Read Tobelo O PETRUS MADODIHIRAKA 4 Bible Online

O PETRUS MADODIHIRAKA 4 - Tobelo bible

O PETRUS MADODIHIRAKA 4

¹Karana o Kristus watagongoka o huha de o hangihara cara o röehe, nginiö, kokiani nia diri nia kuata de o jako hokä hoko gënanga. Hababu o nyawa yatago-tagongo o huha de o hangihara cara o röehe, yodiaiokaua o baradoha.

²Hababu gënanga, kokiani ngini niwango nënanga de hikaika o duniaka nënanga, imoteke ma Jou Madutu ai mau, deʼ koimotekua o nyawa manahihu.

³O öraha ipö paha-paha, ngini yaoaka madëkana nidiai okia naga yöigo-igo yadodiai o nyawa iwi näko-näkoua ma Jou. Ngini niwango itorou. Ngini nia moteke nia nahihu, inï dalu-daluku kani rame-rame, kani oke-okere deʼ o gomanga nia huba de macara ha emo-emono.

⁴Oraha nënanga o nyawa iwi näko-näkoua ma Jou, yohëranga ngini nia motekua o wowango hokä önanga, yajame o baradoha mabatingi koiwa. Mahababu gënanga önanga ini hikauku ngini.

⁵Mä onanga kokiani daha ihi döaka o bobaluhu ma Jou Madutuika woma sosadiaka la wahidero o adili o nyawa kayo wango-wangohi ika deʼ yohone-honengokaika.

⁶Mahababu gënanga o Abari ma Oa ihi ngahuö o nyawa yohone-honengika. Madungutu hupaya önanga, yahi dero-deroka o adili cara o röehe — hokä mahali o nyawa mata-mata aha yahi dero o adili — yamäke o ngango cara rohani, imoteke ma Jou Madutu ai mau.

⁷Hagala moi-moi i tigioka mabobahaika, hababu gënanga kokiani ngini nia diri nia kuaha deʼ nihi dodiai nimä göana, hupaya ngini yakunu nimä niata.

⁸ Iholoi de hagala mata-mata, kokiani ngini igou-goungu nimä kodora moi de moi, hababu de nimä kodora ngini aha nio modekoli nima hika apongo.

⁹Kokiani ngini nimateke tarima moi de moi nia tauoka moi-moi, de nitaianua.

¹⁰Ngini moi-moi nia tarimaka o ngongike-ngongike ima kokohowono ma Jou Madutuino. Hababu gënanga hokä ihidödailako maoa ma Jou Madutu ai ngongike-ngongikeino, kokiani ngini nia päke o dagakunu gënanga mangale nia paralu kamamoi nima mata-mata.

¹¹O nyawa ihi ado-adono o abari kokiani ihi ädono o abari ma Jou Madutuino; o nyawa yälöleleani o nyawa mahomoa, kokiani yoleleani de o kuata ma Jou Madutuino, hupaya hagala o hali magoronaka, ma Jou Madutu yakunu iwi himulia de madodagi o Yesus Kristus. Unanga dika wokokuaha deʼ ipatutu iwi himulia kahi ado-adonika. Amin.

¹²O Roriadodoto tinï hohininga! Oraha nënanga ngini duru konia hangihara karana inï uji magogiria. Mä uha nia mäo nihëranga, hokä naga okia naga moi kabiahaua idadi nginika.

¹³Kaidogo, kokiani ngini nia mäo nisanangi karana nia tagongo o huha de o hangihara kamamoi nima komoteke de o Kristus. Hodamä nako o Kristus ai mulia ihi matoko, ngini aha nimörene.

¹⁴Ngini niutumu nako ngini inï hikauku hababu ngini o Kristus niwinö ninïki. Gënanga mamangarati o Womaha imomulia, enagënanga ma Jou Madutu ai Womaha naga nginioka.

¹⁵Ngini nia hidogoronaka kamoiö de uha yatagongo o huha de o hangihara karana ünanga wotoma ekola wotohiki, ekola o nyawa madorou, ekola karana ünanga wosapuru o nyawa mahomoa manga hali.

¹⁶Mä nako ngini ini hihuha de nihangihara hababu ngini o Haranioka manyawa, uha ini mal̄eke karana o hali gënanga. Nitarima kasi ma Jou Madutuika ngini niao o Kristus ai romanga.

¹⁷I yadonoka maöraha o dunia nënanga ma Jou Madutu wohidero o adili. Deʼ ma Jou Madutu ai umati mahirete aha yatihira yahidero o adili. Aa, nako ma Jou Madutu aha wonätihira ngone, sarakia done aha idadi de o nyawa yongaku-ngakua o Abari ma Oaika ma Jou Madutuino gënanga?

¹⁸ Ma Jou Ai Demo ma Buku magoronaka yatulihi hoko nënanga, ”Nako o nyawa maoa mai huhaka yahihalamati, okia hongoli aha idadi de o nyawa yoböbaradoha iwi näko-näkoua ma Jou!”

¹⁹Hababu gënanga, nako naga o nyawa yohuha de yohangihara karana ma Jou Madutu womau hoko gënanga, kokiani o nyawa geönanga yowango de madiai deʼ manga diri ihi döaka wahi Dädadika. Unanga aha hoko genangika waganapu Ai jaji.