Read Tobelo O PETRUS MAHINOTOKA 3 Bible Online

O PETRUS MAHINOTOKA 3 - Tobelo bible

O PETRUS MAHINOTOKA 3

¹Ahi Roriadodoto tinï hohininga! Nënanga tongohi ahi hurata mahinotoka nginika. O hurata hinoto nënanga magoronaka ngohi tohidailako tamomiki o dibanga itebi-tebini nginioka.

²Ngohi tinihigaro hupaya ngini nio hininga o demo-demo mahira ma Jou Madutu ai nabi-nabi ihidö demo-demo, deʼ o pareta ma Jouino, ma Koano Wohihohalamati, naga ihi ädono nginika de madodagi o rasul-rasul.

³ Madodihiraka, ngini kokiani nihiöriki ma wange mabö bobahaka, aha yoböa o nyawa manga wowango yäkokuaha to önanga manga nahihu mahirete. Onanga aha inï hohedu ngini,

⁴deʼ yotemo hoko nënanga, ”Mademo ma Jou wojaji aha woböa! Oraha nënanga ünanga kiaka? O balu-baluhu nanga ete de nanga tohora yohonengoka mä hagala mata-mata kaima keterohi dika, hokä madero o dunia nënanga idadi!”

⁵ Onanga yohangaja yoluku yongaku kahuruonino ma Jou Madutu wohidadi o dihanga deʼ o dunia de to una Ai demo. O dunia ihi dadi o akerino, deʼ de o akere;

⁶ deʼ de o akerö — enagënanga o nguihi ma amokino — o dunia mahiraino gënanga yabinaha.

⁷Mä o dihanga deʼ o dunia naga o öraha nënanga, yapaliara de ma Jou Madutuoli ai demo gënanga la dahaö yabinaha de o uku. Oraha nënanga o dihanga deʼ o dunia yapaliaraohi hiädono mawange hagala o nyawa madorou yähukumu deʼ yäbinaha.

⁸ Mä ahi roriadodoto, o hali moi nënanga ngini uha nia wohanga ma Jou ai lolega magoronaka, o wange moi kaima tero de o taongo o ribuhu moi — Unangika hinotö kaima tero dika.

⁹Ma Jou wotananaua wohi döaka okia wohijä jajioka ngarokö naga yatakihiri hoko gënanga. I idulu yaino, Unanga wosabari nginika, hababu kao nyawa moio de Unanga woluku yobinaha. Unanga wöigo hupaya o nyawa mata-mata yotoba o baradoha yodiai okaua.

¹⁰ Mä ma Jou ai böa ma Wange aha iböa hokä yotohi-tohiki. O Wange gënanga, o dihanga ihihanga de ma ilingi iruruhu, deʼ hagala okia naga o dihangoka aha yöuku, de o dunia de hagala okia naga ma goronaka aha ihihanga.

¹¹Karana mata-mata gënanga aha yawedere de madodagi hoko gënanga, kokiani sarakia ngini niwango? Ngini kokiani niwango itebini maboboloi mangale ma Jou Madutu,

¹²madëkana de magurutu ngini niododamä deʼ nionahihu de nionganono iböa ma Jou Madutu ai Wange. O Wange gënanga o dihanga mata-mataka yöuku, deʼ karana mahauku, ho okia naga o dihangoka aha iwaro.

¹³ Mä ngone hödodamä okia ma Jou Madutu wonahijö jäjajioka, enagënanga o dihanga mahungi deʼ o dunia mahungi, kiaka genangoka yamäke o adili.

¹⁴Hababu gënanga, o Roriadodoto tinï hohininga magogiriaka ngini niododamä ma Wange gënanga, nimahi dailako nia gou-goungu la niwango itebini deʼ koiwa mahowono ma Jou Madutu ai himangoka. Deʼ nia paliara nia rimoi yaoa-oa de ma Jou Madutu.

¹⁵Niapulono nanga Jou ai sabari hokä o ngëkomo moi inihi döaka nginika hupaya yakunu nihalamati. O Paulus nanga riadodoto hïhohininga, wotulihoka kahoko genangoli nginika. Unanga wotulihi gënanga de o sawaro ma Jou Madutu wihi döa-döaka unangika.

¹⁶Ai hurata mata-mata magoronaka, o Paulus salalu wotulihi o hali gënanga. Itiai naga o hali muruono naga ihuha homangarati ai hura-hurata gënanga magoronaka. Deʼ o nyawa okia-kiaua ihi öriki de manga ngongaku ibitumua o hidoku gënanga yaidulu. O hali gënanga hoherangua, karana Ma Jou Ai Demo ma Buku mahidoku mahomoa önanga yadiaioli hoko gënanga. Okia önanga naga yadiai gënanga duga-duga mabaha kato ona mahirete manga bodito.

¹⁷Mä ngini, o Roriadodoto tinï hohininga, nihi orikoka mangale o hali gënanga. Hababu gënanga nimä göana nihidodiai, uha hiädono ngini nimahi mote-moteke o nyawa manga kalakuanga i totorou manga ngëkomo ihowo-howonika hi ädono o hidodoko i bobitu-bitumu mangïoka de ngini ini otaka.

¹⁸Kokiani ngini idogo-dogo nia mäo o Yesus Kristus ai hayanga de Ai dora, nanga Jou deʼ nanga Koano Wonahiho halamati, deʼ kokiani ngini o idogo-dogo niwinako Unanga. Unanga iwi higiriri, öraha nanga deʼ hiädono kahi ado-adonika! Amin. Tongomi mia horomati, o Petrus