Read Tobelo O HAKIM-HAKIM 19 Bible Online

O HAKIM-HAKIM 19 - Tobelo bible

O HAKIM-HAKIM 19

¹Maöraha o Israel koiwahi toönanga manga koano, naga o Lewi manyawa womatengo wogogere o pedalamanoka o Efraim madaera de mal̄oku-l̄okuoka. Unanga womi l̄ë o ngoheka moma tengo o Betlehemino o Yehuda matonakoka modadi ngoi hekata paliara.

²Mä ipaha o ngoheka gënanga mi ngamo unangika, hiädono munanga molio ami ama ai tauika o Betlehemoka. Ipahaika o ngoheka gënanga mogogere dokengoka o mede iata madekana,

³o Lewi manyawa gënanga woiki womihi duruika munanga mangale womi baja molio unangika. Unanga woiki de wiao ai gilaongo womatengo de o keledai o dutu hinoto. Womahi ädonika dokebngoka, o ngoheka gënanga miao ünanga ami amaika. Maöraha o ngoheka ami ama gënanga wimake ünanga, ünanga wi buhuku dewo more-morene,

⁴de wigegoto hupaya uha ünanga wolio. Karana gënanga, ünanga wogogere o wange hange madekana de wol̄omo wokere de woma idu genangoka de ngoi hekata paliara gënanga.

⁵Mawange iatoka, önanga yomomiki duru kao ngoru-ngoruminohi daha ima hidiai mangale imä jobo. Mä o ngoheka ami ama gënanga witemo o Lewi manyawa gënanga, ”Ni ol̄omokahi hupaya niputurungu. Ipaha ngini yakunu nimä jobo.”

⁶O Lewi manyawa gënanga wogogere daha yol̄omo de yokere imako moteke de o ngoheka ami ama gënanga. Mä maöraha ünanga woma oko womau womä jobo, o ngoheka ami ama gënanga wibaja hupaya uha yoiki. ”Nomahi sosanangohi,” witemo, ”de noma idu nenangoka.” O Lewi manyawa gënanga wogogere o hutu moioli genangoka.

⁸O wange mamotoaka, duru o ngoru-ngoruminohi maöraha ünanga womau womä jobo, o ngoheka ami ama gënanga wotemoli, ”Ika, niol̄omokahi; botino daha nimä jobo.” Daha önanga yahinoto imahi ko moteke yol̄omo de imahi kokapanga hiädono o wange imulaenge itumunu.

⁹Ipaha, maöraha o Lewi manyawa gënanga imako moteke de ngoi hekata paliara de ai gilaongo yomau imä jobo, o ama gënanga wotemo, ”O wange ngade yohutu, kabotinohi ihuhutu. Iholoi yaoa nimahi dodogumu dika nenangoka de nimahi sosanangi. Iyarehe ngini yakunu nimomiki nio ngoru-ngorumu mangale nimä jobo de nilio.”

¹⁰Mä o Lewi manyawa gënanga wolukoka woma iduloli genangoka. Unanga de ngoi hekata paliara ima goraka, imako moteke de ai gilaongo de ai keledai hinoto de magogogeroka. Maöraha o wange ngade yohutu, önanga imahi ädono itigioka o Yebus (enagënanga o Yerusalem). Daha o gilaongo gënanga wïtemo ai tuangika, ”Tuanga, niaino ngone hotulu de homa idu okahi dika o Yebus manyawa manga kota nënanga.”

¹²Mä ai tuanga wohaluhu, ”Kowali! Ngone aha yakunua ho ma togumu o ngï manyawa o Israelokaua manyawa. Niaino ngone hohi gila-gila nanga dodagi mahuhutulohi de damä homaidu o Gibeaka ekola o Ramaka.”

¹⁴Karana gënanga önanga yotagi gila-gila de ima togumua o Yebusoka. O wange itumunoka maöraha önanga imahi ädono o Gibeaika o Benyamin ai hoana madaeraoka.

¹⁵Onanga yotulu dokengoka mangale ima idu, daha yowohama o kotaika de yoiki yogogeruku o lapangoka. Mä o nyawa moiua ya ahokua önanga manga tauika la ima idu.

