Read Tobelo O YOHANIS MADODIHIRAKA 2 Bible Online

O YOHANIS MADODIHIRAKA 2 - Tobelo bible

O YOHANIS MADODIHIRAKA 2

¹Ahi ngoha-ngohaka! Ngohi totulihi nënanga nginika laʼ ngini uha nidiai o baradoha. Mä nako naga yodiai o baradoha, tongone nanga roriwo womatëngo, enagënanga o Yesus Kristus woadi-adili gënanga; Unanga aha wonä gahoko mangale ngone o Ama ai himangoka.

²De o dodohanga o Yesus Kristus gënanga tongone nanga baradoha iapongo. De kato ngoneua dika nanga baradoha, mä o nyawa ingodumu manga baradoha.

³Nako ngone hohingounu ma Jou Madutu ai pareta-paretaika gënanga manonako ngone hinako ma Jou Madutu.

⁴O nyawa yotemo, ”Ngohi tinako ma Jou Madutu,” mä ihi ngounua Ai pareta-paretaika, o nyawa gënanga yoelu-eluku, deʼ ma Jou Madutu koiwiwa manga hininga magoronaka.

⁵Mä o nyawa ihi ngounu ma Jou Madutu ai demoika, o nyawa gënanga iwi hininga ma Jou Madutu itototomo. Gënanga manonako ngone howango kamoi de ma Jou Madutu.

⁶O nagona honanga yotemo yorimoi de ma Jou Madutu, önanga kiani yowango yanïki o Kristus ai aguru mario.

⁷ Roriadodoto tini hohininga! Ngohi totulihi nënanga o pareta moi mahungiua. Nënanga o pareta madeka-dekanuku inihi adonoka nginika maöraha ngini nimuläenge niwingaku o Kristusika; enagënanga o abari ma Jou Madutuino, kowahiohi de ngini ni ihenoka.

⁸Ngaro hoko gënanga, o pareta ngohi tato tuli-tulihi nenangö mahungi; karana Ai diai yakunu hamäke o Kristus Ai dirioka deʼ tingini nia dirioka. Hababu o huhutu iholoi ihihanga deʼ o dararono madiai imulaengoka ihiwara.

⁹O nyawa yotemo önanga naga o dararono magoronaka mä o nyawa gënanga kayä dohatohi manga riadodotika, o nyawa gënanga kanagahi o huhutu magoronaka hiädono öraha nënanga.

¹⁰O nyawa yahininga manga riadodoto, yowango o dararono magoronaka hiädono kianaga moi ö koiwa onangoka aha idadi o hababu o nyawa mahomoa yootaka o baradoha magoronauku.

¹¹Mä o nyawa yadohata manga riadodoto, naga o huhutu magoronaka. Unanga wotagi o huhutu magoronaka, de wohi orikua kiaika ünanga wakaika, hababu o huhutu gënanga iwi diai ünanga womahi orikokaua.

¹²Ngohi totulihi nginika, Ngoha-ngohaka, hababu karana o Kristus nia baradoha iapongoka.

¹³Ngohi totulihi nginika, o Ama-ama, hababu ngini niwinako Unanga naga kama öraha mamulaengohi. Ngohi totulihi nginika, o nyawa o gögö, hababu ngini niwi hihangoka iwi to Torou.

¹⁴Ngohi totulihi nginika, Ngoha-ngohaka, hababu ngini niwinako ma Jou Madutu o Ama. Ngohi totulihi nginika, o Ama-ama, hababu ngini nianako o Demo nagaka kama öraha mamulaengohi. Ngohi totulihi nginika, o nyawa o gögö, hababu ngini nikuata. Ma Jou Madutu ai demo naga nia hininga magoronaka, deʼ ngini niwi hihangoka iwi to Torou.

¹⁵Uha niohininga o dunia nënanga, ekola okia dika naga o dunia magoronaka nënanga. Nako ngini niohininga o dunia, ngini niwihiningaua o Ama.

