Read Tobelo O HAKIM-HAKIM 6 Bible Online

O HAKIM-HAKIM 6 - Tobelo bible

O HAKIM-HAKIM 6

¹Ihi galioli o Israeloka maumati yobaradoha ma Jouika, hiädono Unanga wamal̄aika o Midian manyawa yakuaha önanga o taongo tumidi madekana.

²O Israeloka manyawa hoko genangika yamodongo o Midian manyawaika, hiädono önanga imangiunu hagala o aruku magoronaka de hagala o ngï mahomoa irïridi ol̄oku-l̄okuoka.

³Idogoli o dodumule magetongo o Israeloka imadatomo o dadatomo, o Midian manyawa yoboa ima kinïki de o Amalek ma nyawa de o nyawa mahomoa o tonaka makokakahaino yaparangi o Israeloka manyawa.

⁴Onanga imatau-tau o Israel manga dairaoka de yabinaha mata-mata manga dadatomo dokengoka hiädono o Gaza madaira yakilolitino o koremieil̄e idaduoka. Manga aiwaniö o duba, o hapi de o keledai to Israeloka maumati yao ihioara. Koiwa okianaga moiö önanga yamal̄aika, hiädono o Israeloka ma umati koiwa toönanga manga inomo imata-mataka.

⁵O nyawa gënanga yoboa kayotuo-tuono de manga aiwani de manga tau, önanga o gegetongo magoronaka duru komanga ngoë. Onanga de hagala manga onta iwoë holi mangale hakunua haetongo. Onanga yoboa yakilianga o berera gënanga,

⁶de o Israeloka maumati o kia-kiaua yakunu yodiai onangika.

⁷Ipaha o Israeloka maumati imahi böaka yogahoko ma Jou wäriwo önanga yalawani o Midian manyawa.

⁸Ma Jou wihuloko o nabi womatengo onangika. O nabi gënanga wato, ”Hoko nënanga ma Jou wato, o Israeloka manga Jou Madutu: ’Ngini, Ngohi tinihi pidiloka o gilaongino o Mesir mabereraka

⁹Ngini Tihihalamatoka o Mesir manyawaino de o nyawa o bereraino nënanga inipoparangi ngini. Onanga Tatudaka o bereraino nënaga maöraha ngini nia parangi önanga, daha tinihi döaka toönanga manga tonaka nginika.

¹⁰Ngohi totemoka nginika Ngohila o Jou nia Jou Madutu, de ngini yakunua niahuba o Amori manyawa manga goma-gomanga, öraha nënanga ngini niogogere. Mä ngini niamotekua Ahi pareta.’ ”

¹¹O wange moiuku ma Jou Ai malaikat iboa o Ofra ma kotaika, daha igogeruku o terpentin mautu matimiuku to Yoas madutu womatengo o Abiezer manyawa manga doomuino. Aingohaka airomanga o Gideon, magogiria wohidoro o gandum o angguru madedeo mangïoka. Unanga wodia gënanga dekawoma ngiu-ngiunu hupaya uha iwimake o Midian manyawa.

¹²Ma Jou Ai malaikat gënanga imahimatoko madiri unangika de iwitemo, ”Hei, goduru nonau-nauru! Ma Jou wonitomoteke!”

¹³O Gideon wohaluhu, ”Uha nohingamo tuanga! Nako igoungu ma Jou nomitomoteke ngomi, yadodoa hagala o hali nënanga imi tapal̄u ngomi? Kiaka hagala ihera-heranga ma Jou wadodiaioka mahira de imi ade-adeoka tongomi miaete de miatohora mangale sarakia ma Jou wahihupuoka önanga o Mesirino? Oraha nënanga ma Jou womï mal̄a ngomi de womi mal̄aika ngomi imi kuaha o Midian manyawa.”

¹⁴Ipaha ma Jou wohidöaka o pareta nënanga o Gideonika, ”De ani kuata ingodu-ngodumu noiki nahilapahi o Israeloka manyawa o Midian manyawa manga kuahaino. Ngohila tonihuloko.”

