Read Tobelo O HAKIM-HAKIM 16 Bible Online

O HAKIM-HAKIM 16 - Tobelo bible

O HAKIM-HAKIM 16

¹O wange moiuku o Simson woiki o Gaza mabereraika. Dokengoka ünanga ima make de o ngoheka momatengo o huhutu maninïki daha ünanga woiki ima hidu de o ngoheka gënanga.

²O Gaza manyawa yoihene o Simson naga dokengoka. Hoʼ, önanga ihi gilolitino yogoana o ngï gënanga de iwi damä ünanga o hutumoi iahumu o kota mangorana ma amo-amokoka. Mä o hutu gënanga önanga okia-kiaua yodiai karana önanga ima tibanga, ”Damä maöraha o wange ipotoka, daha ngone hïtoma ünanga.”

³Mä o Simson woma idua genangoka hiädono o ngorumino. O hutu gogoronaika ünanga womomiki daha woiki o kota mangorana ma amo-amokika. Unanga warahuku mangorana mabebeno gënanga mata-mata de maliate de madudukuru kamamoi. Ipaha ünanga wa goraka o ngorana mabebeno gënanga wamoku, daha wao o doporono matubu il̄e o Hebron mahonongaka.

⁴Iböto gënanga o Simson duru womi igo o ngoheka moma tengoika o Sorek ma Waino. O ngoheka gënanga ami romanga o ngo Delila.

⁵O nyawa yamotoa yakokuaha o Filistin yoboa o ngohekaika gënanga de imitemo, ”Nibaja o Simson hupaya ünanga womau woni hingahu ngonaika okia marahasia ai kuata, deʼ sarakia madodagi mangale hahihanga ai kuata gënanga. De hoko gënanga ngomi yakunu miboa de miwi liko ünanga mangale miwi hohihanga ünanga. Damä ngomi moi-moi aha minihi döaka ngonaika o tiwi o haaka o ribuhu moi de o ratuhu moi.”

⁶O ngo Delila mitemo o Simsonika, ”Simson, okia mahababu ngona hoko gënanga ani buturungu? De okia ngona kiani inihi liko hupaya ihihanga ani buturungu gënanga? Abeika nohihi ngahu marahasia!”

⁷O Simson wohaluhu, ”Nako ngohi ihi liko de o toimi ma deli tumidi mahungi itoolenge itiai uahi, ngohi aha tobole de todadi hokä o nyawa biaha.”

⁸Daha yakökokuaha o Filistin gënanga imihi döaka ongo Delilaika o gahumu tumidi o toimi madeli mahungi itoolenge itiai uahi. Ipaha, o Filistin manyawa magogiria yotamä o ngï mahomoaka o ngo Delila miliko o Simson de o toimi madeli-madeli gënanga daha mopöaka, ”Simson! O Filistin manyawa yoboa!” Gila-gila o Simson watoaka o toimi madeli-madeli gënanga. O toimi madeli-madeli gënanga itoaka hokä o lawe i toaka yakorona o uku. Ai buturungu marahasia yanako uahi.

⁹

¹⁰Daha o ngo Delila mato o Simsonika, ”Ilaha, ngona kani tengeluku! Ngona duga-duga noma higogule ngohi. Ika amo, nohi ade-ade ngohino de okia ngona yakunu inihi liko!”

¹¹O Simson wohaluhu, ”Nako ngohi ihi liko de o gumini ma hungi komaiwahi yapake, ngohi aha tobole de todadi hokä o nyawa biaha.”

¹²Maöraha o Filistin manyawa yotamä o ngï moioka, o ngo Delila ma l̄ë o dewili muruono naga mahungi-hungi, daha mihi liko o Simson. Ipaha munanga mopöaka, ”Simson! O Filistin manyawa yoboa!” Mä o Simson watoaka o dewili-dewili gënanga ai giamino hokä o nyawa yatoaka o lawe.

¹³Daha o ngo Delila motemo o Simsonika, ”Ilaha, ngona kanoma higogule okali ngohi. Ngona kani tengeluku. Ika amo, nohi ade-ade de okia ngona yakunu inihi liko!” O Simson wohaluhu, ”Nako ahi tadauru mangai tumidi ihi rugihi de o lawe o pakeanga yododiai mapakakahoko, ipaha ihi liko o pakeanga yododiai mapakakaha magotaika gënanga, ngohi aha tobole de todadi hokä o nyawa biaha.”

¹⁴O ngo Delila midiai o Simson iwi kioko daha munanga mohi rugihi tumidi o Simson ai tadauru mohi rugihi o lawe o pakeanga yododiai mapakakahokaika. Ipaha gënanga munanga mohi liko o pakeanga mapakakaha magotaika daha mopöaka, ”Simson! O Filistin manyawa yoboa!” O Simson o womomiki daha watauru ai tadauru hiädono ihohe o pakeanga yododiai mapakakahika gënanga.

¹⁵Ipaha o ngo Delila mitemo unangika, ”Ilaha, ngona notemo ngona nohi igo ngohino enahioko ani hininga ikurutika de ngohi! Mahange iböto ngona noma higogule ngohi, de hi ädono öraha nënanga o ngona noluku nohihi ngahu yadodoa ngona hoko gënanga ani kuata.”

¹⁶O wange mahi getongo o ngo Delila hoko genangika dika mibaja-baja de miributu, hi ädono o Simson woduduku woihene.

