Read Tobelo O YOHANIS MADODIHIRAKA 4 Bible Online

O YOHANIS MADODIHIRAKA 4 - Tobelo bible

O YOHANIS MADODIHIRAKA 4

¹Roriadodoto tinihohininga! Uha nia ngaku o nyawa mata-mataika ima ngaku onangoka de ma Jou Madutu ai Womaha, mä niä uji ihira önanga mangale nihiöriki boteka o womaha naga onangoka gënanga ma ahali ma Jou Madutuino ekola kowali. Hababu o nabi madutua komanga ngöe ima hikabarihoka okiaika honanga.

²Hoko nënanga madodagi ngini nihiöriki bote gënanga ma Jou Madutu ai Womaha ekola kowali: O nyawa ihigoungu o Yesus Kristus woböa o duniaino hokä o nyawa, o nyawa gënanga manga Womaha ma Jou Madutuino iböa.

³Mä o nyawa ihigoungua o hali nënanga imakorona o Yesus, koiwa manga Womaha ma Jou Madutuino. O nyawa gënanga manga womaha o Kristus ai Haturuino. Riadodoto ni ihenoka o womaha gënanga aha iböa, deʼ oraha nënanga ënanga nagaka o dunia nënanga magoronaka.

⁴Mä ahi Ngoha-ngohaka, ngini toma Jou Madutu. Ngini nia hihangoka o nabi-nabi madutua, hababu o Womaha naga nginioka holoi ikuaha de o womaha naga o dunia manyawaka nënanga.

⁵O nabi-nabi madutua gënanga yotemo mangale o hali-o hali o dunia, deʼ o dunia ihi gihene toönanga manga demo, hababu önanga todunia.

⁶Mä ngone ganga ma Jou Madutu ai ngoha-ngohaka; deʼ o nyawa iwinako ma Jou Madutu, ihi gihene tongone nanga demo. O nyawa to Jou Madutua ihi gihenua tongone nanga demo. Hoko gënanga madodagi ngone hohiöriki imahowono o Womaha inahi döaka o dodötoko madiai, de o womaha inahi ro rehe-rehene.

⁷Roriadodoto tinihohininga! Niaino ngone homakodora moi de moi, hababu o dora gënanga ma ahali ma Jou Madutuino. O nyawa de manga doraka, ganga ma Jou Madutu ai ngohaka deʼ onanga iwi nako ma Jou Madutu.

⁸O nyawa koiwa manga dora, iwi nakoua ma Jou Madutu; hababu ma Jou Madutu ganga o dora.

⁹Ma Jou Madutu wohi matoko Unanga wonadora ngone de wihuloko ai Ngohaka womatëngo-tëngoka o duniauku laʼ ngone hamäke o ngango itilakuru Ai Ngohaka gënanga.

¹⁰Nënanga o dora: Ngoneua i hira hihininga ma Jou Madutu, mä ma Jou Madutu wonahininga ngone deʼ wihuloko ai Ngohaka laʼ i tilakuru Unanga hamäke tongone nanga baradoha ma apongo.

¹¹Roriadodoto tinihohininga, nako ma Jou Madutu hoko gënanga wonadora ngone, ngoneö kiani homakodora moi de moi.

¹² Komoiuahi naga o nyawa iwi mäkeoka ma Jou Madutu, mä nako ngone homa tekehininga, ma Jou Madutu worimoi de ngone deʼ Ai dora idadi itotomo tongone nanga diri magoronaka.

¹³Karana ma Jou Madutu wonahi doakoka Ai Womaha ngoneino, ngone hohiöriki howangoka kamoi de ma Jou Madutu, deʼ ma Jou Madutu wowango kamoi dede ngone.

¹⁴Ngomi mahirete miwimäkeoka ma Jou Madutu ai Ngohaka, deʼ ngomi mihiabari Unanga wihulokoka o Ama mangale wodadi o Koano Wohihohalamati o dunia nënanga.

¹⁵O nagona honanga ihigoungu o Yesus gënanga ma Jou Madutu ai Ngohaka, ma Jou Madutu wowango kamoi de o nyawa gënanga, deʼ o nyawa gënanga yowango kamoi de ma Jou Madutu.

¹⁶Ngone mahirete hohiöriki de hongaku ma Jou Madutu ai doraika ngoneino. Ma Jou Madutu gënanga o dora. O nyawa yowango yakuaha o dora, o nyawa gënanga yorimoi de ma Jou Madutu, deʼ ma Jou Madutu worimoi dede ünanga.

¹⁷O dora idadi ihitotomo nanga diri magoronaka, laʼ iyakunu de nanga baranioka o Juru Hakimi ma Wangeoka. Ngone aha de nanga baranioka, hababu tongone nanga ngango o duniaka nënanga kaimatero o Kristus ai ngango.

¹⁸O nyawa yatarimaka ma Jou Madutu ai dora yanakoua yamäo yohawana; hababu o dora madiai yahohihanga o mamäo ihö hawa-hawana. Hoʼ i nyata o nyawa yatarima uahi ma Jou Madutu ai dora de itototomo nako o nyawa gënanga yohawana yohimanga o Juru Hakimi ma Wange.

¹⁹Ngone homateke hininga, hababu ma Jou Madutu iholoi ihiraka wonahininga ngone.

²⁰Nako o nyawa womatëngo wato, ”Ngohi tihininga ma Jou Madutu,” mä unanga wadoraua ai riadodoto, o nyawa gënanga woëluku. Hababu o nyawa yahiningaua manga riadodoto yämäke-mäke, koiyakunua iwi hininga ma Jou Madutu iwi mäke-mäkeua.

²¹Hababu gënanga, o pareta nënanga o Kristus wonahidöaka ngoneino: O nagona honanga iwi hininga ma Jou Madutu kiani yahininga manga riadodoto ö.