Read Tobelo O HAKIM-HAKIM 15 Bible Online

O HAKIM-HAKIM 15 - Tobelo bible

O HAKIM-HAKIM 15

¹O öraha muruono naga ipahaika, maöraha o gandum youtuku, o Simson woiki womï lega ngoi hekata. Unanga womïgao o kabingi magö moi mangale ngoi hekata gënanga. O Simson wotemo ai toroaika, ”Ngohi toigo towohama o kamarika mangale mimake de tongohi ngohi hekata.” Mä ai toroa wihi gumal̄aua.

²Witemo o Simsonika, ”Ngohi tatobote ngona igou-goungu nomï igoua munanga, hoʼ, munanga tihi döakoka ani dodiawoika. Mä ngona yakunu nomi l̄ë ngomi dodoto. Munanga iholoi mohailoa.”

³O Simson wotemo, ”Okia aha ngohi todiai o Filistin manyawaika mamao nënanga, ngohiua tahowono!”

⁴Daha ünanga woiki wotagoko o kaho o honganika o ratuhu hange. O kaho o honganika gënanga wohiki likoino mabikini a hohinotoka. Madohangoka maliliko gënanga ünanga wogelenga uku moi o oboro.

⁵Iböto gënanga ünanga watuhuku o oboro-o oboro gënanga daha wapidili o kaho o honganika gënanga o Filistin manyawa manga dumule-dumule magoronaika. Youku mata-mata manga gandum ya utu-utukinoka dokengoka. Manga gandum idato-datomika de manga angguru madumuleö ima kinïki youkuoli.

⁶O Filistin manyawa yoiki yatailako o nagona yadiai o hali gënanga. Daha o nyawa ihi ngahu onangika o Simson wodiai, karana ai toroa o Timna mabereraka wihi döakoka o Simson ngoi hekata o Simson ai dodiawo woma tengoika. Karana gënanga o Filistin manyawa imi tuhuku o ngoheka gënanga ima nïki ami ama ai tau madol̄a hiädono imata.

⁷Daha o Simson wato o Filistin ma nyawaika gënanga, ”Ee, hoko gënanga madodagi ngini nidiai? Ngohi to koboto aha togogere toma rïdua nako ngohi tabalahuahi o hali nënanga nginika!”

⁸Ipaha ünanga waparangi önanga de mahayangua de watoma komanga ngöe önanga manga hidogoronaka. Iböto gënanga, ünanga woiki daha wogogere o arukumagoronaka o Etam ma doporono moi mahohelewo.

⁹Dama o Filistin manyawa yaika o Yehuda madaeraka daha imä tau genangoka, ipaha yaparangi o Lehi makota.

¹⁰O Yehuda manyawa yaleha o Filistin manyawaika, ”Yadodoa ngini nimi parangi ngomi?” Onanga yohaluhu, ”Ngomi miaino mangale miwi tagoko o Simson hupaya ngomi yakunu miwidiai ünanga hokä ünanga womi diaioka ngomi.”

¹¹Yoihene gënanga, o Yehuda manyawa yaribuhu hange yoiki o Etam madoporono mahelewo maarukika. Dokengoka önanga yotemo, ”Simson, boteka ngona nohi orikua o Filistin manyawa ina kuaha ngone? Okia nënanga ngona nadiaioka ngomino!” O Simson wohaluhu, ”Ngohi duga-duga tabalahi okia önanga yodiaioka ngohino.”

¹²”Onanga yato, ”Ngomi miboa mangale miniliko de minihi lapahi ngona o Filistin ma nyawaika.” O Simson wato, ”Nijaji ihira ngini mahirete aha nihitomaua ngohi.”

¹³”Kayaoa,” önanga yato, ïgoungu ngomi duga-duga mimau mini liko de mini hilapahi ngona o Filistin ma nyawaika. Ngomi aha mini tomaua.” Daha önanga iwi liko. Unanga de o dewili o gahumu hinoto mahungiohi, de yoiki iwiao ünanga o arukoka gënanga de yaino.

¹⁴Maöraha o Simson iwi ao hiädono o Lehika, o Filistin manyawa iwi dotoboaino ünanga ima popata de iwihi uli-ulili. Itodokanino ünanga idadi wokuata mangale ma Jou Ai kuaha. O dewili-o dewili ihilö liko-liko ai giama gënanga wa toaka hoko gënanga dika ma tero-tero o dewili gënanga o dewili yöuku.

¹⁵Ipaha ünanga womamake o keledaino maokoko makobongo moi kama hungi-hungiohi. Unanga woma goraka o kobongo gënanga, daha wapake mangale wahi gohara o nyawa yaribuhu moi hi ädono yohonenge.

¹⁶Daha o Simson wonyanyi, ”De o keledai maokoko makobongo, tahi gohara o nyawa yaribuhu moi; de o keledai maokoko makobongo, tatotoporono toönanga manga mayeti.”

¹⁷Iböto gënanga, ünanga waumo o okoko makobongo gënanga. Hababu gënanga o ngï yahö heto-hetongo ihi romanga o Ramat-Lehi.

¹⁸Ipaha o Simson wamäo duru ai kiriti madudungu, hiädono ünanga womahi böaka ma Jouika. Unanga wato, ”Jou, daha i pahaino ngona nohihi döaka o utumu ma amoko nënanga ngohino. O öraha nënanga ngohi kiani tohi honenge o kiriti madudungu, hi ädono ihi tagoko o Filistin manyawa nënanga ini nako-nako ua Ngona?”

¹⁹Daha ma Jou Madutu wahelenga o Lehi madoporono mahelewo mapidaha gënanga daha ihupu o akere genangino. O Simson wokere, ipaha wamäo wotumuloa okali. Hababu gënanga, o akere ma lako gënanga yahetongo o Akere ma Lako Hakor. O akere ma lako nënanga kanagahi o Lehi madaeraoka.

²⁰O taongo monaoko madekana o Simson wätuda o Israeloka manyawa maöraha o Filistin manyawa yakuaha önanga.