Read Tobelo O HAKIM-HAKIM 18 Bible Online

O HAKIM-HAKIM 18 - Tobelo bible

O HAKIM-HAKIM 18

¹O öraha gënanga o Israeloka koiwa manga koano. O Dan ai hoana kaima lingi-lingirohi o daera mangale idadi toönanga manga tonaka, hababu önanga ima makeuahiö o tonaka imaki nïki o Israeloka manga hoana mahomoa magoronaka.

²Karana gënanga önanga yäiriki o nyawa yamotoa yonö nau-nauru o nyawa mata-mata manga hidogoronaino toönanga manga hoana magoronaka yogogogere o Zora de o Esytaoloka, önanga yogahoko ihi döaka o abari.

³Maöraha yomau yongohama o tau genanga önanga yoihene o Lewi magoduru genanga wotemo, de önanga yanako aihigo. Ho, onanga yaika unangika, de iwileha, ”yadodoa ngona nenangoke? okia nodiai? onangona ini aoino?”

⁴O nyawa o guduru genanga wohaluhu, ”Ngohi nenangokadau karana o Mikha. Unangala wohigoraka ngohi todadi ai imam, de wohihidoaka o gaji ngohino.”

⁵Daha önanga iwitemo unangika, ”Nako hokogenanga, nomi riwo noleha ma Jou Madutuika boteka mia dodagi ngomi nenanga aha ihasili ekola kousali?”

⁶Wohaluhu maiman genanga, ”Uha nihawatere ma Jou wohidoakoka obarakati tingini nia dodagioka nenanga.”

⁷Ibooto genanga imagoraka o nyawa yamotoa genanga daha yoiki o Laisika. Genangoka onanga yatailako ihi dodiai manyawa. Inyata o Lais manyawa manga wowango madodagi hokä manga wowango madodagi o Sidon manyawa. Ngaroka o nanga imatingakika, deʼ yokurutika de o sidon manyawa, onanga yowango iridi deʼ koiwa maruaë, koiwa toonanga manga haturu, mata-mata kadema enanga, ikali yokurangua kaokianaga moi-ma.

⁸Maöraha o nyawa yamotoa genanga imaidulu hagala o nyawaika imakohoana moi o Zoraka de o Esytaol, önanga yogahoko ihi döaka o abari.

⁹Onangö yotemo, ”Niaino ngone ha parangi o Lais. Ngomi mioikoka dokengika, de miamake matonaka koharahai, maamokika de mahasili kohangöe, hagala mata-mata naga. Uha nimä gogogere dika nenangoka de okia-kiaua nidiai. Itaiti dokengika de haora o berera gënanga. Ngini aha nia make manyawa kautuö dekoiwa yatibanga aha yäparangi. Ngomi mingaku ma Jou Madutu winihi döakoka o berera gënanga dika.”

¹¹Karana gënanga, imagoraka o Dan ai hoana o Zora de o Esytaol de yaino yaratuhu butanga manyawa. De manga dae i ngodu-ngodumu,

¹²önanga yoiki o Kiryat-Yearim o wange madumuniha o Yehuda madaeraka daha ima tau genangoka. Hababu gënanga o ngï gënanga kaihi romangohi o Dan manga tau-tau.

¹³Dokengino önanga imadagi yogila-gila o Efraim madaera de mal̄oku-l̄okuika hiädono o Mikha ai tauika.

¹⁴O nyawa yamotoa yotö tailako mahira yahö hulo-huloko gënanga yatemo manga dodiawoika, ”Nihi öriki ngini o tau moioka nënanga naga o dulada malape o haaka? Nagaö o dulada mahomoa dede o alu madadamunu. Beika nia tibanga okia ngone kiani hodiai.”

¹⁵Daha önanga yoiki o Mikha ai tauika, o ngï o Lewi ma goduru wogogogerika gënanga, de yoleha mahali.

¹⁶O öraha gënanga o Dan ai hoana manga pajurete yaratuhu butanga, manga dae ingö ngodu-ngodumu gënanga, magogiria imaokoino o ngorana ma amo-amoko mahimangoka.

