Read Tobelo O HAKIM-HAKIM 4 Bible Online

O HAKIM-HAKIM 4 - Tobelo bible

O HAKIM-HAKIM 4

¹O Ehud kade wohonengoka, o Israeloka manyawa yobaradohaokali ma Jouika.

²Ma Jou wamal̄aika o Yabin o Kanan manga koano wogögogere o Hazur makotaka wahihangoka önanga. Aitentara yopoparangi manga kapita enagënanga o Sisera wogogere o Haroset-Hagoyim mabereraka.

³O Yabin toünanga ai kereta ihipoparangi o behi o ratuhu hiwo. O taongo monaokino madekana ünanga waparetauku o Israeloka manyawa de mabuturungu. Ipaha önanga imahi boaka yogahoko o roriwo ma Jouika.

⁴O öraha gënanga o Israeloka yatötuda-tuda ganga o nabi ongoheka momatengo amiromanga o ngo Debora, o Lapidot ngoihekata.

⁵O ngo Debora amibiaha mogogere o korma mautu matimiuku o Rama de o Betel mahidogoronaka, o Efraim aidaira de mal̄oku de mabuturungoka. De genangoka o Israeloka manyawa yoboa munangika yogahoko mangale amidibanga.

⁶O wange moiuku munanga mahuloko o nyawa iwiahoko o Barak, o Abinoam aingohaka, o Kades makotaino o Naftali aidaeraoka. Daha munanga mitemo o Barakika, ”Nenanga ma Jou Ai pareta ngonaika o Israeloka manga Jou Madutu: Natoomu o nau-nauru yaribuhu ngimoi o Naftali de Zebulon manga hoanino, de naao önanga o tabor mal̄okuika.

⁷Damä ngohi tidiai o Sisera, o Yabin aitentara yopoparangi manga kapita, winingika ngini o Kisyon ma Ngairoka de aitentara de hagala aikereta ihipoparangi mangale iniparangi ngini. Mä ngohi aha tinihidöaka o utumu nginika o parangi gënanga magoronaka.”

⁸O Barak womitemo o ngo Deboraika, ”Nako ngona noiki, ngohi tomau toiki. Mä nako kowali, ngohiö toluku toiki.”

⁹O ngo Debora mohaluhu, ”Kayaoa, ngohi aha tonïki! Mä nomhininga, ngonaua aha namake o horomati. Itilakuru ongoheka mo matengo ma Jou aha wihihanga o Sisera.” Daha o ngo Debora moma jobo imanïki de o Barak o Kadesika.

¹⁰De o barak watoomu o Zebulon de o Naftali manga hoana o Kadesika. Yanïki o Barak de o ngo Debora öraha gënanga naga o nyawa yaribuhu ngimoi.

¹¹O öraha gënanga o Heber, o Keni manyawa moi, wohi tingakoka aidiri de aihoana. (O Keni aihoana ganga o Hobab aidifauku, o Musa aigeri.) O Heber woikoka wohigoko aitau-tau imadatekuku o terpatin mautu o Zaanaimoka, ikurutikaua de o Kades.

¹²De majapatioka o Sisera woihene, o Barak woi koka o Tabor ma l̄okuika,

¹³ünanga watoomu aikereta o behi ihipoparangi gënanga o ratuhu hiwo, imakao de manga duduono mata-mata daha waao önanga o Haroset-Hagoyim de yaino o Kisyon mangairika.

¹⁴Daha o ngo Debora mato o Barakika, ”Ika, notagi mahimangika! Ma Jou wonituda. O wange nënanga Unanga woni hi döaka o utumu ngonaika mangale o Sisera.” Daha o Barak wouti o Tabor mal̄okuoka de wauku imakao de yaribuhu ngimoi ainyawa,

¹⁵Ipaha iwi parangi o Sisera. De ma Jou waruae o Sisera mata-mata ai duduono de hagala aikereta ihipoparangi, hiädono o Sisera wouti ai kuretaka, daha wohioara aidiri kawoma dagi.

¹⁶O Barak waginïki hagala o kureta ihipoparangi de manga haturu manga duduono gënanga hiädono o Haroset-Hagoyim daha o Sisera aiduduono mata-mata gënanga wakoki toma; kaö nyawa moiö yamal̄aua yowango.

¹⁷O öraha gënanga o Sisera woara ongo Yael ami tauika, o Heber ngoi hekata o Keni manyawa gënanga. Hababu, ma Koano Yabin o Hazorino imahobata de o Heber aitau manyawa gënanga.

¹⁸Maöraha o Sisera woboa, ongo Yael mitarima de mitemo, ”Naino tuanga, nowohama dika tongohi ahi tau-tau magoronaika; ngaro uha nohawana.” Daha o Sisera wowohama o tau-tau gënanga magoronaika daha ongo Yael mitamunuku de o ngorana madadatoko hupaya ünanga womangiunika.

¹⁹O Sisera womitemo ongo Yaelika, ”Togahoko nohihi döaka ngohi o akere mahuhutulu mangale tokere; ngohi ahikiriti madudungu.” Daha ongo Yael mahelenga o kadu-kadu o aiwani makai o susu magogono mangï, daha mihidöaka o Siseraika wokere, ipaha mitamunokali de o ngorana madadatoko.

²⁰Daha o Sisera womitemo o ngo Yaelika, ”Noiki noma okoino o tau-tau mangorana mahimangoka. Nako o nyawa yoboa de inileha ngonaika boteka naga o nyawa nenangoka, nato moiua.”

²¹O Sisera hoko gënanga iwibole hi ädono ünanga wokadukadunu daha woma iduoka de ainihu-nihuku. Ongo Yael mal̄e moi o tataka de mangale moi o tau mahuhuro daha de komo ilingikaua munanga momahi tigi o Siseraika. Ipaha munanga modoboha o tau mahuhuro gënanga aipongo-pongo mahidogoronauku hiädono itotara o tonakuku. Hokogënanga ongo Yael mitoma o Sisera.

²²Maöraha o Barak woboaino wilingiri o Sisera, ongo Yael mitarima o Barak de mitemo unangika, ”Naino, ngohi aha toni hidumutu ngonaika o nyawa nilö lingi-lingiri gënanga.” O Barak wowohama ima nïki de ongo Yael, daha wimake o Sisera wohonengoka, worubaiha o tonakoka de o tau mahuhuro ibelohuku aipongo-pongo mahi dogoronauku.

²³O wange gënanga ma Jou wahidöaka o utumu o Israel manyawaika mangale o Yabin o Kanaan manga koano.

²⁴O koano gënanga iholoi itedekana iholoi iwituku o Israeloka manyawa hiädono mabaha ünanga wobinaha.