¹⁵O Gideon wohaluhu, ”Yadodoa ngohi, Jou? Kiaka yakunu ngohi tahilapahi o Israeloka maumati o Midian manyawa manga kuahaino. O Manasye aihoana magoronaka, ahinyawa duru yobole. De tongohi ahi tau manyawaö magoronaka ngohioli mä okia-kiaua ihi daene.”

¹⁶”Maraioka ngona yakunu!” ma Jou wato, ”hababu ngohila aha Tonï riwo. O Midian manyawa aha yakunu nawedere de magapanga, matero-tero ngona nahimanga duga-duga o nyawa woma tengo dika.”

¹⁷O Gideon wohaluhu, ”Nako ngohi igou-goungu wohi igo, abe ika nohi döaka moi o nonako igoungu ma Jou wohidöaka o pareta gënanga ngohino.

¹⁸Ngohi togahoko Jou nako nomodeke nohi damaohi nenangoka hiädono ngohi tohidiai o inomo ma Jouika.” ”Kayaoa,” ma Jou wo haluhu, ”Ngohi aha tonï dama hiadono ngona noma idulu.”

¹⁹O Gideon wolio daha wahakai o kabingi magö o dutu moi, de wa l̄e o tarigu o kilo ngimoi, ipaha wadiai o roti i ragi-ragiua. Iböto gënanga o kabingi ma akeme gënanga wonoa o karajauku, de mateongo o bohoko magoronaka, daha mata-mata gënanga wao de wohidiai ma Jou Ai malaikatika magogiria i tamä o terpentin mautu matimiuku gënanga.

²⁰Ma Jou Ai malaikati gënanga iwitemo, ”Nakelengauku o kabingi ma akeme de o roti gënanga o helewo mal̄okuoka nënanga daha noguhe o kabingi ma akeme mateongo gënanga mal̄okuku.” O Gideon wadiai okia iwihi popareta unangika.

²¹Ipaha ma Jou Ai malaikati gënanga yatoakika magiama daha de o gota magogiria yasö ika de mabarene ënanga ihi tubalenge o kabingi ma akeme de o roti genanga youku imata-mataka. Ipaha o malaikati gënanga ihihangoka.

²²O Gideon wamao iboa-boaka unangika gënanga ganga ma Jou Ai malaikati mahirete. O Gideon de ai modongo wotemo, ”Tobodito ngohi, ya Jou Duru no ko Kurutil̄e! Hababu ngohi mi ma rihimangoka o biono de o biono de Ani malaikati!”

²³Mä ma Jou witemo unangika, ”Noma rirïdi! Uha nohawana. Ngona aha nohonengua.”

²⁴Daha o Gideon wohigoko o huba mangï moi dokengoka de wohiromanga ”Ma Jou o Lola ma Titi.” (O huhuba mangï gënanga kanagahi o Ofraoka, enagënanga o Abiezer manyawa manga kota.)

²⁵O hutu gënanga ma Jou wohidöaka o pareta nënanga o Gideonika, ”Nal̄e ani ama ai hapi manauru, enagënanga o hapi maoa-oa maumuru o taongo tumidi. Nakilianga o huba mangï ani ama wohigö goko-goko mangale o Baal, daha nakilianga o Dewi Asyera ihi nononako maliate o huhuba mangï mahonongaka gënanga.

²⁶Nohi goko madoomu ma l̄okuoka gënanga o huhuba mangï moi nohi datoroka de yaoa-oa. Ipaha o hapi manauru gënanga kamamoi kiani ngona natuhuku i ngodu-ngodumu hokä o huhuba mangale ma Jou. Na pake o Dewi Asyera ihi nononako ma liate ngona nakokiliangoka gënanga hokä o gota nohitö tuhu-tuhuku.”

²⁷O Gidion wäiriki o nyawa yangimoi ai gogilaongo daha yoiki yadiai okia ma Jou wohi poparetaka unagika. Mä karana ünanga wämodongo holi ai tau madol̄aika de ai kapongo manyawaika gënanga, ünanga wobaraniua wadiai o hali gënanga o wange-wange. Hoünanga wadiai maöraha o hutu-hutu.