¹⁷Yamotoa yotö tailako gënanga gila-gila yowohama o tau magoronaika, daha ya l̄ë o dulada o gota malape o haaka gënanga ihi kinïki de o dulada-dulada mahomoa, de o alu ma dadamunu. O Lewi magoduru gënanga magogiria woma okoino de o pajuretoka yaratuhu butanga gënanga o ngorana ma amo-amokoka.

¹⁸Maöraha o nyawa yamotoa gënanga yowomaha o Mikha ai tauika de ya l̄ë o alu madadatoko ihiki nïki o gomanga ma dulada-dulada gënanga, o Lewi magoduru gënanga waleha, ”Okia nënanga ngini nia diai?”

¹⁹”Onanga yohaluhu, ”Noma rïdi! Uha noleha. Nomi nïki dika dede ngomi, daha ngona nodadi tongomi mia imam de nomihi dodaaere. Iholoi yaoa nodadi o imam o hoana moi de ngaro nodadi o imam o tau moi dika!”

²⁰O Lewi magoduru gënanga wosanangi de toönanga manga damake gënanga. Ho, ünanga wa l̄ë o alu madadamunu de o gomanga ma dulada gënanga daha wanïki dede önanga.

²¹Ipaha toönanga manga duduono gënanga imadagi i higila-gila, yahi doduruino toönanga manga ngohaka, manga aiwani de manga kia honanga.

²²Maöraha manga gurutika, o Mikha wa ahoko ima koka dateke daha imakao yanïki o Dan ai hoana manyawa gënanga. Yatigioka dede önanga,

²³o Mikha de ainyawa gënanga yaboa-boaoka önanga. O Dan ai hoana manyawa gënanga imalega manga poretoko de yoleha o Mikhaika, ”Naga okia? Yadodoa noboa de hoko gënanga o nyawa manga ngöe?”

²⁴O Mikha wohaluhu, ”Ngini nihi oaroka ahi dulada-dulada de ahi imam hiädono ngohi koahi kia-kia okaua, daha ngini nitemo, ’Naga okia!ʼ ”

²⁵O Dan aihoana manyawa gënanga yotemo, ”Holoi yaoa ani uru natamunu; uha hi ädono o nyawa nënanga yongamo daha ini parangi ngona. Damä ngona de ani tau madol̄a mata-mata yohonenge.”

²⁶Yotemo iböto hoko gënanga, o Dan ai hoana manyawa gënanga, ihi gila-gila toönanga manga dodagi. O Mikha wa make önanga iholoi yaika yokuata ngaro de ünanga, karana gënanga ünanga woma idulu daha wolio.

²⁷O Dan ai hoana manyawa gënanga iwihi oara ipahaino ma imam gënanga de o puji makia honanga o Mikha wadodiai gënanga, önanga yoiki yaparangi o Lais, o kota manyawa yowango irïdi de koiwa magigoro. (O kota gënanga naga o wai moi magoronaka de o Bet-Rehob makota.) O Dan manyawa gënanga yä toma o Lais manyawa gënanga karana toönanga manga ngï ima tingakika de ikurutika de o Sidon. Iböto gënanga o Dan ma nyawa ihi gokoli o kota gënanga ipaha yogogere genangoka.

²⁹O kota gënanga maromanga önanga yatagali idadi o Dan, imoteke ai romanga toönanga manga ama de manga ete de manga tohora, enagënanga o Dan, o Yakub aingohaka.

³⁰O gomanga madulada önanga yaö ao-ao gënanga, önanga ihigoko o kota gënanga daha iwi goraka o Yonatan, o Gerson ai ngohaka, o Musa ai danongo, wodadi toönanga manga imam. O Gerson aidifauku nënanga tatapu yodadi o imam o Dan aihoana gënanga hiädono maöraha o Israel manyawa yaao de yaumo o berera mahomoaika.

³¹O gomanga madulada o Mikha wadodiai gënanga tatapu o Laisoka madekana de magurutu ma Jou Ai Tau naga o Siloka.