Read Tobelo O PETRUS MADODIHIRAKA 5 Bible Online

O PETRUS MADODIHIRAKA 5 - Tobelo bible

O PETRUS MADODIHIRAKA 5

¹Ngohi togahoko niä tötailako nia jemaat matutuda. Ngohi totulihi nënanga hokä o tutuda manga dodiawo deʼ hokä o nyawa yahöhakihioka mahirete o Kristus Ai huha de ai hangihara, deʼ aha tomotekö ihihimulia, maöraha okia o Kristus ai mulia ihi matoko o nyawaika. Ngohi togahoko de magiria

² hupaya ngini niogöana o duba matika ma Jou Madutu winihi döa-döaka nginika. Niä göana önanga de nia hininga i sosanangi hokä sarakia ma Jou Madutu wöigo-igo, deʼ uha de nia hininga madubuho. Uhali nia diai nia manarama mafaidä nia mäke o utumu, duga-duga karana igou-goungu ngini nioigo nileleani.

³Inihi gogogöana nginika, uha nimadiai onangika hokä yokokuaha, makiani nidadi o dulada onangika.

⁴Deʼ maöraha o Gogöana womo Mulia gënanga damä woböa ngini aha niatarima o makota ileto-letongo, aha koi hihangua maletongo.

⁵ Hoko genangö Riadodoto ngini o gikiri magögö. Nia moteke o balu-baluhu manga pareta. Riadodoto mata-mata kokiani nia diri nihitipokouku deʼ nimä teke leleani deʼ nia hininga itotipoko uku. Hababu Ma Jou Ai Demo ma Buku magoronaka yatulihi hoko nënanga, ”Ma Jou Madutu wälawani o nyawa manga hininga ikökurutil̄e, mä wädora o nyawa manga hininga itotipokouku.”

⁶ Hababu gënanga, nia diri nihitipokouku ma Jou Madutu ai giama ikökua-kuata matimiuku, hupaya nako maorahoka Unanga winihi kurutil̄e ngini.

⁷Nihilapahi hagala nia hawatere ma Jou Madutuika, hababu Unanga winïhaduli.

⁸Kokiani ngini nimahi dodiai nimä göana deʼ nimä böbötoka! Hababu o Ibilihi ganga nia haturü. Enanga hokä o singa imädagi yakaika yakaino de ipöa-pöaka imä lingiri mainomo.

⁹Enanga nia lawani de nia ngongaku ibitu-bitumu, hababu ngini nihi öriki o roriadodoto mahomoa homateke ho Harani o dunia mata-mataikaö yohuha de yohangihara hokä ngini.

¹⁰Mä de iböto nia mäo o huha de o hangihara ihi jai-jai, ma Jou Madutu mahirete aha winïdiai ngini idadi nitotomo. Unanga aha winihigoko deʼ winihikuata ngini de inoli winïbitumu ngini. Hababu Unanga ganga ma Jou Madutu duruhë Ai hininga yaoa, winï ahokoka la nia mäo Ai mulia ikokakali madodagi de o Kristus.

¹¹Unanga wokokuaha kahi ado-adonika! Amin.

¹² Tongohi ahi hurata madodipoko nënanga ngohi totulihi nginika de o Silas ai roriwo, naga ngohi tïpulono o riadodoto o Haranioka womatëngo wososetia. Ngohi töigo tinihi döaka o hititila nginika deʼ ngini tinihi nako igoungu okia naga ngohi totulihi nënanga o abari madiai yakorona ma Jou Madutu ai hayanga de Ai dora. Kokiani ngini nimahi jojö ikëkete o hayanga de o doraika gënanga.

¹³ Ahi dodiawo o jemaat moi o Babilon madaeraoka, ma Jou Madutu wäirikoli, ihi dingoto manga tabea nginika; hoko genangö o Markus ahingohaka tihohininga.

¹⁴Nimateke tabea moi de moi de nia dora ioma-omanga hokä riadodoto o Haranioka. Tanu ma Jou winihi döaka o lolä nginika Riadodoto mata-mata nidadi madutu o Kristus. Tongomi mia horomati, o Petrus