Read Tobelo O HAKIM-HAKIM 14 Bible Online

O HAKIM-HAKIM 14 - Tobelo bible

O HAKIM-HAKIM 14

¹O wange moiuku o Simson woiki o Timnaika, de womimake dokengoka o Filistinoka manga moholehe momatengo.

²Daha ünanga wolio de watemo ai dimonika, ”Ngohi tomi igo o Filistin manyawa manga moholehe momatengoika o Timna mabereraka. Ngohi togahoko Baba de ngohi meme nioiki nimi dunia munanga.”

³Mä ai dimono yato, ”Yadodoa kiani noiki o Filistin manyawaika mangale noma lingiri o hekata, ena hioko önanga i wohamua ma Jou Ai umati? Boteka tongone nanga riadodoto mahirete manga hidogoronaka ekola tongone nanga hoana mata-mata manga hidogoronaka koiwa o moholehe momatengo nima daene?” O Simson wohaluhu ai amaika, ”Mä o Filistinoka manga moholehe gënanga ngohi tomi igo. Deʼ ngohi tonganono Baba no modeke nimi dunia munanga mangale ngohi.”

⁴O Simson ai dimono ihi örikua ma Jou wodiai o Simson wa manarama o hali gënanga. Hababu, ma Jou wolingiri öraha mago giria mangale waparangi o Filistin manyawa. O öraha gënanga o Filistin manyawa yakuaha o Israel manyawa.

⁵Daha woiki o Simson o Timnaika ima kinïki de ai dimono. Maöraha önanga yatilakuru o angguru madumule moi, o Simson ima kamake de o singa magö moi. O singa gënanga ipoaka,

⁶deʼ itodokanino o Simson idadi wokuata mangale ma Jou Ai kuaha. Daha ünanga wakakakihi o singa gënanga de ai giama, ma tero-tero o aiwani gënanga duga-duga o kabingi moi. O hali gënanga wohi ade-adeua ai dimonika.

⁷Ipaha o Simson womi lega o moholehe gënanga de ima ade-ade dede munanga, de o Simson womi igo munangika.

⁸O öraha muruononaga madekana ipahaika, o Simson woikoli mangale wokawingi de o moholehe gënanga. Ai dodagi magoronaka, ünanga worehene mangale wolega o singa mahonenge wa tö toma-tomaka gënanga. Maöraha ünanga wadono genangoka, wamake o ohungu duru koha ngöe mamayeti magoronaka gënanga, de naga o magula.

⁹Unanga waroputino o gula gënanga ai giamoka, daha gila-gila waol̄omo o ohungu magula gënanga womahi dagi-dagi. I paha ünanga woiki ai dimonika ikali wahi döaka o gula utu gënanga onangika, de önanga yaol̄omo. Mä o Simson wahi ngahua o ohungu magula gënanga wal̄ë o singa mahonengino.

¹⁰Ipaha o Simson ai ama woiki mamoholehe ami tauika gënanga, o Simson wodiai o rameanga dokengoka, karana hoko gënanga manga biaha o gogoduru de o momoholehe.

¹¹Maöraha o Filistin manyawa iwimake ünanga, önanga yä iriki o goduru yamoruange mangale iwi dodiawo ünanga.

¹²Daha o Simson watemo onangika, ”Tongohi ahi sumu-sumu. Nako ngini niyakunu nia hetongo, nginika moi-moi aha ngohi tinihi döaka o pakeanga o lenan ma aluhu o dobiki moi de o pakeanga o habi moi marorahai. Ngohi tinihi döaka öraha o wange tumidi mangale ngini nia hetongo, hoko kia madekana o kawingi ma rameanga nënanga.

¹³Mä nako ngini niyakunua nia hetongo, ngini moi-moi kiani nihihi döaka ngohino o pakeanga o lenan ma aluhu de o pakeanga o habi moi mahohailoa.” Daha o Filistin manyawa gënanga yotemo, ”Yakunu! O oraha nënanga na hetongo o sumu-sumu gënanga.”

¹⁴Daha o Simson wato, ”Yol̄o-ol̄omino, ihupu haö ol̄o-ol̄omo, ipoputurungino ihupu imö muti-mutiti.” O wange hange ipahaika onanga yamake uahi dika mamangarati o sumu-sumu gënanga.

¹⁵Hoʼ, o wange maiatoka önanga imitemo o Simson ngoi hekatika, ”Ngona kianini baja ani rokata hupaya ünanga womau womihi ngahu ngomino mamangarati o sumu-sumu gënanga. Nako kowali, ngomi aha mini tuhuku ngona de ani Ama ai tau madol̄a. Marupahi ngona nomï ahokino ngomi mangale namata tongomi mia arata!”

¹⁶Karana gënanga, o Simson ngoi hekata moiki o Simsonika de moari, daha motemo, ”Ngohi tohi öriki ngona nohi doraua ngohi, yadodoa ngona nahi döaka o sumu-sumu ahi dodiawoika, mä ngona nohihi ngahua mamangarati ngohino? Marai ngona nohi igoua ngohi!” O Simson wato, ”Nodamä ohi! Tongohi ahi dimonika mahireteö ngohi tahi ngahua, yadodoa ngona kiani tonihi ngahu?”

¹⁷O wange tumidino madekana o rameanga gënanga o Simson ngoi hekata hoko genangika moari. De karana munanga hoko genangika miributu, daha o wange matumidoka, o Simson womihi ngahu o sumu-sumu gënanga mamangarati munangika. Daha o Simson ngoi hekata gënanga mohi ngahu o Filistin manyawaika.

¹⁸Hoʼ, o wange tumidoka o wange itumunu uahi, o kota ma nyawa gënanga yotemo o Simsonika, ”Okia iholoi imutiti de o gula? Deʼ okiali iholoi iputurungu de o singa?” O Simson wohaluhu, ”Nako ngini nimi pakeua ngohi hekata, ngini aha nia makeua mamangarati o sumu-sumu gënanga!”

¹⁹Itodokanino o Simson idadi woputurungu mangale ma Jou Ai kuaha, daha ünanga woiki o Askelonika. Dokengoka ünanga wätoma o nyawa o nauru yamoruange manga pakeanga marorahai. Unanga wa l̄ë toönanga manga pakeanga gënanga de wahi döaka o nyawa yamoruangeika yahö heto-hetongoka o sumu-sumu gënanga. Ipaha gënanga, ünanga wolio ai tauika de ai hininga isanangua.

²⁰Daha o Simson ngoi hekata gënanga, ai toroa wihi döaka wodadi winoni nïkika o Simson maöraha wokawingi.