¹⁶Hagala moi-moi o dunia ma goronaka nënanga — o nyawa mabiaha ibobaradoha yononahihu, yamäke daha yonahihu de ihi amo-amoko — o hali-o hali mata-mata ganga ma ahali o Ama inoua, mä o duniaino.

¹⁷O dunia deʼ hagala moi-moi magoronaka yononahihu o nyawa, magogiria i hihanga. Mä o nyawa yamote-moteke ma Jou Madutu ai mau, tatapu yowango kahi ado-adonika.

¹⁸Ahi ngoha-ngohaka, öraha mabaha itigioka! Koiwahi ma tinihi ngahuoka nginika o Kristus ai haturu aha iböa; deʼ oraha nënanga ipudaka o nyawa manga ngöe iwi haturu o Kristus. Gënanga manonako o öraha mabaha itigioka.

¹⁹O Kristus ai haturu gënanga ganga hagala o nyawa ina mal̄a-mal̄aka ngone, karana igoungu de madiai, önanga tongoneua nanga nyawa. Nako önanga tongone nanga nyawa, marai önanga tatapu homakinïki dede ngone. Mä onanga ina mal̄a ngone, hupaya itararono o nyawa moiuaö onangino igou-goungu yodogo tongone nanga doomu.

²⁰Mä ngini nia tarimaka ma Jou Madutu ai Womaha wini dogopoaka o Yesus Kristus deʼ hababu gënanga ngini mata-mata nia nako o dodötoko madiai.

²¹Ho ngohi totulihi nënanga nginika igoungua karana ngini nia nakoua o dodötoko madiai, mä i holoi karana ngini nia nakoka, deʼ nginiö nihi öriki koiwa naga ieluku o dodötoko madiai magoronaka gënanga.

²²Yoelu-eluku ganga o nyawa yotemo o Yesus o Koano Wohihohalamatua wihijajioka ma Jou Madutu. O nyawa gënanga o Kristus ai Haturu; önanga iwihi goungua o Ama ekola o Ngohaka.

²³O nyawa iwihi goungua o Ngohaka, ma mangarati iwitarimaua o Ama ö. Deʼ o nyawa iwihi goungu o Ngohaka mamangarati iwitarima o Amaö.

²⁴Hababu gënanga, o abari ngini ni ihe-ihenoka maöraha ngini muläenge ningaku ngini kiani niogöana nihidodiai nia hininga magoronaka. Nako o abari gënanga ngini niohininga nihidodiai, ngini aha hoko genangika niwango nirimoi de o Ngohaka deʼ de o Ama.

²⁵Deʼ nenangala o Kristus mahirete wohijajioka ngoneino: o ngango madutu deʼ ikokakali.

²⁶Ngohi totulihi nënanga nginika ima korona hagala o nyawa manga gogiria ihi dailako initipu ngini.

²⁷Mä ima korona ngini mahirete, o Kristus wini dogopoaka ai Womaha nginika. Deʼ hokokia madekana o Womaha naga nginioka, iparaluua naga o nyawa mahomoa ini dotoko ngini. Hababu Ai Womaha ini dotoko ngini mangale hagala moi-moi; deʼ okia inidotoko gënanga itiai, ielukua. Hababu gënanga, ngini kiani nihi ngounu okia o Womaha ini dotokoka gënanga, deʼ ngini kiani tatapu niwango nirimoi de o Kristus.

²⁸Hoʼ, ahi ngoha-ngohaka, nitatapu niwango nirimoi de o Kristus, laʼ damä maöraha Unanga woböa, ngone hihimanga Unanga de hogogomangil̄e nanga barani, de kohoma ngiu-ngiunua karana inamal̄eke.

²⁹Ngini nihi örikoka o Kristus wowango imamoteke ma Jou Madutu ai mau. Hababu gënanga ngini kiani nihiorikoli o nyawa moi-moi yowango imamoteke ma Jou Madutu ai mau ganga ma Jou Madutu ai ngoha-ngohaka.