Read Tobelo O YOHANIS MADODIHIRAKA 3 Bible Online

O YOHANIS MADODIHIRAKA 3 - Tobelo bible

O YOHANIS MADODIHIRAKA 3

¹ Niolega hokokia ma Jou Madutu wonahininga ngone, hiädono wonahi goungu ngone hokä Ai ngoha-ngohaka. Deʼ igoungu ngone ganga ma Jou Madutu ai ngoha-ngohaka. Hababu gënanga o dunia itotorou nënanga inanakoua ngone, hababu o dunia iwi nakoua ma Jou Madutu.

²Roriadodoto tini hohininga! Ngone öraha nënanga ganga ma Jou Madutu ai ngoha-ngohaka, mä nanga rupa ngone damä itararonuahi. Mä ngone hohi öriki nako o Kristus woböa, ngone aha hodadi hokä Unanga, hababu ngone aha himäke Unanga Ai rupa magoronaka de madiai.

³Mata-mata o nyawa de manga nganono nënanga o Kristusika, yogöana manga diri laʼ igou-goungu yotebini, yo tebini o baradohaino hokä o Kristusö wotebini.

⁴O nyawa yodiai o baradoha, yatilakuru ma Jou Madutu ai tita; hababu o baradoha ganga yatotilakuru ma Jou ai tita.

⁵ Ngini nihiöriki o Kristus woböa mangale waehe o nyawa ma baradoha, deʼ koiwa naga o baradoha Ai diri magoronaka.

⁶Mata-mata o nyawa yowango yorimoi de o Kristus, kahoko genangikaua yodiai o baradoha. O nyawa kahoko genangika yodiai o baradoha, komaiwahi iwi mäke o Kristus ekola iwi nako.

⁷Ahi ngoha-ngohaka, uha nia higumal̄aika o nagonaö dika inihi rehene ngini. O nyawa yadodiai ma Jou Madutu ai mau ganga ma Jou Madutu ai ngoha-ngohaka hokä sarakia o Kristus ganga ma Jou Madutu ai Ngohaka.

⁸Mä o nyawa kahoko genangika yodiai o baradoha ganga o Ibilihi mangoha-ngohaka, hababu kaöraha mahirahi o Ibilihi ibaradoha. Mangale nënanga ma Jou Madutu ai Ngohaka woböa, enagënanga mangale wawedere o Ibilihi mamanarama.

⁹O nyawa yodadioka ma Jou Madutu ai Ngohaka, kahoko genangikaua yodiai o baradoha, hababu ma Jou Madutu mahirete Ai biaha naga onangoka. Deʼ karana ma Jou Madutu gënanga ai Ama, Unanga wakunua hoko genangika wodiai o baradoha.

¹⁰Mahi dogoronaka nenangala ima howono ma Jou Madutu ai ngoha-ngohaka de o Ibilihi mangoha-ngohaka: o nagona honanga yadiai ua ma Jou Madutu ai mau, ekola yahiningaua manga riadodoto, ünanga ma Jou Madutu ai ngohakua.

¹¹ Oraha kama dodihirakahi inihi adonoka o abari nënanga nginika: Ngone kiani homateke hininga moi de moika.

¹² Uha ngone hokä o Kain, wodadi o Ibilihi mangohaka deʼ witoma ai dodoto mahirete. Mahababu okia o Kain witoma ai dodoto? Hababu o hali-o hali wadodiai ganga ihowono, mä o hali-o hali wadodiai ai dodoto ganga itiai.

¹³Hababu gënanga, ahi Roriadodoto, uha nihëranga nako o dunia manyawa nënanga inï dohata ngini.

¹⁴ Ngone hohiöriki ngone hohupuoka o honengino, deʼ homatagalioka o ngangoika. Ngone hohiöriki gënanga, hababu ngone hahininga nanga riadodoto. O nyawa manga dora koiwa, mamangarati kayakuahahi o honenge.

¹⁵O nyawa yadohata manga riadodoto ganga yotoma-toma, deʼ ngini nihiöriki o nyawa imatëngo yotoma-toma koiwa to önanga manga ngango madutu deʼ ikakali.

¹⁶De mangëkomo nenangala ngone hohiöriki madodagi hahininga nanga dodiawo o nyawa: O Kristus womahilapahioka Ai ngango mangale ngone. Hababu gënanga, ngoneö kiani hohilapahi nanga ngango mangale tongone nanga roriadodoto!

¹⁷Nako o nyawa womatëngo ai kiahonanga de maenangoka, wamäke ai riadodoto manga kia-kiaua, mä woluku wariwo ai riadodoto gënanga, sarakia o nyawa gënanga yakunu wotemo ünanga wihininga ma Jou Madutu?

¹⁸Ahi ngoha-ngohaka! Uha ngone homateke hininga duga-duga kananga uruoka ekola duga-duga kananga demo dika. Kiani ngone homateke hininga de o dora madutu, hohimatoko de tongone nanga manarama.

¹⁹Hoko gënanga madodagi ngone hohiöriki iwohama ma Jou Madutu ai ngoha-ngohaka madiai, deʼ tongone nanga hininga yakunu irïdi ma Jou Madutu ai himangoka.

²⁰Ngone hohiöriki, nako nanga hininga inahihowono ngone, ma Jou Madutu iholoi ilamoko wohiöriki de tongone nanga hininga mahiöriki, deʼ Unanga wohiöriki hagala mata-mata.

²¹Hoʼ, ahi Roriadodoto tinihohininga, nako nanga hininga inahi howonua ngone, ngone hakunu hihimanga ma Jou Madutu de nanga baranioka.

²²Deʼ okia ngone hogahoko Unangino, ngone hamäke, karana ngone hohingounu Ai pareta-paretaika deʼ hadiai okia Ai hininga yadäene.

²³ Unanga wonahipareta ngoneino enagënanga: Ngone kiani hingaku ai Ngohakika enagënanga o Yesus Kristus, deʼ ngone kiani homateke hininga, hokä o Kristus wonahiparetaka ngoneino.

²⁴O nyawa mata-mata ihi ngou-ngounu ma Jou Madutu ai pareta-paretaika, yowango kamoi de ma Jou Madutu deʼ ma Jou Madutu kamoi de önanga. Deʼ ngone hohiöriki ma Jou Madutu wowango kamoi de ngone, karana Unanga wonahidöakoka ai Womaha ngoneino.