Read Tobelo O HAKIM-HAKIM 10 Bible Online

O HAKIM-HAKIM 10 - Tobelo bible

O HAKIM-HAKIM 10

¹O Abimelekh wohonengoka, o Tola o Pua aingohaka, wodadi o tutuda mangale wahilapahi o Israeloka manyawa. Unanga ganga o Dodo ai donongo o Isakhar ai hoanino. Unanga wogogere o Samir mabereraka o Efraim madaera de mal̄oku-l̄okuoka.

²O taongo monoko de hange madekana ünanga watuda o Israeloka manyawa, ipaha ünanga wohonenge daha iwi lungunu o Samir mabereraka.

³O Tola ipaha, o Israeloka manga tutuda o Yair o taongo monaoko de hinoto madekana. O Yair ai ahali o Gileadino.

⁴Aingohaka o nauru naga yamoruange. Toönanga manga keledai yobö bare-barene o gahumu moruange de manga kapongo moruange o Gilead madaeraka. O kapo-kapongo gënanga yahetongohi o Yair ai kapo-kapongo.

⁵O Yairö wohonenge, de iwi jere o Kamon mabereraka.

⁶O Israel manyawa yobaradohali ma Jouika. Onanga iwi lega ikakaua ma Jou de iwi hubaokauaoli Unanga. Onanga yahuba o gomanga-gomanga Baal deʼ o Asytoret, ima nïki o Siria, o Sidon, o Moab, o Amon deʼ o Filistin manyawa manga gomanga.

⁷Karana gënanga ma Jou wangamo o Israel ma nyawaika, hiädono Unanga wa mal̄aika o Filistin manyawa de o Amon manyawa yakuaha önanga.

⁸O taongo ngimoi de tufange madekana o hoana hinoto gënanga yatukuku o Israeloka mata-mata yogö gogogere o Gilead madaeraka, enagënanga o Amori manyawa manga daera o Yordan ma Ngairi o wange mahiwaroko. ”Onanga yahidiai o Israel manyawa de koiwa mahayanga.

⁹O Amon manyawa yatobongo o Yordan ma Ngairi mangale yoiki yaparangi o Yehuda ai hoana, o Benyamin deʼ o Efraim hiädono o Israel manyawa duru yohangihara.

¹⁰Daha o Israeloka manyawa imahi boaka ma Jouika, yato, ”Ngomi mibaradohaka Ngonaika, karana ngomi mini legaikaka ua Ngona, yä, tongomi mia Jou Madutu. Ngomi mia huba o gomanga o Baal.”

¹¹Ma Jou wohaluhu, ”Mahira ngini ini paretauku o Mesir manyawa, o Amori, o Amon, o Filistin, o Sidon, o Amalek deʼ o Maon manyawa. Daha öraha gënanga ngini nimahi boaka nigahoko o roriwo Ngohino, koigoungua? Beika niohininga, boteka Ngohi tinihïhalamatua ngini toönanga manga kuahaino?

¹³Ngaroka hoko gënanga, nginiö kanihi poretohi Ngohi, daha nioiki niahuba o gomanga. O öraha nënanga Ngohi tolukokaoli tinihilapahi ngini.

¹⁴Nioiki dika o goma-gomangika ngini niaö iri-irikoka gënanga. Nimahi boaka onangika! Mal̄aika önanga ini riwo maöraha ngini o hukaranga magoronaka.”

¹⁵Mä o Israel manyawa yotemo ma Jouika, ”Ngomi mi baradohaka, Jou. Nadiai dika okia Ngona ani mau, iti Ngona nomï riwo ngomi o wange nënanga.”

¹⁶Ipaha önanga yaumo o gomanga madulada mata-mata, daha iwi huba ma Jou Madutu. Daha ma Jou Madutu Ai hininga yatora wä make önanga o hukaranga magoronaka.

¹⁷O öraha gënanga o Amon manga tentara magogiria imahi diai mangale yoparangi. ”Onanga ima tau o Gileadoka. O Israel ma nyawaö ima toomu inoka de ima tau o Gileadoka.

¹⁸Dokengoka o kawaha de manga tutuda-tutuda o Israeloka manga hoanino moi-moi gënanga ima keleha boteka naga toönanga manga hidogoronaka yobarani ima goraka o dae yalawana o Amon manyawa. O nyawa gënanga aha wodadi o tutuda o Gilead manyawa yongodumu.