Read Tobelo O HAKIM-HAKIM 17 Bible Online

O HAKIM-HAKIM 17 - Tobelo bible

O HAKIM-HAKIM 17

¹Naga o nauru womatengo ai romanga o Mikha. Unanga wogogere o Efraim matonakoka, madaera dema l̄oku-l̄okuoka.

²O wange moiuku ünanga womitemo ngoi ayoika, ”Meme, maöraha ani tiwi o haaka o ribuhu moi de o ratuhu moi ihihanga, ngohi toihene Meme nahi lai-lai yotohi-tohiki. Nënanga, Meme, ani tiwi! Ngohi tatohiki.” Ngoi ayo mohaluhu, ”Ngohaka, tanu ma Jou wonihi barakati ngona!”

³O Mikha wohigilio o tiwi gënanga ngoi ayoika, daha ngoi ayo mitemo, ”Hupaya ngona, ahi ngohaka, ini daënua o lolai ngohi tohi demo-demoka gënanga, ngohi tohihuba o haaka nënanga ma Jouika mangale yapake yadiai o dulada o gota ihi lape o haaka. Ho, matiwi gënanga tohi gilio ngonaika.”

⁴O Mikha wohigilio ipaha o tiwi gënanga ngoi ayoika, ngoi ayo gënanga ma l̄ë o keping o ratuhu hinoto o tiwino gënanga, de mohi döaka o haaka wodö diaika womatengo. Daha munanga mihuloko wodö diai gënanga moi o dulada o gota wohi lape de o haaka gënanga. Ipaha o dulada gënanga yakelenga o Mikha ai tauoka.

⁵O Mikha mahirete de ma enangoka moi ai huba mangï. Unanga wodiai muruono naga o gomanga madulada de o alu madadatoko daha wigoraka aingohaka o nauru womatengo wodadi o Imam.

⁶ O öraha gënanga o Israel manyawa toönanga manga koano koiwa; moi-moi o nyawa yadiai okia yapulono itiai.

⁷O öraha gënangaö naga o goduru womatengo o Lewi aihoanino. Mahira ünanga wogogere o Betlehem mabereraka o Yehuda madaeraka.

⁸Maöraha nënanga ünanga wamal̄aka o kota gënanga de magogiria wolingiri ai gogere mangï mahomoa. Ai dodagi magoronaka gënanga ünanga womahi ädono o Mikha ai tauoka o Efraim ma tonakoka madaera de mal̄oku-l̄okuoka.

⁹O Mikha wileha unangika, ”Riadodoto kiaino manyawa?” O nyawa gënanga wohaluhu, ”Ngohi o Lewi manyawa o Betlehemino o Yehuda madaeraka ngohi magogiria tomä lingiri ahi gogere mangï.”

¹⁰O Mikha wato, ”Nogogere dika dede ngohi nenangoka, hupaya ngona nodadi mia dodaaere de mia imam tongomi. Daha ngohi tonihi döaka o tiwi o haaka o gahumu ngimoi o taongo higetongo, de hoko genangö o pakeanga de o inomo.”

¹¹O Lewi magoduru gënanga womodeke daha o Mikha wigoraka ünanga wodadi ai imam. Unanga wogogere o Mikha ai tauoka de widiai hokä aingohaka madutu mahirete.

¹³O Mikha wato, ”Ya, öraha nënanga ngohi tongaku ma Jou aha wodiai o oa-oa ngohino, hababu nagaka o Lewi manyawa womatengo wodadadi o Imam mangale ngohi.”