Read Tobelo O YAKOBUS 5 Bible Online

O YAKOBUS 5 - Tobelo bible

O YAKOBUS 5

¹O Roriadodoto, o kaya manyawa! Nihigihe-gihene tongohi ahi hitiari. Kiani ngini niari deʼ nidodora karana ngini aha nia tagongo o hangihara!

² Nia kaya imelaka. Nia pakeanga yaol̄omoko o buteteke.

³Nia gurasi deʼ nia haäka yatamunoka o pariama; mapariama aha idadi hakihi ini lawani ngini deʼ aha yaol̄omo nia röehe yamata hokä o uku. Ngini nia toporonoka o arata maöraha yododagika o wange mabobaha.

⁴ Ngini nifangua manga hewa, o nyawa yomomanarama nia dumuleoka. Oraha nënanga ni ihene to önanga manga liwolu! O nyawa yatotoomu nia dumule mahasili, yopöa-pöaka yogahoko o roriwo deʼ to önanga manga boaka yadonoka ma Jou Madutu ai ngaukil̄e, ma Jou woko Kuaha.

⁵Ngini niwango mata-mata de ma ënanga, deʼ nia mäoka masanangi o duniaka nënanga. Ngini matero-tero magogiria nia diri nihiburere mangale ma wange o aiwani yotoaka.

⁶Ngini nia hukumu deʼ nia toma o nyawa yahowo-howonua, deʼ onanga ini lawanua ngini.

⁷Hababu gënanga, Roriadodoto nisabari hiädono ma Jou woböa. Nio lega womatëngo wototumule sarakia ai sabari wodamä hiädono ai tonaka ihi döaka mahasili mabobaraguna unangika. De ai sabari ünanga wodamä o awana maöraha itiha deʼ o awana maöraha ihuri.

⁸Kiani nginiö nisabari deʼ nia hininga ilamoko, hababu ma Jou ai wange woböa itigioka.

⁹Uha nitaiana deʼ nima hikohowono, laʼ ngini ma Jou Madutu wini hukumua. Nio hininga! Mahakimi wotigioka, sadia mangale woböa.

¹⁰Roriadodoto, nio hininga o nabi-nabi yotemoka de ma Jou ai romanga. Onanga yosabari deʼ yotongohono yatagongo o hangihara. Hoʼ, nia l̄ë önanga hokä madulada.

¹¹ Onanga yahetongo youtumu hababu önanga yotongohono. Ngini ni ihenoka mangale o Ayub ai sabari, deʼ ngini nihi öriki sarakia mabobahaka ma Jou wihi barakati ünanga. Hababu ma Jou duru wototodora deʼ Ai hininga yaoa.

¹² Duru mal̄okuoka, enagënanga: Uha nikoboto, yaoa de o dihanga, yaoa de o dunia, ekola de okia dika. Nitemo dika ”I goungu” nako nia dungutu igoungu, deʼ ”Kowali” nako nia dungutu kowali; laʼ ma Jou Madutu ai hukumanga uha inido otaka nginiuku.

¹³Nako naga nia hidogoronaka magogiria yohuha, kiani ünanga womaniata. Nako naga yomore-morene, kiani ünanga wonyanyi wipuji ma Jou Madutu.

¹⁴ Nako naga yopanyake, kiani ünanga wa ahoko o jemaat matutuda-tutuda. Deʼ o tutuda-tutuda gënanga kiani yaniata o nyawa yopopanyake gënanga deʼ yahinauhu o minya de ma Jou ai romanga.

¹⁵Nako toönanga manga niata hiädono de yagou-goungu ma Jou aha wahitogumu o nyawa yopopanyake gënanga, deʼ wahi apongo manga baradoha yadododiai.

¹⁶Hababu gënanga, kiani ngini nimateke mangaku nia howono deʼ nima kiniata, laʼ ngini inihi togumu. O nyawa manga niata imamoteke ma Jou Madutu ai mau, to ënanga makuaha ilamoko.

¹⁷ O Elia homahi koka nyawa hokä ngone. Unanga womaniata de magou-goungu laʼ o awana uha iuti, o awanö iutiua o taongo hange de mahononga madekana.

¹⁸ Ipaha ünanga womaniatoli, daha o dihanga ihi guti o awana hiädono o tonaka ihi döakoli mahasili.

¹⁹Ahi roriadodoto! Nako nia hidogoronaka naga a momoi o nyawa yanïkoka uaoli ma Jou Madutuino ai dodötoko, daha womatëngo mahomoa widiai o nyawa gënanga woma iduli ma Jou Madutuika,

²⁰ nio hininga o ayat nënanga: O nyawa yadiai o nyawa yobobaradoha ima idulu manga ngëkomo ihowo-howonino, o nyawa gënanga wahihalamatoka o nyawa yobo baradoha manga jiwa gënanga o honengino deʼ idadi hababu o baradoha mangöe ihi apongo. Tongomi mia horomati, o Yakobus