Read Tobelo O HAKIM-HAKIM 12 Bible Online

O HAKIM-HAKIM 12 - Tobelo bible

O HAKIM-HAKIM 12

¹”O oraha gënanga o Efraim ai hoana imahi dodiai mangale yoparangi, daha yoiki yatobongo o Yordan ma Ngairi yameta o Zafonika. ”Onanga iwitemo o Yeftaika, ”Yadodoa ngona noiki naparangi o Amon manyawa nomihi garoua ngomi? O öraha nënanga ngomi aha minituhuku ngona de ani tau madol̄a.”

²O Yefta watemo, ”O Amon manyawa de ngomi o Gilead ma nyawa naga mia hidogoronaka o ributu kohagiria. Ngohi tini ahokoka ngini mangale nihiriwo nihihi lapahi ngohi o Amon ma nyawaino gënanga, mä ngini niboaua.

³Hoʼ, ngohi tongaku iböto ngini aha niboaua nihiriwo ngohi, ngohi taputuhoka toiki taparangi o Amon manyawa gënanga, ngaroka ngohi kiani tohonenge. Daha ma Jou wohihi döaka ngohino o utumu mangale önanga. Yadodoa öraha nënanga ngini niboa nihi parangi ngohi?”

⁴Ipaha o Yefta watoomu o Gilead manyawa mata-mata, daha önanga yaparangi yahihanga o Efraim manyawa. (O Gilead ma nyawa yogogogere o Efraimoka de o Manasye yakalakioka mangale o Efraim manyawa önanga imahi tingakoka manga diri o Efraimino, manga hoana gënanga.)

⁵O Gilead manyawa magogiria yoparangi gënanga, yogogere o ngï-o ngï yodobo-dobongo o Yordan ma Ngairi, hupaya yakunu yätumungu o Efraim manyawa yomau yo oara. Maöraha o Efraim womatengo, womau wohi oara ai diri, wogahoko mangale wotobongo, o Gilead manyawa iwi leha unangika, ”Boteka ngona o Efraim manyawa?” Nako ünanga wohaluhu, ”Kowali,”

⁶önanga iwi huloko wahetongo o demo ”Syibolet”. Unanga aha wohi demo ”Sibolet” karana wakunua wahetongo o demo gënanga de madiai. Daha önanga aha iwi tagoko de iwi toma o ngï moioka yodö dobo-dobongo gënanga. O Efraim manyawa oraha gënanga yatoma yaribuhu moruata de hinoto manyawa.

⁷O taongo butanga madekana o Yefta watuda o Israeloka ma nyawa. Ipaha ünanga wohonenge daha iwi jere ai kapongo ma löaka enagënanga o Mizpa makotaka o Gilead madaeraka.

⁸O Yefta ipaha, o Ebzan o Betlehemino watuda o Israel manyawa.

⁹O Ebzan to ünanga aingohaka o nauru yamoruange de ai ngohaka o ngoheka yamoruange. Ai ngoha-ngohaka o ngoheka gënanga wahi kawingi de o nyawa o hoana mahomoaino, de ünanga wal̄ë omoholehe yamoruange o hoana mahomoaino mangale ai ngoha-ngohaka o nauru. O taongo tumidi madekana o Ebzan wätuda o Israel manyawa,

¹⁰ipaha ünanga wohonenge de iwi lungunu o Betlehem mabereraka.

¹¹O Ebzan ipaha, o Elon o Zebulon ai hoanino watuda o Israeloka manyawa o taongo ngimoi madekana.

¹²Ipaha ünanga wohonenge daha iwi lungunu o Ayalon mabereraka o Zebulon madaeraka.

¹³O Elon ipaha, o Abdon o Hilel aingohaka o Piratonino wätuda o Israel manyawa.

¹⁴Aingohaka o nauru naga yamoruata, de ai dano-danongo o nauru yamoruange. Toönanga manga keledai yobö bare-barene imateke momeleko. O taongo tufange madekana, o Abdon watuda o Israeloka manyawa.

¹⁵Ipaha ünanga wohonenge daha iwi lungunu o Piraton mabereraka o Efraim madaeraoka o Amalek manyawa manga daera de mal̄oku-l̄okuoka.