Read Tobelo O HAKIM-HAKIM 11 Bible Online

O HAKIM-HAKIM 11 - Tobelo bible

O HAKIM-HAKIM 11

¹O Yefta ganga o tentara womatengo wokuata de wobarani. Unanga wogogere o Gileadoka. Ai ama ai romanga o Gilead mä ngoi ayo o nyawa momatengo o huhutu maninïki.

²Ai ama gënanga tounangö ai ngoha-ngohaka o nauru mahomoa ngoi hekata madutuino. Yokoki baluhoka o ngohaka gënanga, önanga iwi duhu o Yefta manga tauoka. Onanga yato unangika, ”Ngona aha okia-kiaua namake o puhaka mia amaino, hababu ngona o ngohaka o ngoheka mahomoaino.”

³Karana gënanga o Yefta woma tingaka ai roriadodotino daha woiki de wogogere o Tob madaeraka. Dokengoka o nyawa madorou o doomu moi imakodogo dede ünanga daha önanga yoiki yo ora.

⁴O öraha muruono naga ipaha o Amon manyawa yaparangi o Israel manyawaika.

⁵Maöraha o hali gënanga idadi, o Israeloka manga balu-baluhu o Gileadoka yoiki de iwihigaro o Yefta wamal̄a o Tob madaera.

⁶Onanga yato, ”Nomi tuda ngomi halawana o Amon manyawa.”

⁷Mä o Yefta wohaluhu, ”Koigoungua ngini duru konihi igoua ngohi? Ngini nihi duhuoka ngohi tongohi ahi ama ai tauoka. Yadodoa öraha nënanga maöraha ngini o hukaranga ma goronaka, ngini niboa ngohino?”

⁸Onanga yohaluhu, ”Ngomi miboa karana ngomi mio igo hupaya ngona natuda o Gilead manyawa yongodumu mangale haparangi o Amon manyawa öraha nënanga dika.”

⁹O Yefta wohaluhu, ”Nako ngini ni hi hi garoli ngohi to ma idulu o Gileadika mangale haparangi o Amon manyawa, de ma Jou wonahi döaka o utumu ngoneino, ngohi aha todadi o kuaha mangale ngini.”

¹⁰Onanga yohaluhu, ”Ngomi mirimoi. Mä Jou wahakihi.”

¹¹O Yefta woma goraka ima kinïki de o tutuda-tutuda o Gilead mabereraka. Ipaha o Gilead manyawa iwi goraka idadi wokokuaha de o tutuda. De ma Jou Ai himangoka o Mizpa ma kotaka, o Yefta wohihimanga ai gogahoko-ai gogahoko o Gilead ma nyawaika.

¹²Iböto gënanga o Yefta wahuloko o nyawa, ma koano Amonika mangale yotemo hoko nënanga, ”Tongomi mia howono okia, hiädono nia parangi tongomi mia berera?”

¹³O Amon manyawa manga Koano wohaluhu yahulo-hulokika gënanga, ”Maöraha o Israel manyawa o Mesir de yaino, önanga ya l̄ë tongomi miatonaka, mulaenge o Arnon ma Ngairi de yaino hiädono o Yabok ma Ngairika de o Yordan ma Ngairi. Oraha nënanga nihigilio gënanga de madodagi idame-dame.”

¹⁴Daha o Yefta wahulokoli o nyawa ma koano Amonika,

¹⁵mangale mabobaluhu hoko nënanga, ”O Israel manyawa ha kali-kali yaoraua o Moab manyawa manga tonaka ekola o Amon ma nyawa manga tonaka.

¹⁶Maöraha o Israel manyawa ya mal̄a o Mesir, önanga ya meta o ’akaba majikoika yatilakuru o tonaka makokakaha daha ima hiädono o Kadesoka.

¹⁷ Ipaha önanga yahuloko o nyawa ma koano Edomika mangale yogahoko wahi gumal̄a yatilakuru ai berera. Mä ünanga wahigumal̄aua önanga. Ipaha manga gogahoko mahali kai ma daëne ma koano Moabika, mä unangö wahi gumal̄aua önanga ya tilakuru ai daera. Karana gënanga o Israel manyawa yogogere o Kadesoka.

¹⁸ Ipaha önanga ihi gila-gila manga dodagi yaboa o tonaka makokakaha, mä yatilakurua o Edom de o Moab madaera, mä ya l̄ë o ngekomo ikokiloliti hiädono ima hiädono o Moab o wange mahiwaroko, o Arnon ma Ngairi mahonongaka. ”Onanga ima tau dokengoka, mä yatobongua o ngairi gënanga, karana o daera gënanga iwohama o Moab madaera.

¹⁹ Iböto gënanga o Israel manyawa yähuloko o Sihonika, o Amori manyawa manga koano o Hesybonoka mangale yogahoko wahi gumal̄a yatilakuru o Amori madaera, karana önanga yomau toönanga manga daeraika mahirete.

²⁰Mä o Sihon wahi gumal̄aua önanga hababu ünanga wa ngakuua önanga duga-duga yomau yatilakuru dika. Unanga koaholi watoomu ainyawa yopoparangi daha ihi goko yogoa-goana manga ngï o Yahasoka ipaha o Israeloka yatobongo genangino.