¹⁶Magogiriaka önanga yogogeruku o kota malapangoka, woboaino womatengo o dimono daha wolio ai manaramino o dumuleoka. Imoteke madiai unanga ai ahali o Efraim madaera dema l̄oku-l̄oku okaino maöraha nënanga wogogere o Gibeaka. (O Gibea manyawa mahomoa ganga o Benyamin manyawa.)

¹⁷Maöraha o nyawa o dimono gënanga wamake o Lewi manyawa gënanga o lapangoka, ünanga waleha, ”Riadodoto okiaino, de nia mau okiaika?”

¹⁸O Lewi manyawa gënanga wohaluhu, ”Ngomi daha miboa o Betlehemino o Yehudaka, de magogiria mia dodagi magoronaka milio mia tauika o pedalamanoka o Efraim madaera de ma l̄oku-l̄okuoka. Ngohi ahi ahali dokengino. O nyawa moiuaö o kota ma nyawaino nënanga yomau imi tarima ngomi la mima idu.

¹⁹Ngomi miparalua okianaga mahomoa, tongomi mia bilaono kayaoa. Naga o gandum maröehe madoolenge mangale tongomi mia keledai mainomo; naga o roti de o angguru mangale ngohi de ngohi hekata nënanga de tongohi ahi gilaongo.”

²⁰Daha o nyawa o dimono gënanga wato, ”Uha nohawatere, ngohi daha tini riwo. Ngaro uha nima idu o lapangoka nënanga.”

²¹Ipaha ünanga waao önanga ai tauika daha wohi döaka o inomo toönanga manga keledaika. De ya ado-adonino gënanga ya ihoro manga l̄ou ipaha, önanga yol̄omo.

²² Magogiriaka önanga imahi sosanangi, itodokanino o tau gënanga ihi gilolitoka o nyawa manga kalakuanga itotorou o kotaino gënanga. ”Onanga yapoha-poha o ngorana de yotemo o nyawa o dimonika gënanga, ”Nomi hilapahi ngomino o nyawa o nauru ngona niao-ao ani tauika. Ngomi mimau miwi pake unanga!”

²³O nyawa o dimono gënanga wohupu de wätemo onangika, ”Uha, Roriadodoto! Ngohi togahoko, uha nidiai o hali madorou de ipatu-patutua hoko gënanga, hababu ünanga tongohi ahi tamu.

²⁴Daha ngohi tinihi döaka dika nginika ngoi hekata paliara de tongohi ngohi ora o moholehe. Yakunu ngini nimahi sanangi nia diri dede onanga. Mä, uha nia diai okianaga itotorou to ngohi ahi nyawaika gënanga!”

²⁵Mä o nyawa manga kalakuanga itotorou gënanga kahirahi ima togowini, o Lewi manyawa ngoi hekata paliara gënanga womi hitomo womihi hupu mangale önanga. Daha önanga imi howono o ngoheka gënanga madodogumu koiwa hiädono o ngorumino.

²⁶Maöraha kai hohuhutu ohi o ngoheka gënanga molio, mä o nyawa o dimono gënanga ai tau mangorana mahimangoka, o ngï ami rokata womahi dododogumika, munanga mokiditoko. O wange ipotoka munanga kanagahi genangoka.

²⁷O ngorumino gënanga, maöraha ami rokata womomiki de wa helenga o ngorana la imä jobo, ünanga womi make ngoi hekata paliara moluluiha o tau mahimangoka gënanga de ami giama momahi jojoika o ngoranika.

²⁸”Nomomiki,” womitemo munangika, ”naino ngone homä jobo.” Mä o ngoheka gënanga mohaluhua karana mohonengoka. Daha, ünanga womigoraka o ngoheka gënanga de womihi barene ai keledai mal̄okuil̄e, ipaha imä jobo la yolio ai tauika.

²⁹ Imahi ädono o tauoka, ünanga wowohama de woma l̄ë o gakana ipaha walui-luiti ngoi hekata paliara ami mayeti gënanga idadi o luiti ngimoi de hinoto. Iböto gënanga, ünanga wohi dingoto madobi-dobiki gënanga o Israel manyawa manga hoana ngimoi de hinotoika, moi-moi oluiti moi.

³⁰Mata-mata o nyawa yamake gënanga yotemo, ”Komaiwahi o hali marupa nënanga idadi, maöraha o Israel manyawa yohupu o Mesirino hiädono o wange nënanga. Ngone yakunua homa rirïdi. Ngone homahi teke dailako mangale kiani hodiai!”