²⁸Maöraha iyarehino o ngoru-ngorumino o kota manyawa gënanga yomomiki, önanga yamake o huba mangï gënanga mangale o Baal de ongo Dewi Asyera ihi nononako maliate irubaoka. Onanga yamakeö mangïoka gënaga ihi gokoka o huba mangï moi de yatuhukokali o hapi manauru hokä o huhuba.

²⁹Onanga imake leha o nyawa moi de moika, ”Onagona manga manarama nënanga?” Yatailako ihidodiai ibötoönanga iwimake wadiai o Gideon o Yoas aingohaka.

³⁰Daha önanga yato o Yoasika, ”Ani ngohaka wakiliangoka o Baal mahuhuba mangï de warubaka o Dewi Asyera ihi nononako maliate mahonongaka o huba mangï gënanga. Karana gënanga, ani ngohaka gënanga niao nihi hupu nenangino. Unanga kiani wohonenge!”

³¹Mä o Yoas wabaluhu iwilö lawa-lawanika mata-mata gënanga, ”Boteka ngini nia nïki o Baalika de nimau nio demo enanga? Onagona yanïki enangika, o wange nënanga aha yätoma! Nako o Baal igoungu o Jou Madutu, mal̄aika enanga mahirete ma diri yoriwo, hababu yakilianga gënanga ganga mahuba mangï.”

³²Karana gënanga o Yoas wätemo, ”Mal̄aika o Baal mahirete iwi lawani o Gideon, hababu ünanga wakiliangoka ma huba mangï,” ka öraha gënanga o nyawa iwihi romanga o Gideon ”Yerubaal.”

³³Oraha gënanga o Midian manyawa mata-mata, o Amalek de o hoana de o berera mahomoa o tonaka makokakahaka o Yordan o wange mahiwaroko ima toomuinoka. Onanga yatobongo o Yordan ma ngairi, de ima tau o Yizreel ma waioka.

³⁴Mä o Gideon ma Jou Ai Womaha iwi kuaha, hiädono ünanga wawuwu ai torompet mangale wa ahoko o Abiezer ai hoana manyawa hupaya yoboa idadi moi dede ünanga.

³⁵Unangö wahi dingoto ai huhuloko o Asyer, o Zebulon manga hoanika, o Naftali de o Manasye manga hoana — yaoa o wange ma hiwaroko yaoa o Yordan ma Ngairi o wange madumuniha, mangale yogahoko önanga yodadi moi dede ünanga. Onanga mata-mata yoboa mangale iwi riwo o Gideon.

³⁶Daha o Gideon wotemo ma Jouika, ”Jou, Ngona notemoka Ngona nomau nohipake ngohi mangale tahi lapahi O Israeloka ma umati.

³⁷Nako igoungu hoko gënanga, o tonaka ma l̄okuoka nënanga, mangï biaha ngomi miarë rero o gandum magobeoka, ngohi take lengaka o duba magogo iguti-guti. Nako i yarehe duga-duga o duba magogo nënanga dika o dumunitara ya pehaka, de matonaka kowali, gënanga ma nyonyata Ngona aha nohi pake ngohi mangale tahilapahi o Israeloka ma umati.”

³⁸Daha idadi hoko gënanga: Maöraha o Gideon womomiki i yarehe o ngoru-ngorumino de wateo o duba magogo gënanga, ünanga wamake o dumunitara ma akere o udo-udomo moi.

³⁹Daha ünanga wotemo ma Jou Madutuika, ”Jou, tanu uha nohi ngamo nako ngohi totemo mamoioli. Nohihi gumal̄a ngohi to diai o cocoba mamoioli de o duba magogo iguti-guti nënanga. Mamoioli nënanga kokiani maduba magogo nënanga dika ka hirahi madududungu, mä matonaka idadi ipehaka.”

⁴⁰O hutu gënanga ma Jou Madutu wadiai okia o Gideon wogahoko gënanga, hiädono iyarehino mangoru-ngorumino o duba magogo gënanga inyata madududungu, mä matonaka yo pehakoka karana o dumunitara.