Read Tobelo O HAKIM-HAKIM 13 Bible Online

O HAKIM-HAKIM 13 - Tobelo bible

O HAKIM-HAKIM 13

¹O Israel manyawa yobaradohali ma Jouika, daha ma Jou wa mal̄aika o Filistin manyawa yakuaha önanga o taongo moruata madekana.

²O öraha gënanga naga o nauru womatengo o Zora makotaka. Ai romanga o Manoah, o Dan ai hoanino. Ngoi hekata mo fätua.

³Mä o wange moiuku ma Jou Ai malaekat womahi matoko ai diri munangika de imitemo, ”Madekanino nënanga ngona namakeua o ngohaka, mä itedekanoka uaoli ngona aha nohi ao o ngohaka, de namake o ngohaka o nauru womatengo.

⁴Hababu gënanga nogoana ani diri nohi dodiai. Uha nokere o angguru ekola o daluku ekola na ol̄omo okianaga moi ma boho-bohono.

⁵Ani ngohaka gënanga woma kil̄auoka, uha hakali-kali ai tadauru natobiki, hababu maöraha kani mamata magoronakahi ünanga iwihi tantuoka mangale wodadi o nyawa kabiahaua. Unanga aha woparangi mangale wahi lapahi o Israel manyawa, o Filistin manyawa manga kuahaino.”

⁶Ipaha gënanga o Manoah ngoi hekata moiki ami rokatika de motemo, ”Riaka, naga ma Jou Madutu Ai huhuloko iboa ngohino; marupa hokä ma Jou Madutu Ai malaekat, hiädono ngohi tohawana. Ngohi tilehaua ünanga kiaka de waino, de unangö wohi ngahua ai romang ngohino.

⁷Mä ünanga wotemo ngohi aha tohi ao o ngohaka de tamake o ngohaka o nauru womatengo. Unanga wotemoö ngohi yakunua tokere o angguru ekola o daluku, ekola ta ol̄omo okianaga moi ma boho-bohono, hababu o ngohaka gënanga kiani hihi lapahi ma Jou Madutuika mangale wodadi o nyawa kabiahaua ai wo wango ma gurutu.”

⁸Woihene gënanga, o Manoah woma niata ma Jouika, hoko nënanga, ”Jou, tanu ngona noigo nihulokoli ani gilaongo ngomino mangale womihi ngahu okia kiani ngomi miadiai de o ngohaka ünanga woma kilau ipahaino.”

⁹Ma Jou Madutu woihene o Manoah ai gogahoko. Ma Jou Ai malaekat iboali maöraha o Manoah ngoi hekata magogiria mo gogeruku o dumuleoka. O öraha gënanga ami rokata koiwiwa genangoka.

¹⁰Hö, munanga mooa-oara mohi ngahu o hali gënanga unangika, ”Riaka, nilega, o nyawa mahira woboa-boa ngohino gënanga, woboakali!”

¹¹O Manoah de ai japatioka womi nïki ngoi hekata. Unanga womahi tigi o nyawaika gënanga de woleha, ”Tuanga, noö ao-ao o abari tongohi ngohi hekatika?” ”Itiai,” wohaluhu.

¹²Daha o Manoah woleha, ”Nako okia Tuanga notemoka gënanga damä idadioka, okia kiani wadiai o ngohaka gënanga? Damä sarakia ai wowango?”

¹³Ma Jou Ai malaekat gënanga ihaluhu, ”Ngoni hekata yakunua mokere o angguru ekola o daluku, yakunuaö okianaga moi ma ahali o angguru mautuino, ekola okianaga moi mabö boho-bohono. Munanga kiani madiai mata-mata totemo-temoka munangika, de mogoana hupaya uha naga madiaiua.”

¹⁵Daha o Manoah witemo unangika, ”Tuanga nako noigo notamä ahi öraha mahuhutulu. Ngomi aha mihakai okahi o kabingi magö mangale Tuanga.”

¹⁶Mä ma Jou Ai malaekat gënanga itemo, ”Ngarokä ngohi todamä nenangoka, ngohi aha tol̄omua damä okia ngona nohi diaiuku. Mä nako ngona kanomau dika nohihidiai, nohihi diai gënanga hokä o huhuba ituhu-tuhuku, de nohi huba ma Jouika.” O Manoah womamäo uahi ima temo-temo dede ünanga gënanga ganga ma Jou Ai malaekat. Hö, ünanga wotemo, ”Nako hoko gënanga, tanu noigo tuanga nomihi ngahu ani romanga Tuanga, hupaya nako okia Tuanga notö temo-temoka gënanga damä idadi, ngomi yakunu mihi döaka tongomi mia horomati ngonaika Tuanga.”

¹⁸Ma Jou Ai malaekat gënanga ileha, ”Mahababu okia ngona noigo nohi öriki ahi romanga? Ahi romanga gënanga, o romanga ihö hera-heranga.”

¹⁹O Manoah wa l̄ë o kabingi magö moi de o tarigu ma huhutulu, daha wakelenga uku o helewo mal̄okuoka de wohi huba ma Jouika, enagënanga ma Jou wadodiai o hali-o hali ihö hera-heranga.

²⁰O uku itokara magogiriaka o hubaka gënanga de yail̄e, o Manoah de ngoi hekata yamake ma Jou Ai malaekat gënanga idoa yaka il̄e o uku itoka-tokara magoronaka gënanga, ya meta o dihangil̄e. Daha o Manoah womamao gënanga ma Jou Ai malaekat; daha ünanga de ngoi hekataö imahi tudukuku yo huba. Onanga komaiwaka yamakeoli o malaekat gënanga.

²²Daha o Manoah womitemo ngoi hekatika, ”Itiai ngone aha hohonenge hababu ngone himakeoka ma Jou Madutu!”

²³Ngoi hekata mohaluhu, ”Nako igoungu ma Jou womau wona toma ngone, itiai ünanga watarimaua o huhuba ngone hohihö huba-huba unangika gënanga; unangö aha wohi dumutua mata-mata gënanga ngoneino ekola wohingahu o hali-o hali woto temo-temoka gënanga ngoneino.”

²⁴O mede muruono naga ipaha o Manoah ngoi hekata gënanga mi hidadi o ngohaka o nauru womatengo daha ünanga iwi hidöaka o romanga unangika o Simson. O ngohaka gënanga idadi wolamoko de ma Jou wi barakati;

²⁵deʼ maöraha ünanga naga o Dan ai hoana manga tauoka ma gogere o Zora de o Esyitaol mahi dogoronaka, ma Jou Ai Womaha mulaenge iwihi döaka o kuata unangika.