Read Tobelo O PETRUS MADODIHIRAKA 1 Bible Online

O PETRUS MADODIHIRAKA 1 - Tobelo bible

O PETRUS MADODIHIRAKA 1

¹O Roriadodoto ma Jou Madutu ai umati womä ngiri-ngirikoka, naga nimahi kokabarihika niö dagi-dagi o Pontus, o Galatia, o Kapadokia, o Asia deʼ o Bitinia madaeraka! Ngohi o Petrus, o Yesus Kristus ai rasul, tonganono tanu ma Jou Madutu winihidöaka o barakati deʼ o lolä nginika de maboboloi. Ngini inï iriki nidadi ma Jou Madutu ai umati ima däene de ma Jou Madutu o Ama ai datoro. Deʼ ma Jou Madutu ai Womaha inihi dadioka ngini o umati itebi-tebini, maboboloi mangale ma Jou Madutu, hupaya ngini nihi ngounu o Yesus Kristusika deʼ inï tebini de Ai awunu.

³Niaino ngone hosukur ma Jou Madutuika, nanga Jou Yesus Kristus ai Ama! Una duruhë wonä dora ngone, mahababu gënanga Unanga wonahidöaka o wowango mahungi ngoneino, de wihiwango okali o Yesus Kristus o honenge mahi dogoronaka. Nënanga inahi döaka ngoneino o ngonganono ibitu-bitumu.

⁴Ngone hönganono la hal̄ë idadi tongone hagala o barakati ma Jou Madutu wasö sadiaka Ai umatika, enagënanga hagala o barakati igögogono o horogaka, hiädono yakunua ibodito, ekola idadi imëla ekola iaiki.

⁵Mata-mata gënanga mangale ngini, karana ngini ningaku ma Jou Madutuika. Ho ngini inï göana de ma Jou Madutu ai kuaha hupaya ngini nia tarima o halamati yasosadia damä ihi nyata o öraha mabobahaka.

⁶Karana gënanga kokiani ngini nia hininga imörene, ngarokö öraha nanga maöraha madodipoko ngini kokiani nia hininga i huha karana ngini nia öhana i rupa-rupa o cocoba.

⁷Madumutu enagangala ihi nyata igoungu boteka ngini igou-goungu niwi ngaku ma Jouika ekola kowali. O gurasi naga yakunu kai bodito, yataili de o uku. Aa, tingini nia ngongaku iholoi naga iragane de o gurasi, hoʼ kokiani yatailoli hupaya idadi ibitumu. Deʼ de hoko gënanga ngini aha inï higiriri deʼ inï horomati inoli inï tedeil̄e o Yesus Kristus ai böa ma wangeoka.

⁸Ngini niwïdora, ngarokö mahiraino ngini niwi mäkeua. Deʼ ngini niwingaku Unangika ngarokö öraha nënanga ngini niwi mäkeua. Mahababu gënanga ngini nimörene, deʼ nia mäo o mörene imomulia deʼ hohidemo hakunua.

⁹Hababu nia ngongaku madumutu namäkeoka, enagënanga nia jiwa mahalamati.

¹⁰O halamati nënanga doka ganga o nabi-nabi yatailako deʼ yatailako ihidodiai, deʼ onanga yamäke owahi ihi ngahuoka mangale o barakati ma Jou Madutu wohi döa-döaka nginika.

¹¹Onanga yatailako ihidodiai sarakia deʼ muruonoka o hali gënanga aha idadi, ganga o Kristus ai Womaha madungutu naga manga diri magoronaka. O öraha gënanga ai Womaha kadema hirahi de hingahuoka onangika mangale hagala o huha de o hangihara ganga kokiani o Kristus waohana deʼ mangale Ai mulia aha iwi hiduru ipahaika de gënanga.

¹²O nabi-nabiika gënanga ma Jou Madutu wahi ngahuokia önanga yodiai koigoungua mangale önanga imahi akunu, duga-duga mangale ngini; enagënanga hagala o hali öraha nënanga ngini ni ihene de madodiai o Abari ma Oa ihingö ngahu-ngahuino mangale o Yesus Kristus. Onanga ihi ngahu hagala o hali gënanga nginika de ma Jou Madutu ai Womaha makuaha ihi dingo-dingoto o horogaino. Igoungu hagala o malaekat mayö nahihuoli ihi öriki o abari önanga ihingö ngahu-ngahu gënanga.

¹³Hababu gënanga, kokiani ngini nimä böbötoka. Nimahi dodiai nimä göana deʼ nio nganono iomanga o barakatika aha inihidöaka nginika maöraha o Yesus Kristus dahaö woböa.

¹⁴Niwihi ngounu ma Jou Madutuika, deʼ uha niwango nia moteke nia nahihu ihira-hira, maöraha ngini niwi nako uwahi ma Jou Madutu.

¹⁵I idulu yaino, kokiani ngini nitebini hagala moi-moi magoronaka naga ngini nia dodiai, imatero hokä ma Jou Madutu winï aho-ahoko ngini gënanga wotebini.

¹⁶ Ma Jou Ai Demo ma Buku magoronaka i tulihi, ”Kokiani ngini nitebini, hababu Ngohi totebini.”

¹⁷Ngini niwi hëtongo ma Jou Madutu gënanga o Ama maöraha ngini nimä niata Unangika. Aa, ma Jou Madutu gënanga wahihakimi o nyawa imadäene de moi-moi manga manarama de woiri-irikua o nyawa. Hababu gënanga madëkana de magurutu ngini kanagahi o duniaka nënanga, kokiani ngini niwi himulia ma Jou Madutu nia wowango magoronaka.

¹⁸Ngini nihi öriki okia ihi fanguoka mangale inï lapahi ngini de o wowango ipöparahaja ini hipuhakäka nia ete de nia tohora. Mabobangu koigoungua okianaga moi ibobodito hokä o haäka ekola o gurasi,

¹⁹duga-duga okia naga moi duruhë dema ijaka; enagënanga o Kristus ai diri mahirete, womadadi hokä o duba ihi huba-huba ma Jou Madutuika koiwa manabo ekola itorou.

²⁰Ma Jou Madutu wï iriki o Kristus ihira de o dunia nënanga ihi dadi. Deʼ ma wange yododagika o öraha o dunia mabobaha, Unanga woböa o duniaino hupaya ngini wini hihalamati.

²¹Madodagi de Unanga ngini niwi ngaku ma Jou Madutuika wihi wango okali o honenge mahi goronaka deʼ wihimulia. Hoʼ ma Jou Madutu ngini niwi ngaku deʼ ma Jou Madutu ikaoli ngini nima hinganono.

²²Karana ngini nihingounu o dodotokika ma Jou Madutuino, hongini nia tebini nia diri deʼ ngini niä dora hagala o nyawa o ngongaku moi de nia hininga itebini. Hababu gënanga, kokiani ngini nima kodora moi de moi de nia hininga iomanga-omanga.

²³Hababu madodagi de ma Jou Madutu ai demo iwö wango-wango deʼ i kokakali gënanga, ngini inihi dadioka o nyawa mahungi ko o nyawaua inihi ngohaka, duga-duga o Ama wokokakalino.

²⁴ Ma Jou Ai Demo ma Buku magoronaka itulihi hoko nënanga, ”Mata-mataika o umati hokä o momo, deʼ hagala mahoromati hokä o momo mahuri. O momo imaai, mahuri ma irero;

²⁵mä ma Jou ai demo kahi ado-adonika ikakali.” O demo gënanga o Abari ma Oa i hi ngahu-ngahuoka nginika.