Read Tobelo O YOHANIS MADODIHIRAKA 5 Bible Online

O YOHANIS MADODIHIRAKA 5 - Tobelo bible

O YOHANIS MADODIHIRAKA 5

¹O nyawa yongaku o Yesus ganga o Koano Wohihohalamati ma Jou Madutu wohi jäjajioka, o nyawa ganga ma Jou Madutu ai ngohaka. O nyawa iwi hininga womatëngo o ama, wihininga ai ngohakö.

²De mangëkomo nenangala ngone hohiöriki, ngone hahininga ma Jou Madutu ai ngoha-ngohaka: Ngone hihininga ma Jou Madutu deʼ hohingounu Ai pareta-paretaika.

³ Hababu hihininga ma Jou Madutu mamangarati hohingounu Ai pareta-paretaika. Deʼ Ai pareta-pareta itubuhoua mangale ngone,

⁴hababu ma Jou Madutu ai ngohaka moi-moi yakunu yahihanga o dunia itotorou nënanga. Deʼ ngone hahihanga dunia de tongone nanga ngongaku.

⁵O nagona yakunu yahihanga o dunia? Duga-duga o nyawa yongaku o Yesus ganga ma Jou Madutu ai Ngohaka.

⁶O Yesus Kristus woböa o duniauku de o gohiki madebi-debini ma akere deʼ Ai honenge ma awunu. Unanga woböaua duga-duga de o akere dika, mä de o akere deʼ o awunu. Deʼ ma Jou Madutu ai Womaha mahirete ihi döaka o hakihi gënanga itiai, hababu o Womaha komaiwahi ieluku.

⁷Naga o hakihi hange:

⁸Ma Jou Madutu ai Womaha, o akere deʼ o awunu — hangeö ihi döaka o hakihi kaimatero.

⁹Ngone hangaku o nyawa manga hakihi ika, mä ma Jou Madutu ai hakihi iholoi ikuatoli. Deʼ o hakihi gënanga ma Jou Madutu wohidoakoka mangale ai Ngohaka.

¹⁰Hababu gënanga, o nyawa yongaku ma Jou Madutu ai Ngohakika, yatarimaka o hakihi gënanga manga hininga magoronaka; mä o nyawa iwi ngakua ma Jou Madutu, iwi pulonoka matero-tero ma Jou Madutu woelu-eluku, hababu ünanga wongakua okia ma Jou Madutu wotemo mangale ai Ngohaka.

¹¹ Nenangala o hakihi gënanga: ma Jou Madutu wonahidoakoka ngoneino o ngango madutu deʼ ikakali, deʼ ai Ngohaka gënanga o ngango matiti.

¹²O nyawa toma Jou Madutu ai Ngohaka to önanga, o ngango gënanga to önanga; deʼ o nyawa to onangua ünanga, o ngango gënanga to onangua.

¹³Ngohi totulihi nginika niwi ngaku-ngaku ma Jou Madutu ai Ngohakika, laʼ ngini nihiöriki tingini de maenangoka nia ngango madutu deʼ ikakali.

¹⁴Deʼ ngone hobarani hihimanga ma Jou Madutu, karana ngone hongaku Unanga woihene tongone nanga niata, nako ngone hogahoko okia dika imadäene de Ai mau.

¹⁵Karana ngone hohiöriki Unanga wonagihene ngone, nako ngone homagahoko Unangika, mangoneö hohiöriki Unanga wonahidöaka okia ngone hogahoko Unangino.

¹⁶Nako ngini nia mäke o nyawa imatëngo nimahiteke ho Haranioka yodiai o baradoha mabahaka o nyawa gënanga yahihangua manga ngango madutu deʼ ikokakali, ngini kiani nia niata ma Jou Madutuika; deʼ ma Jou Madutu aha wahidöaka o ngango gënanga onangika. Nënanga imadäene de to önanga manga baradoha mabaha yahihangua to önanga manga ngango gënanga. Mä naga o baradoha mabaha yahihanga o nyawa gënanga manga ngango. Mangale o hali gënanga ngohi totemoua ngini kiani nima niata ma Jou Madutuika.

¹⁷Mata-mata o manarama ihohowo-howono ganga o baradoha, mä naga o baradoha koiwa mabahaka ihihanga o nyawa manga ngango ma dutu deʼ ikakali gënanga.

¹⁸Ngone hohiöriki o nyawa mata-mata yodadioka ma Jou Madutu ai ngoha-ngohaka, kahoko genangikaua yodiai o baradoha, hababu ma Jou Madutu ai Ngohaka wahohongino, de Iwi to Torou okia-kiaua yakunu idiai onangika.

¹⁹Ngone hohiöriki ngone toma Jou Madutu mahirete, ngaroka o dunia nënanga i Wi to Torou ai kuaha matimioka.

²⁰Ngone hohiöriki ma Jou Madutu ai Ngohaka woböaka deʼ wonahidoakoka o mangarati ngoneino, laʼ ngone hinako ma Jou Madutu wotiai. Ngone howango kamoi de ma Jou Madutu wototiai, deʼ howango kamoi de ai Ngohaka o Yesus Kristus. Nenangala ma Jou Madutu wotototiai, deʼ nenangala o ngango madutu deʼ ikakali.

²¹Ahi ngoha-ngohaka, nimahikurutika nia diri de o goma-gomanga!