Read Tobelo O YAKOBUS 4 Bible Online

O YAKOBUS 4 - Tobelo bible

O YAKOBUS 4

¹Kiaino ma ahali hagala o gangamo deʼ o ributu nia hidogoronaka? Koigoungua gënanga ma ahali nia nahihu-nahihuino hoko genangika dika iparangi nia diri magoronaka mangale nia mäke o dunia masanangi!

²Ngini nio nahihu, mä nia mäkeua, ho ngini nimau nitoma! Ngini nima kua-kuata, mä niadonikaua okia ngini nia lingi-lingiri, mangini nima teke ributu deʼ nimakangamo. Ngini okia-kiaua nia mäke, hababu ngini nigahokua ma Jou Madutuika.

³Deʼ ngaroka nginiö nigahokoka, mangini nia mäkeua, hababu nia gogahoko madumutu ihowono; okia ngini nigahoko ganga mangale nia diri mahirete masanangi.

⁴Ngini ganga o nyawa yososetiaua! Ngini manihi öriki nako ngini nima teke dodiawo de o dunia, ngini nidadi ma Jou Madutu ai haturu? Ho onagona honanga yomau yodadi imateke dodiawo o dunia nënanga, ünanga wohidadi ai diri ma Jou Madutu ai haturu.

⁵Uha niato bote Ma Jou Ai Demo ma Buku koiwa mahohol̄e itemo, ”Ma Jou Madutu wohingï nanga diri magoronaka o Womaha manahihu kohagiria.”

⁶ Ngaroka hoko gënanga, ma Jou Madutu wonahi döaka Ai dora duru ilo amo-amoko ngoneino, iholoi ikuata ngaro de tongone nanga womaha manahihu gënanga. Hababu gënanga, Ma Jou Ai Demo ma Buku magoronakaö itulihi, ”Ma Jou Madutu walawani o nyawa manga hininga ikokurutil̄e, mä ikilioro yaino Unanga wahininga o nyawa manga hininga ipopoluluku.”

⁷Hababu gënanga, nima hilapahi ma Jou Madutuika deʼ nia lawani o Ibilihi, done o Ibilihi aha ioara ngini oka

⁸Niwitigika ma Jou Madutu, deʼ ma Jou Madutuö aha wini tigika ngini. Nia tebini nia giama, ngini nibobaradoha! Deʼ nia dodono nia hininga ngini, nia hininga ihohago-hago!

⁹Kokiani ngini nia gou-goungu nimatoduba deʼ niari ima nïki nidodora; kiani nia giete idadi nia gorehe deʼ nia mörene idadi nia hininga mahuha!

¹⁰Kiani ngini nima hitipokouku nia diri ma Jou ai himangoka, done ma Jou aha ngini winihikurutil̄e.

¹¹Roriadodoto, uha nimateke hohedu ekola nimahikohowono. O nyawa yahohedu ekola yahihowono manga riadodoto imahikoka Haranioka, ünanga wahohedu deʼ wohihowono ma Jou Madutu ai tita. Deʼ nako ngini ni hi howono ma Jou Madutu ai tita, gënanga mamangarati ngini nia motekua o tita-o tita gënanga, mä nidadi mahakimi.

¹²Enahioko duga-duga womatëngo ai haku wohidöaka o tita o nyawaika, de watailako o nyawa. Unanga ma Jou Madutu wokuaha, wohi halamati deʼ wohibinaha. Hoʼ, o nagona ngini, hiädono ngini nimau nia hihowono nia dodiawo o nyawa?

¹³ Roriadodoto nitemo, ”O wange nënanga ekola iyarehengomi aha mimagoraka o berera moika deʼ migogere dokengoka o taongo moi madekana mangale mima hukunu deʼ mima lingiri o tiwi,” — ni ihene ahi hitiari nënanga.

¹⁴I yarehe okia aha idadi de nia wowango, nginiö mahirete manihi orikua! Ngini duga-duga hokä uku manofo jai-jai dika hamäke, ipaha ihihanga.

¹⁵Kokiani ngini nitemo hoko nënanga, ”Nako ma Jou woigo, ngomi aha miwango de miadiai nënanga ekola gënanga.”

¹⁶Mä oraha nënanga ngini nia hininga ikurutil̄e deʼ nitemo madiaiua. O demo madiaiua mata-mata hoko gënanga ihowono.

¹⁷Hababu gënanga, o nyawa ihi öriki okia maoa-oa kiani yadiai, mä yadiaiua, o nyawa gënanga yobaradoha.