Read Tobelo O HAKIM-HAKIM 3 Bible Online

O HAKIM-HAKIM 3 - Tobelo bible

O HAKIM-HAKIM 3

¹Mangale wäuji o Israeloka manyawa komaiwahi yamao o parangi o Kanaanoka, ma Jou wämal̄aika o hoana muruono naga yogogere o bereraka gënanga.

²Ma Jou wodiai gënanga duga-duga de ai dungutu wadotoko o Israeloka moi-moi manga bätuku yoparangi, maboboloi önanga komaiwahi yonïki yoparangi.

³Hagala o hoana de o berera maago-agomo kayogogerohi o berera gënanga ganga; o hoana yogogere o Filistin makota motoa magoronaka, o Kanan ma hoana mata-mataika, o Sidon mahoana, de o Hewi mahoana yogogogere o Libanon mal̄okuoka, mulaenge o Baal-Hermon de yaino hiädono o ngekomo mameta o Hamatika.

⁴Onanga naga dokengoka mangale yodadi o cocoba mangale o Israel manga hoana. De hoko gënanga yakunu ihiöriki boteka o Israel manyawa yamoteke hagala o pareta ma Jou wohidoa-doakoka toönanga manga ete de manga tohoraika itilakuru o Musa.

⁵Hababu gënanga o Kanaan manyawa, o Het, o Amori, o Feris, o Hewi de o Yebus kahirahi imakogogere moi o berera de o Israeloka manyawa.

⁶O Israeloka maumati yokawingi imakaganu de hagala o hoana gënanga, de yonïki yahuba toönanga manga gomanga.

⁷O Israeloka maumati yobaradoha ma Jouika, toönanga manga Jou Madutu. Onanga iwiwohanga unangika hiädono önanga yapuji o Baal de o Asyera magomangika.

⁸Daha ma Jou wangamo o Israel maumatika, de wamal̄aika önanga wautumu ma Koano Kusyan-Risyataim o Mesopotamiaino. O taongo tufangeino madekana ma koano gënanga wakuaha önanga.

⁹Ma duruino o Israel maumati imahiböaka yogahoko o roriwo ma Jouika, daha ma Jou wahidöaka o Otniel mangale wahilapahi önanga. (O Otniel ganga o Kenas aingohaka, o Kaleb aidodoto.)

¹⁰Ma Jou Ai womaha iwikuaha o Otniel hiädono ünanga wodadi o Israel maumati manga tutuda. Unanga woiki woparangi, daha ma Jou wihidöaka o utumu unangika mangale ma koano Mesopotamia.

¹¹Daha o berera gënanga irïdi o taongo moruata madekana. Ipaha o Otniel wohonenge.

¹²O Israeloka maumati yobaradohali ma Jouika, hiädono ma Jou wadiai o Eglon, ma koano Moab, wodadiiholoi wokuata ngaro de o Israeloka.

¹³Ma Koano Eglon imakodogo de o Amon de o Amalek manyawa, daha yähihanga o Israel manyawa, ipaha o Yerikho yäora, o korma makota gënanga.

¹⁴O taongo ngimoi de tufange madekana o Eglon wä paretauku o Israeloka manyawa.

¹⁵Maöraha o Israeloka maumati imahiböaka yogahoko o roriwo ma Jouika, Unanga wahidöaka o Ehud mangale wahilapahi önanga. O Ehud o nyawa moi wohigili; ünanga o Gera aingohaka o Benyamin ai ahalino, de ünanga biaha wotö totaka o Israel maumati manga soungu kokiani yofangu ma koano Eglonika.

¹⁶O wange moiuku o Ehud woma dutuku moi o oworo mahimanga de maporete kama doto, magurutu ngadeke o metere mahononga. O oworo gënanga ünanga womahi hurukuku aigoronaino manirakoka aibaju magoronaka,

¹⁷daha woiki wohilapahi o Israeloka maumati manga soungu ma Koano Eglonika. O koano gënanga duru kaiburere.

¹⁸Wohilapahi iböto o soungu gënanga, o Ehud wähuloko yolio o nyawa yamö moku-moku o tiwi o gurasi gënanga.

¹⁹Mä o Ehud mahirete womatogumu maöraha womahiadono o helewo igogaradeoka ima datekuku o Gilgal, daha womaidulu o Eglonika. Oraha gënanga o Eglon naga aikadatoka makamari malape il̄oku-l̄okuoka womahi mämata. O Ehud wato o Eglonika, ”Koano nomomulia! Ngohi toao o abari irorahasia mangale tuanga.” Ma koano wato, ”Wahiohi,” daha ünanga wapareta mata-mata ai gilaongo hupaya yohupu iwimal̄a ünanga de o Ehud womatengo okahi. Ipaha, o Ehud womahitigi ma koano magogiria wogogeruku, daha wotemo, ”Naga o abari ma Jou Madutuino mangale ahi tuanga!” Woihene gënanga, ma koano womaoko.

²¹Gila-gila o Ehud warahuku aioworo de aigiama mahigili aigoronaino ainirakoka, daha witopoko ma koano aimamataoko kohalukuoko. Ma oworo madoto mata-mata gënanga hiadono maotinö maiwohama hagala aihaki magoronaika ma koano aimamataka gënanga, hiädono itotara aiporetoko. O Ehud wohi dogumal̄aika o oworo gënanga, genangokadau,

²³daha wohupuikali wabeno de ma kamari mangorana makusi,

²⁴ipaha woma joboka. Maöraha ma koano ai gogilaongo yoböa de yamake o kamari mangora-ngorana gënanga ikusiino, önanga yatobote ma koano kanagahi magoronaka de magogiria wohupu maporetika.

²⁵I yaoaka madekana iwi damä de ma koano wahelengaua dika o ngorana, önanga ima hiorikokaua daha ya l̄e o kusi daha yahelenga o ngorana gënanga. Inyata toönanga manga koano worubauku o lante ma l̄okuoka wohonengoka.

²⁶O öraha utu önanga kayo tamaohi, o Ehud wohi oara ai diri o Seirika watilakuru o helewo igogarade.

²⁷Woma hiadonoka o Efraim madaira de mal̄oku maduku-dukuroka, woma tai-taiti ünanga wawuwu o trompet mangale waahoko o Israeloka manyawa yoparangi. Onanga yoboa daha ünanga watuda önanga youti madaira de mal̄oku maturungoka de yauku.

²⁸Wätemo onangika, ”Nihi nïki ngohi,” ”ma Jou wahohihangoka o Moab manyawa, niahaturu gënanga mangale ngini.” O Ehud aitutuda matimioka, o Israel manyawa gënanga ol̄okuoka de yauku youti. Onanga yojai-jai o ngï o Moab manyawa yodobo-dobongo o Yordan mangairi. O nyawa moiua manga haturuino gënanga yamal̄aika yotobongo de manga halamati.

²⁹O parangi gënanga magoronaka önanga yätoma done hoya ribuhu ngimoi o Moab manyawa manga tentara yaoa-oa; koiwa naga yootana.

³⁰O wange gënaga o Moab manyawa yautumua o Israel manyawaika, daha o berera gënanga irïdi o taongo mori tufange madekana.

³¹O tutuda ituruinoli enagënanga o Samgar o Anat aingohaka. Unangö wopoparangi de wahilapahioka o Israel manyawa. De ai diki-diki wohidöduhu-duhu o hapi, wahitoma o Filistin manyawa yaratuhu butanga.