¹⁷Mabaha o Simson wohi ade-ade ai rahasia. ”Tongohi ahi tadauru komaiwahi yatobiki,” o Simson wato. ”Ngohi ihihi lapahioka ma Jou Madutuika todadi to Unanga madutu woma dinga-dingakoka. Maöraha katoma kil̄au inohi ngohi todadi oka o nyawa moi kabiahaua. Nako tongohi ahi tadauru yatobiki, to ngohi ahi kuata aha ihihanga; ngohi aha tobole de todadi hokä o nyawa biaha.”

¹⁸O ngo Delila mamäo, o Simson womihi ngahuoka ai hininga marahasia. Hababu gënanga munanga mohi dingoto o abari nënanga o Filistinoka yakokuahaika, ”Niboali mamoi ohi nënanga dika. O Simson wohi ade-adeoka ai rahasia ngohino.” Onangö yoboa de yoao o tiwi mangale o ngo Delila.

¹⁹Iböto gënanga o ngo Delila mipal̄a-pal̄anga de mibaja o Simson hi ädono kawo dogiokika ami daparionoka, daha munanga ma ahoko o nyawa de mahuloko yatobiki mangai tumidi o Simson ai tadauru. Ipaha munanga mi hangihara o Simson, karana o Simson ai kuata ihihangoka.

²⁰Daha munanga moma pöaka, ”Simson! O Filistin manyawa yoboa!” O Simson womomiki de watobote ünanga wakunu wolapahi hokä öraha ipaha-paha. Unanga wohi örikua ma Jou wimal̄aka ünanga.

²¹O Filistin manyawa iwi tagoko ünanga de yatubalenge ai lako magomono. Onanga iwi ao ünanga o Gazaika de iwi liko ünanga de o rante hinoto o tabaga, daha iwihi ngohama o bui magoronaika. Dokengoka ünanga iwi huloko womanarama wogulinga.

²²Mä madekana gënanga ai tadauru imulaengoli iwango.

²³O wange moiuku o Filistinoka yakö kokuaha ima toomu yomau yarameanga de ihi huba manga huhuba de madodagi huba ma ago-agomo mangale o Dagon, toönanga manga gomanga. Onanga yonyanyi, ”Tongone nanga gomanga inahi döakoka ngoneino o utumu mangale o Simson, tongone nanga haturu!”

²⁴Magogiriaka önanga yomorene de imagarago önanga yato, ”Niwiaoino o Simson nengino hupaya ünanga wodadi tongone manga gie-giete mangï!” Onanga iwi l̄ë o Simson o bui ino, de ünanga wodadi manga gie-giete mangï. Önanga iwi huloko ünanga woma okoino o liate ma ago-agomo hinoto mahi dogoronaka. Maöraha o nyawa yowöe-wöe gënanga iwi make o Simson, önanga yapuji o Dagon de yonyanyi, ”Tongone nanga Gomanga inahi döakoka ngoneino o utumu mangale nanga haturu wakiliangoka tongone nanga berera de watoma hoko gënanga manga ngöe tongone nanga nyawa!”

²⁵

²⁶O Simson witemo o ngohaka o nauru witö tuda-tudaika, ”Napidili tongohi ahi giama hupaya ngohi takunu toma hijojo o liate-liate o tau madidiki nënanga, karana ngohi toigo tomahi ake genangika.”

²⁷O tau gënanga iehoto iomanga de o nyawa. O nyawa yamotoa yäko kuaha o Filistinokaö naga genangoka. De o tau gënanga malape il̄ö l̄oku-l̄okuoka naga done yaribuhu hange o nyawa. Onanga mata-mata iwi wuningi de iwi hohedu o Simson.

²⁸O öraha gënanga o Simson womaniata; ünanga wato, ”Ya, Jou noko Kurutil̄e, Ngona noigo nohihininga ngohi. Tanu nohihi döakoli o buturungu ngohino mamoi nënanga dika, ya Jou Madutu, hupaya de ahi manarama nënanga, ngohi takunu tabalahi o Filistin manyawa yatotubalengoka tongohi ahi lako magomono hinoto.”

²⁹Iböto gënanga o Simson wasö o liate hinoto mahi dogoronaka o tau gënanga ihitö tiki-tiki. Daha womahi dudukuika de ai giama mahigili o liate moika de ai giama ma niraka o liate mahomoaika,

³⁰ünanga woma pöaka, ”Mal̄aika ngohi tohonenge kamamoi de o Filistin manyawa nënanga!” De ai buturu watotoomu ino ünanga wahitomo maliate-liate gënanga hiädono iruba de yäbänga yamotoa yakö kuaha o Filistin kamamoi de mata-mata o nyawa mahomoa naga genangoka. O Simsonö wohonenge. Mä, maöraha ai honenge gënanga ünanga wätomaka o nyawa i holoi yowöe, ngaro maöraha kawo mangango ikahi.

³¹Ipaha ai roriadodoto de mata-mata ai dutu-dutu yoboa mangale ya l̄ë ai mayeti. Onanga yao ai mayeti gënanga ihigilio, de yajere ai ama o Manoah ai jere magoronaka. O jere gënanga mangï o Zora de o Esyitaol mahi dogoronaka. O Simson wodadi o Israeloka manga tutuda o taongo monaoko madekana.