Read Tobelo O HAKIM-HAKIM 5 Bible Online

O HAKIM-HAKIM 5 - Tobelo bible

O HAKIM-HAKIM 5

¹O wange gënanga ongo Debora de o Barak o Abinoam aingohaka yonyanyi. Hoko nënanga mabetongo:

²O higiriri ma Jou, hababu o Israeloka yonö nau-nauru yo mauoka mangale yoparangi, de o kawaha ima hidiaioka yoiki yoparangi.

³Ni ihene hei o kokoano de manga ngoha-ngohaka, ngohi tonyanyi o Israeloka manga Jou Madutuika, enagënanga o Jou.

⁴Maöraha ngona nomagoraka o Seir de naino, ya Jou, de o Edom madaira ngona namal̄a, o dunia ihahara, o heli-heli o dihangokaö ihelenga, de o lobi yapuraraha maakere.

⁵ Hagala o l̄oku igiwi o Sinai wakokuaha Ai himangoka, o Jou Ai himangoka, o Israel manga Jou Madutu.

⁶Maöraha o Samgar, o Anat aingohaka, de maöraha ongo Yaelö moiua yotagi-tagi o tonaka makokakahaka o bereraka, moiua yotagi-tagi o ngekomo ma ago-agomoka.

⁷O Israeloka manga kota-kota koiwa magogoana, duru kairidika hiädono ngona noboa, Debora; ngona noboa hokä o ayo mototo dora.

⁸Maöraha o Israeloka mulaenge yahuba o gomanga, idadi o parangi toönanga manga bereraka; yaribuhu moruata manga hidogoronaka o hoana yonö nau-nauru, moiuaö imä goraka manga dae.

⁹O Israeloka manga kokapitaika ima daubutu manga diri de manga hininga mangigo, tohi ädono ahi horomati, koha luku-luku. O higiriri ma Jou!

¹⁰Hei ngini nio bare-barene o keledai magare-garehe, ngini nio gogeruku o tikara mal̄okuoka, de ngini mata-mata kanimadö dagi-dagi nihi abari o utumu majarita nënanga!

¹¹O humu yatö tigi-tigino hoihene o nyawa yorame yonyanyi ihi rorahai, ma Jou Ai utumu hohi jarita hogogilio, o Israeloka manga utumu, ma Jou Ai umati. Onanga ima tuduono, yameta o kota mangorana ma amo-amo kika.

¹²Noma oko Debora, de nogoraka o nyanyi. Noma oko Barak, nä ao yatumu-tumunguku!

¹³O nyawa yonau-nauru mahou-hou yoboa manga tutudaika, önanga yoboa, de imahidiai mangale yoparangi mangale unanga.

¹⁴Onanga imadagi o Efraim de yaino o wai ika, yänïki o Benyamin ai doomu yotuo-tuono toönanga manga himangoka. O Makhir de yaino yokokapita de o Zebulonino yomomiki yo nö nau-nauru.

¹⁵O Isakhar yahibö balu-baluhu yoboa ima kinïki de o ngo Debora, ya, o Isakhar woboa, de o Barakö wonïki; önanga imanïki ünanga ya uti o wai. Mä o Ruben ai hoana yakunua yatantu manga jako, hababu toönanga manga hidogoronaka hamakeua odemo o rimoi moi.

¹⁶Yadodoa o nanga yogogere o duba-duba mahi dogoronaka? Boteke mangale ihi gihene o gogoana wä ahoko ai aiwani? I goungu o Ruben ai yakunua yatantu manga jako, hababu toönanga manga hidogoronaka hamakeua o demo orimoi.

¹⁷Maöraha o Zebulon de o Naftali yoparangi kohagiria o parangi madairaoka, o Dan ai hoana kaimä gogeruku o kapaka, de o Gad ai hoana kahirahi imagö gogere o Yordan o wange mahiwaroka, ikali o Asyer aihoana kaima rirïdoka deʼ yoluku imahi ditoko, toönanga manga ngïoka o hohona magurutu.

¹⁹O Taanakhoka, itigi o Megido ma ngairika, o kokoano ima teke poparangi, o Kanan ma kokoano yoparangi, mä o haaka koiwa önanga yao hokä o banakonino.

²⁰Hagala o murumuö inïki iparangi iwi lawani o Sisera, toönanga manga ngï ino yakokilolitino o gitawaoka.

²¹O Kison mangairi i hebu-hebulu yahi nahini o haturu. Notagi ani himangiha, notagi ani himangiha de noma nau-nauru, hei ahi jiwa!

²²De majapati o kuda mahoata madibïngi mangale wagohara wobare-barene nuku.

²³”Nohilai o Meros, de yogö gogerika,” ma Jou Ai malaikati yato, ”hababu önanga yoboaua ihi döaka o roriwo hokä yonö nau-nauru yoparangi mangale ma Jou.”

²⁴Mo utumu ongo Yael, o Heber ngoi hekata o Keni manyawa; o tau ma dol̄aino mata-mata, munanga duru imihi barakati.

²⁵O Sisera wogahoko o akere, mä munanga mihi döaka o susu unangika, mihidöaka osusu o udo-udomo magoronaka ipatu-patutu mangale o kokoano.

²⁶De otau mahuhuro de o tataka ami giamoka, ongo Yael migohara o Sisera hiädono aihaeke iwedere.

²⁷Ongo Yael ami l̄ouku woduruba koiwa ainyawa woluluiha o tonakoka wamake aiajali.

²⁸O Jangela mataralino o Sisera ngoi ayo mopulo-pulono de motemo, ”Yadodoa aikereta, itaituaiboa, yadodoa hoihenua aikuda madihihiri?”

²⁹Yososawaro yolöleleani manga hidogoronaka ihi döaka o bobaluhu yamakeoka mahirete manga hininga ma goronaka:

³⁰”Onanga magogiria ima hikodoku okia honanga yaora-oraino, mangale o tentara mahi getongo, momatengo ekola yahinoto o moholehe maboro. Mangale o Sisera, ai baju duru maroragane, mangale ngoi hekata, o salendang ihihihu irupa-rupaka marupa.”

³¹Tanu Ani haturu-haturu, ya Jou, yohihanga hokä o Sisera, mä mata-mata Ani dodiawo youtumu hokä o wange o gitawaoka! Ipaha gënanga, irïdi o berera gënanga o taongo moruata ma dekana.