²¹Mä ma Jou, o Israeloka manga Jou Madutu, wahi döaka o Israel ma nyawaika o utumu mangale o Sihon imanïki de ainyawa yopoparangi. Hoko genala o Israel manyawa yamake mata-mata o Amori manyawa manga tonaka yogö gogogere o bereraka gënanga.

²²O Amori manga daera gënanga önanga yogogere mulaenge o Arnonino o koreharail̄e, hiädono o Yabok ma Ngairi o koremieuku, de o tonaka makokakahaino o wange mahiwaroko, hiädono o Yordan ma Ngairi o wange madumuniha.

²³Hoʼ ma Jou, o Israeloka manga Jou Madutu, genangala waduhu o Amori manyawa mangale ma Jou Ai umati manga paralu.

²⁴De öraha nënanga boteka ngona nomau nal̄ëoli? O tonaka inihidö döa-döaka o Kamos, nia gomanga gënanga, nginika yakunu kahirahi tingini madutu. Mä okia ma Jou womihi döakoka, tongomi mia Jou Madutu ngomino, ngomi aha mia tumungu.

²⁵ Ngona nato bote, ngona iholoi yaoa ngaro de o Balak o Zipor aingohaka, o Moab manga koano? O Balak komaiwahi womi lawani ekola mimateke parangi dede ngomi.

²⁶O taongo o ratuhu hange madekana o Israeloka yogogere o Hesybon de o Arur makapo-kapongo yakokilolitino, de mata-mata o kota-kota o Arnon ma Ngairi ma datekoka. De yadodoa madekana gënanga ngona na l̄ëoka uaoli?

²⁷Kowali, ngomi mia howonua ngonaika. Ngonala nahowono karana nomi parangi ngomi. Ma Joula o hakimi o wange nënanga wa putuhoka o perekara nënanga o Israel manyawa de o Amon manyawa nanga hidogoronaka.”

²⁸Mä o Amon manga koano wolega ikaua o Yefta ai behehongo gënanga.

²⁹Maduruino ma Jou Ai Womaha iwi kuaha o Yefta. Daha o Yefta woiki wolega o Gilead deʼ o Manasye madaera ipaha woma idulu o Mizpaika o Gileadoka. Genangino ünanga wohigila-gila ai dodagi o Amon manyawa manga daeraika.

³⁰O Yefta wodiai o jaji nënanga ma Jouika, ”Nako Jou nohihi gumal̄a ngohi tahihanga o Amon manyawa,

³¹deʼ ngohi toma idulu de ahi halamatoka, done o nagona ö mado dihiraka yohupu tongohi ahi tauino mangale ihi buhuku ngohi, aha ngohi tohihuba hokä o huhuba i tuhu-tuhuku o Jouika.”

³²Daha o Yefta watobongo o Yordan ma Ngairi mangale waparangi o Amon manyawa, de ma Jou wihi döaka o utumu unangika.

³³O Yefta wabinaha önanga wamata-mataka o Arur de yaino hiädono o Minit madaera ma gilolitino — mata-mata o kota monaoko — de hiädono magurutika o Abel-Keramim. Duru manga ngöe o Amon manyawa yohonenge, hiädono yahihanga o Israel manyawa manga himangoka.

³⁴Maöraha o Yefta woma idulu o Mizpaika, ngoi ora o moholehe moboa mibuhuku ünanga matakoro o damunu demo selo-selo. De ngoi ora kaë genangö moi.

³⁵ O Yefta womimake hoko gënanga, o Yefta ai hininga idadi duru ihuha hiädono to ünanga ai baju wakakihi, de wotemo, ”Adede ngohi ora, ahi hininga iwedere! Yadodoa kiani ngona nadiai ahi hininga iwedere? Ngohi tokobotoka ma Jouika, de ngohi takunokauaoli tä tauru tohigilio!”

³⁶Daha o moholehe gënanga wotemo o Yefta ika, ”Baba nokobotoka ma Jouika, de ma Jou wonihi gumalaka Baba nabalahi o Amon manyawa manga dorou, Baba ani haturu gënanga. Hoʼ, okia Baba nohi jajioka, kokiani Baba nohidagi.”

³⁷”Duga-duga,” o moholehe gënanga motemo mohi gila-gila, ”ngohi togahoko o hali moi: Nohihi döaka öraha o mede hinoto mangale totagi-tagi o l̄okuoka mima kokao de tongohi ahi dodiawo. Dokengoka ngohi aha togari tongohi ahiwowango, hababu ngohi aha tohonenge kato moholehe maborohi.”

³⁸Ami ama womihigumal̄a, de womodeke moiki. O moholehe gënanga de ami dodiawo yoiki ol̄okuika mangale manga hininga i huha dokengoka, karana munanga aha mohonenge mokawinguahi de koiwahi ami ngohaka.

³⁹O mede hinoto ipahaika, munanga moma idulu ami amaika, daha ami ama wadiai okia wohi jajajioka ma Jouika. Daha mohonenge o moholehe gënanga maöraha munanga kao moholehe maborohi. Genanga ma ahali mahirahi yadodoa o Israel manyawa manga hidogoronaka, mabiaha

⁴⁰o ngoha-ngohaka o moholehe yoiki o taongo ihi getongo o wange iata madekana mangale manga hininga ihuha yohininga o Yefta ngoi ora o Gileadoka.