Read Tobelo O HAKIM-HAKIM 2 Bible Online

O HAKIM-HAKIM 2 - Tobelo bible

O HAKIM-HAKIM 2

¹Ma Jou Ai malaikat o Gilgal de yaino iyoiki o Bokhimika de yätemo o Israel manyawaika, ”Ngohi tinihihupuoka ngini o Mesir de niaino, de Tiniao ngini o bereraika tohijö jajajioka niaete de niatohoraika. Tohi demoli, ’O jaji maliliko Ngohi dede ngini nanga hidogoronaka aha Kota toakua.

² Hababu gënanga iyakunua ngini nidiai moi o jaji maliliko de o berera yogogogere nënanga. Toönanga manga huhuba-huhuba mangï kokiani ngini niakilianga.’ Mä ’ngini nia diaiua okia Ngohi tinihi popareta gënanga. I idulu yaino koaholi ngini niadiaioka imahowono de Tinihi poparetaka!

³Ho, o öraha nënanga ni ihene! Ngohi aha taduhuua o berera ma manyawa nënanga maöraha okia ngini nima teke parangi dede önanga. Onanga aha yodadi nia haturu-haturu, de ngini aha inimodoi, hiädono ngini nia nïki niahuba toönanga manga goma-gomanga.”

⁴Ipaha o malaikat gënanga ihiädono iböto o abari gënanga, o Israeloka manga hoana yongodumu yoari kohagiria.

⁵Hababu gënanga o ngï gënanga ihiromanga o Bokhim. Daha o ngïoka gënanga o Israeloka ihi huba manga huhuba ma Jouika.

⁶Ipaha o Yosua wäpidili o Israeloka manyawa yoiki, önango o imagoraka mangale yogogere o tonaka idadi toönanga manga hidokuoka moi-moi.

⁷Madekana de magurutu o Yosua wowango o Israeloka manyawa imahigilaongo ma Jouika. O Yosua wohonengokaö önanga kahirahi ima higilaongo ma Jouika madekana de magurutu önanga yätuda o nyawa yamö make-makeoka mahirete hagala ihö hera-heranga wadodiai ma Jou mangale o Israeloka manyawa.

⁸O Yosua o Nun aingohaka — ma Jou Ai gilaongo gënanga — wohonenge aiumuru o taongo o ratuhu moi de ngimoi.

⁹ Unanga iwijere aitonakoka mahirete, enagënanga o Timnat-Serah o Efraim madaira de mal̄oku madukuroka o Gas mal̄oku o koremieuku idaduoka.

¹⁰Ipaha ima kinïki o umuru moi gënanga mata-mataö yohonenge. De o ngohaka o umuru-o umuru maduruil̄e yanïkino iwi nakoua ma Jou, karena önanga yamaoua okia ma Jou wododiaioka mangale o Israeloka manyawa.

¹¹Ipaha o Israeloka manyawa yobaradoha ma Jouika. Onanga iwihuba okauaoli ma Jou, toönanga mangaete de mangatohora manga Jou Madutu, enagënanga ma Jou Madutu waaooka önanga yohupu o Mesir de yaino. Onanga yomulaenge yahuba o Baal de o Asytoret ikali hagala o womaha mahomoa yahö huba-huba hagala o hoana yahigogilolitino. Daha ma Jou wangamo onangika de wamal̄aika o doomu yororuae yaparangi de yäora önanga. Onanga imasikaua yahimanga hagala manga haturu yahigogilolitino önanga.

¹⁵Mahi geto-getongo önanga yoiki yoparangi, ma Jou walawani önanga, hokä wahitoihenoka onangika. Daha önanga yamao o huha duru koha amoko.

¹⁶Ma Jou wogogilio wahidöaka o tutuda onangika yoparangi mangale yahihupu önanga o doomu yo ö ora-oraino.

¹⁷Mä hagala o tutuda gënanga önanga yolegaikaua. Onanga yahuba hagala o gomanga mahomoa, deyosetiaua ma Jouika. Onanga yanïkua manga dulada toönanga mangaete de mangatohora ihingö ngou-ngounu ma Jou Ai pareta-paretaika.

¹⁸O öraha okia ma Jou wahi döaka o tutuda womatengo o Israel mangahoanika, ma Jou hoko gënanga wariwo o tutuda gënanga. De madekana o tutuda gënanga kawowangohi, ma Jou hoko genangika wahipidili önanga, toönanga manga haturu-haturuino. Unanga wadora önangika maöraha okia Unanga woihene toönanga manga daiyana karana ya aniaya de yätuku.

¹⁹Mä maöraha okia o tutuda gënanga wohonengoka, o hoana gënanga manga kalakuanga iholoi itorou de yohö hira-hira. Onanga ima higilaongo hagala o womaha mahomoaika de yahuba hagala o gikiri gënanga. Onanga yogilio toönanga manga biaha-biahaika itotorou de yoluku yangali toönanga manga kalakuanga.

²⁰Hababu gënanga ma Jou duru wongamo o Israel maumatika, de wotemo, ”Ngohi tohi paretaoka o hoana nënanga mangaete de mangatohoraika hupaya yasosö o jaji Ngohi dede önanga mia hidogoronaka. Mä o hoana gënanga yatoakoka o jaji maliliko gënanga; önanga yatilakuru Ahi pareta.

²¹O öraha nënanga Ngohi tolukokali Täduhu o hoana o kiainoö dika kanagaohi o bereraka nënanga maöraha o Yosua wohonenge.

²²Ngohi aha tapake hagala o hoana gënanga mangale yauji o Israeloka manga hoana, hupaya ngohi Tohioriki boteka o Israeloka manyawa yomau yanïki Ahi pareta-pareta hokä toönanga manga ete de manga tohora, ekola kowali.”

²³Hababu gënanga ma Jou wahidöakua o utumu o Yosuaika mangale hagala o hoana gënanga. I idulu yaino ma Jou wamal̄aika önanga yogogere o bereraka gënanga, de madataitua wäduhu önanga.