womahinoauku ai pakeanga makäkakihi,

³mangini iholoi niwi horomati o nyawa womapakeanga marorahai gënanga. Ngini nitemo unangika, ”De mahoromati Tuanga nogogere o kuruhi nënanga duru marorahaiuku.” Mä o mihikini manyawaika ngini nitemo, ”Noma okoino dokengoka,” ekola ”No gogeruku nenangokadau o meheloka.”

⁴De nidiai hoko gënanga, ngini nidiai ni iri-iriki nia dodiawo o nyawa manga hidogoronaka, deʼ nia pulono o nyawa nihihol̄e de nia dibanga itotorou.

⁵Nio hininga Roriadodoto tini hohininga! O mihikini manyawa o duniaka nënanga, ma Jou Madutu wairiki mangale yodadi o nyawa yokaya-kaya o ngongaku magoronaka. O nyawa gënanga aha yodadi o gegetongo ma Jou Madutu ai umati, hokä ma Jou Madutu wohi jäjajioka o nyawa iwi hohohiningaika.

⁶Mä ngini iholoioli nia hikauku o mihikini manyawa, enahioko o kaya manyawa ini tuku ngini deʼ ini tauru ngini o hakimika!

⁷Onanga ihi kauku nia romanga ihohoromati nia totarima ma Jou Madutuino.

⁸ Ngini nia manarama madiai, nako ngini niadiai o pareta matita imo mäke-mäke o Buku ito Tebi-tebini magoronaka nënanga, ”Nia hininga niadodiawo hokä ngini niohininga nia diri mahirete.”

⁹Mä nako ngini ni iri-iriki o nyawa de nihihol̄e o hali-o hali maporetino, ngini nidiai o baradoha, deʼ ma Jou Madutu ai tita ihi matoko ngini ganga o tita nia totilakuru.

¹⁰O nyawa yatilakuru ma Jou Madutu ai tita ngaroka moi, ma mangarati yatilakuru kamamoiuku.

¹¹ Hababu itemo, ”Uha nihowono,” enangö itemo, ”Uha nitoma.” Hoʼ, nako ngini nihowonua mä nitoma, ma nginiö ganga o tita nia totilakuru.

¹²Nitemo deʼ nimanarama hokä o nyawa aha yatailako imamoteke ma Jou Madutu ai tita yahi lolapahioka o nyawa.

¹³Hababu ma Jou Madutu aha wohimatokua Ai dora de Ai hayanga o nyawa yanäko-näko ikaua o dora de o hayanga. Mä o dora de o hayanga iholoi ikuata ngaro de o hukumanga!

¹⁴Roriadodoto! Okia mabaraguna o nyawa yotemo, ”Ngohi o nyawa tongaku-ngaku”, nako ünanga wohi matokua de ai manarama? Yakunu o ngongaku marupa gënanga iwi hihalamati?

¹⁵Hohiade o riadodoto womatëngo ekola momatëngo yoparalu o pakeanga, deʼ to önanga manga inomo yawedonua mangale o wange mahigetongo.

¹⁶Okia mabaraguna ngini niwitemo unangika, ”Halamati nomahinoa ani pakeanga hatoli mahau-hauku deʼ halamati nol̄omo!” — nako ngini nihidöakua unangika okia waparalu mangale wowango?

¹⁷Hoko genangoli de o ngongaku, nako ihimatokua de mamanarama, o ngongaku gënanga koiwa mabaraguna.

¹⁸Marai naga yotemo, ”Naga o nyawa imahi ake manga ngongakuika deʼ nagali imahi ake manga manaramaika.” Ngohi tohaluhu, ”Nihimatoko ngohino sarakia o nyawa yakunu manga ngongaku de koiwa mamanarama, deʼ ngohi aha tohidumutu de mamanarama, ngohi de ahi ngongakuoka.”

¹⁹Ngini ningaku ma Jou Madutu duga-duga womatëngo, koigoungua? Aa, o womaha madorouö ingaku deʼ onanga yohawana yohaharoka!

²⁰Ngini kanibodoholi! Bote iparalu hohimatoko de madiai nginika o ngongaku toënanga koiwa mabaraguna nako koiwa mamanarama?

²¹ Nia mäke dika o Abraham nanga ete de nanga tohora. Ma Jou Madutu witarima ünanga kayaoa-oa, karana ai manarama, enagënanga maöraha ünanga wihihuba ai ngohaka, o Ishak, ma Jou Madutuika o huhuba mangï mal̄okuoka.

²²Nenangoka inyata o ngongaku kiani ihi matoko de mamanarama, hupaya idadi itotomo.

²³ Gënanga imadäene de Ma Jou Ai Demo ma Buku ma ayatoka nënanga, ”O Abraham wingaku ma Jou Madutuika, deʼ karana ai ngongaku gënanga, ma Jou Madutu wihi döaka hokä o nyawa yadodiai ma Jou Madutu ai mau.” Hababu gënanga o Abraham iwi hetongo, ”Ma Jou Madutu ai Hobata”.

²⁴Oraha nënanga itararono o nyawa ma Jou Madutu watarima yaoa gënanga, karana okia o nyawa gënanga yadiai de koigoungua duga-duga karana de manga ngongakua dika.

²⁵ Niamäke dika o ngo Rahaboka, o ngoheka o huhutu maninïki gënanga. Ma Jou Madutu womitarima münanga yaoa, karana ami manarama, enagënanga maöraha münanga matarima ami tau magoronaka o Israeloka manga nyawa yototailako deʼ mariwo önanga mahioara manga diri mahinonu o ngëkomo mahomoa.

²⁶Aa, hokä sarakia o röehe koiwa mawomaha ganga o röehe mahonenge, hoko genangö o ngongaku koiwa mamanarama ganga o ngongaku mahonenge.