Read Tobelo O PETRUS MAHINOTOKA 1 Bible Online

O PETRUS MAHINOTOKA 1 - Tobelo bible

O PETRUS MAHINOTOKA 1

¹O Roriadodoto igö gou-goungu ningaku hokä ngomi! O Yesus Kristus, enagënanga ma Jou Madutu deʼ nanga Koano Wohihohalamati, wonahigumal̄a ngone hingaku Unangika, karana Unanga o diai wadodiai. O hurata nënanga o Simon Petrusoka, o gilaongo womatëngo deʼ o Yesus Kristus ai rasul.

²Tanu ma Jou Madutu winihi döaka o barakati deʼ o lolä nginika de maboboloioka, hababu ngini niwinako ma Jou Madutu deʼ o Yesus, tongone nanga Jou.

³Ma Jou Madutu wapäkeoka o gikiri moi makuaha la wonahi döaka ngoneino hagala moi-moi okia naga hopöparalu mangale howango de hopuji. Unanga wadiai nënanga de madodagi okianaga ngone hohi öriki mangale o Yesus Kristus wonä ahokoka ngone la hamäo Ai mulia deʼ Ai oa.

⁴De madodagi hoko gënanga ma Jou Madutu wonahi döaka ngoneino hagala o barakati kabiahaua deʼ iröroragane naga wonahijö jäjajioka. De hagala o barakati gënanga ngini yakunu nilapahi de o nahihu itotorou yakö kokilianga o dunia nënanga, deʼ ngini nia tarima o gikiri moi mabiaha.

⁵Ma hababu gënanga nihidailako nia gou-goungu hupaya ngini i tatapu niwingaku o Kristusika deʼ nia ngongaku gënanga ihi tiki de o wowango maoa-oa. Madatekoka o wowango maoa-oa, ngini iparalu nidadi o nyawa yososawaro,

⁶o sawaro ma datekoka, kokiani nginiö yakunu nia diri nia kuaha. Deʼ ma homoahi yakunu nia diri nia kuaha kokiani ngini nihibiaha nia diri la nitongohono nio himanga hagala moi-moi okia naga. Nitongohono madatekoka nio himanga hagala moi-moi, ngini kokianiö niwango nia moteke ma Jou Madutu ai mau.

⁷Deʼ niwango imoteke ma Jou Madutu ai mau kokianiö nihi totomo de o dora de o hayanga o roriadodotika o ngongaku moi. Ikali kokiani niä dora de niä hayanga nia roriadodotika o ngongaku moi nihidogo de o dora o nyawa mata-mataika.

⁸Mata-mata gënanga o biaha-o biaha ngini nipöparalu. Nako hagala o biaha gënanga naga nginioka de maboboloioka, ngini aha idadi inï magawe deʼ nihasili deʼ niwinako o Yesus Kristus tongone nanga Jou iholoioli yaoa.

⁹Mä o nyawa koiwa-iwa manga biaha-biaha gënanga, manga lolega itehehoto; önanga yakunua yamäke deʼ onanga yawöhanga hagala manga baradoha ipöpaha-paha yatebinoka.

¹⁰Hababu gënanga o Roriadodoto nimahidailako iholoi ikiria hupaya ma Jou Madutu ai gogahoko deʼ Ai ngongiriki nia dirika gënanga idadi iholoi ibitumu. Nako ngini niadiai gënanga, ngini aha nia umoua nia agama.

¹¹De hoko gënanga ngini aha inihidöaka o haku iomanga la niwohama o Popareta ikokakali ma Jouino de nanga Koano Wohihohalamati o Yesus Kristus.

¹²Hababu gënanga, ngohi hoko genangika tinihidöaka o hohininga mangale o hali ihöheto-hetongo, ngarokö ngini nihiorikoka deʼ duru nia ngaku o dodötoko ma Jou Madutuino naga ngini nia tarimaoka gënanga.

¹³Madëkana de magurutu ngohi kato wangohi, ngohi tamäo kokiani tinihidöaka ngini o hohininga o hali ihö heto-hetongo.

¹⁴Hababu ngohi tohi öriki itedekanokaua ngohi aha tamal̄a o dunia nënanga, karana tongone nanga Jou Yesus Kristus wohihi ngahuoka wohitotiaino ngohino.

¹⁵Ho ngohi aha tohidailako hupaya tohonenge ipahaika mä ngini hoko genangika nio hininga okali o hali-o hali nënanga.

¹⁶Maöraha ngomi minihingahu nginika hokokia mamulia tongone nanga Jou Yesus Kristus ai böa, ngomi mima higagaoua o totowadeika o nyawa yodödodiai. O Kristus ai mulia gënanga ngomi mia mäkeoka de mia lako mahirete.

¹⁷ Ngomi naga dokengoka maöraha o Ama ma Jou Madutu wihoromati deʼ wihimulia Unanga. O öraha gënanga mi ihene o ilingi Naga Duru womomuliaoka, wotemo Unangika, ”Nënanga Ahi Ngohaka tïdora-dora. Unanga Ahi hininga wadäene!”

¹⁸Ngomi mahirete mi ihene o ilingi gënanga i böa o horogaino maöraha ngomi naga dede Unanga o l̄oku i tebi-tebini gënanga mal̄okuoka.

¹⁹Mahababu gënanga ngomi iholoi mihi goungoli ma Jou Madutu ai behehongo naga ihi o abari hagala o nabi. Kayaoa de ngini nio hohininga o behehongo gënanga, hababu o behehongo gënanga hokä o hilo naga yatararono o ngï mahohuhutu hiädono danengino ibatingi, deʼ o koruku o wange mahiwaroko madararono yatararono nia hininga magoronaka.

²⁰Duru mal̄okuoka kokiani ngini nio hininga nënanga: Ma Jou Madutu ai behehongo naga ihi o ado-adono o nabi-nabi yakunua nihiguti to ëna mamangarati imoteke nia damäke mahirete.

²¹Hababu, komaiwa o behehongo ma Jou Madutuino ihi abari duga-duga de o nyawa manga mau. Mä ma Jou Madutu ai Womaha yäkuaha o nyawa la ihi ädono o behehongo ma Jou Madutuino mahirete.