Read Tobelo O HAKIM-HAKIM 21 Bible Online

O HAKIM-HAKIM 21 - Tobelo bible

O HAKIM-HAKIM 21

¹Maöraha o Israel manyawa imatoomu o Mizpaoka, önanga yojajioka ma Jouika o nyawa moiuaö onangino aha yahi gumal̄a manga ngohaka o moholehe yodadi o Benyamin manyawa manga hekata.

²O öraha nënanga önanga yoiki o Betelika de yogogeruku manga hininga ihuha hiädono yohutu ma Jou Ai himangoka. Onanga yoari de yopöaka,

³”Ya Jou, o Israel manga Jou Madutu, yadodoa mata-mata nënanga kiani idadi? O Benyamin aihoana, o hoana moi tongomi mia nyawa, ngadeke ihihanga!”

⁴Iyarehe mawange, duru o ngoru-ngorumino, o Israel manyawa ihi goko moi o huhuba mangï genangoka, daha ihihuba ma Jouika o huhuba ituhu-tuhuku de o huhuba o dame.

⁵Ipaha önanga yatailako o Israel manyawa manga hoana-hoana mahi dogoronaka boteka naga yoikua imatoomu iwi himanga ma Jou mahira o Mizpaoka. (O öraha gënanga önanga yokobotoka o nyawa yamotekua o gogahoko o Mizpaika kiani yahukumu yohonenge.)

⁶O Israel manyawa yadora toönanga manga roriadodotika o Benyamin ai hoana; önanga yato, ”O wange nënanga o Israel manga hoana moi ihihangoka.

⁷Ngone kiani okia hodiai hupaya o Benyamin manyawa mahou-hou nënanga yakunu toönanga de manga hekata, karana ngone ho kobotoka ma Jouika, ngone aha hahi gumal̄aua tongone nanga ngoha-ngohaka o moholehe yodadi o Benyamin manyawa manga hekata?”

⁸Daha önanga yatailako boteka naga o doomu moi o Israel ma nyawa manga hoanino yoikua ima toomu o Mizpaoka. De önanga yamake o Yabesino manyawa o Gileadoka, o nyawa moiuaö yoikoka o Mizpaika.

⁹Karana, maöraha yatailako yobö boa-boa mabuku, inyata yamakeua genangoka o nyawa ima tengo o Yabesino.

¹⁰Hababu gënanga, o nyawa ima totoomu o Beteloka gënanga yahi dingoto o nyawa yaribuhu ngimoi de hinoto duru yobo barani toönanga manga hidogoronaka la yätoma o Yabes manyawa moi-moi, idogoika o ngongoheka de o ngoha-ngohaka.

¹¹Onanga yahi pareta la yätoma o nyawa o nauru mata-mata, de o ngoheka moi-moi o moholehe maboro okauaoli.

¹²O nyawa yogö gogogere o Yabesoka manga hidogoronaka gënanga, önanga yämake yaratuhu iata o moholehe maborohi. Onanga yaao o momoholehe gënanga o puji ma tau o Siloka ma gogere o Kanaan mabereraka.

¹³Ipaha o Israel manyawa yongodumu ihi dingoto manga huhuloko o Benyamin ma nyawaika naga ol̄oku ihohelewoka o Rimonoka mangale yahi leha o dame.

¹⁴Mahababu gënanga o Benyamin manyawa gënanga yolio, daha o Israel manyawa yahi döaka onangika o momoholehe o Yabesino yatoma-tomaua gënanga. Mä manga gegetongo o mo moholehe gënanga ima kadonua mangale o Benyamin manyawa gënanga.

¹⁵O Israel manyawa yamao yadora o Benyamin manyawaika, karana ma Jou wawederoka o Israel manyawa manga hoana-hoana ma rimoi.

¹⁶Hababu gënanga, ihibö balu-baluhu ima toomu o Beteloka gënanga yato, ”Benyamin aihoana magoronaka koiwakali o ngoheka. Mä hoko gënanga iböto; ngone hakunua hahi gumal̄a tongone nanga ngoha-ngohaka o moholehe yokawingi dede önanga, karana ngone hohi kobotoka o nyawa moi-moi tongone nanga hidogoronaino yä higumal̄a manga ngohaka o moholehe yokawingi de o Benyamin manyawa woma tengo! Hö, okia kiani ngone hodiai mangale önanga mahou-houohi nënanga hupaya yakunu to önangö dede manga hekata? Uha hiädono o Israel o hoana ngimoi de hinoto de ihihanga moi. Ngone kiani holingiri o ngekomo hupaya o Benyamin ai hoana yakunu toönanga gila-gila de manga difauku de tatapu yamake manga tonaka mata-mata.”

¹⁹”Hoko nënanga,” önanga yato, ”naga o ngekomo moi, enagënanga maöraha o rameanga o taongo magetongo mangale ma Jou o Silkoka.” (O Silo o koreharail̄e idaduoka nënanga naga o Betel ma kota, de o wange madumuniha idaduoka naga o Betel ma ngekomo ma amo-amoko o Sikhemika, hode o koremieuku idaduoka naga o Lebona makota.)

²⁰Daha ihibö balu-baluhu ima totoomu o Beteloka gënanga yatemo o Benyamin manyawa ma hou-houika gënanga, ”Nioiki ngini nima ngiunu o angguru madumule-dumuleoka o Siloka,

²¹de nia goa-goana genangoka. Dama nako o Silo mamomoholehe yohupu la yoselo hokokia madekana o rameanga o taongo higetongo mangale ma Jou, ngini kiani nihupu o angguru madumule-dumuleino gënanga. Daha moi-moi kiani nima dagoko o moholehe momatengo toönanga manga hidogoronaino de nia hioara o Benyamin madaeraika mangale nia hidadi nia hekata.

²²Nako manga ama ekola manga ira-iranga yoboa de imi tuntutut munanga, ngini yakunu nitemo, ’Ngomi migahoko, nia mal̄aika önanga ngomioka. Ngomi mia oraua önanga o parangi magoronaka. De karana ngini nimihi döakua önanga ngomino, ngini nia tilakurua nia jaji, hoʼ nia howonua.’ ”

²³Daha o Benyamin manyawa yadiai okia yatemo onangika. Onanga moi-moi yahi oara o moholehe momatengo o momoholehe manga hidogoronaino yosö selo-selo o Siloka. Ipaha önanga yolio toönanga manga daeraika mahirete de ihi gokoli manga kota-kota daha yotatapu dokengoka.

²⁴O Israel manyawa mahomoaö gënanga yoikoli. Onanga yo lio toönanga manga tonakika toönanga manga daera moi-moi ma goronaka imoteke manga hoana-manga hoana de manyawa.

²⁵ O öraha gënanga o Israeloka koiwahi naga manga koano. O nyawa moi-moi yodiai okia yapulono itiai.