Read Tobelo O HAKIM-HAKIM 7 Bible Online

O HAKIM-HAKIM 7 - Tobelo bible

O HAKIM-HAKIM 7

¹O wange moiuku o Gideon de ainyawa mata-mata yomomiki duru kao ngoru-ngoruminohi. Onanga yoiki de imä tau o Harod majobubu madatekoka. O Midian manyawa manga tau-tau naga onangoka de o koremieuku idaduoka, o waioka o More ma Doporono madatekoka.

²Ma Jou witemo o Gideonika, ”Ani nyawa yowoë holi. Ngohi toluku Tahidöaka o utumu onangika mangale o Midian manyawa, hababu done önanga ima tibanga önanga youtumu karana manga kuata mahirete, hiädono önanga ihi higiririua Ngohi.

³ Ho, nahi ngahu ani nyawaika, ’Onanga yamao yo hawana, kiani tai-taiti yamal̄a o Gilead mal̄oku nënanga de ima idulu manga tauika.’ ” Naga yamonaoko de yahinoti ma ribuhu o nyawa yolio; de duga-duga yaribuhu ngimoi yogö gogere.

⁴Daha ma Jou witemoli o Gideonika, ”Ani nyawa duru ka yo woëohi. Na ao önanga o ngairika. Doke ngoka aha Ngohi tätafi önanga mangale ngona. Nako Ngohi tonitemo ngonaika, ’O nyawa nënanga kiani woiki dede ngona,’ ünanga kiani woiki Mä nako Ngohi totemo, ’O nyawa gënanga yakunua woiki dede ngona,’ ünanga yakunua woiki.”

⁵O Gideon wa ao o nyawa gënanga o ngairika, daha ma Jou wötemo o Gideonika, ”O nyawa ya al̄e-al̄eme o akere hokä o kaho, kiani ngona natingaka de o nyawa mangale yokere yabukuuku.”

⁶Daha naga o nyawa yaratuhu hange ya al̄eme o akere manga giamoka; mahomoa mata-mata yokere ya bukuku.

⁷Ipaha ma Jou witemo o Gideonika, ”De o nyawa yaratuhu hange o akere ya al̄e-al̄eme gënanga, Ngohi aha tinihi bebasi ngini de tinihidöaka o utumu ngonaika mangale o Midian manyawa. Mahomoa nahuloko yolio.”

⁸Karana gënanga o Gideon wähuloko o Israeloka manyawa mahomoa mata-mata yolio sawaliua yaratuhu hange gënanga. Mata-mata manga bilaono de manga torompet ya l̄e to o nyawa yolö lio-lio gënanga. O Midian manyawa naga o waioka o Israeloka manyawa ima tau-tau mangï matimiuku.

⁹O hutu gënanga ma Jou witemo o Gideonika, ”Nomomiki, Gideon! Noiki naparangi o Midian manyawa manga tau. Ngohi tonihi döaka o utumu ngonaika mangale önanga.

¹⁰Mä nako ngona kano hawana, nihigaro o Pura, ani gilaongo gënanga nioiki nima nïki nia haturu manga tau-tauika.

¹¹Damä ngona aha noihene nia haturu okia ihi ade-ade, de o hali gënanga aha idadi ngona nobarani no parangi.” Daha o Gideon de o Pura yoiki, manga haturu manga tau-tau mari batingika.

¹²O Midian manyawa, o Amalek de o nyawa mahomoa o tonaka ma ko kakahaino, ima hikabarihi o kiaika honanga o waioka gënanga. Ha lega-lega hokä o kahoho dema tikaoka. Toönanga manga manga onta duru kohangoë hokä o dowongi o gahi ma datekoka.

¹³Maöraha o Gideon womahi ädono dokengika, ünanga wo ihene woma tengo magogiria wohi ade-ade ai nanere ai dodiawoika. O nyawa gënanga wotemo hoko nënanga, ”Ngohi tonanere naga moi o roti ilulu iwo hama nanga tauika daha yaohana moi o tau. O tau gënanga iruba hi ädono idadi kai l̄ohika de o tonaka.”

¹⁴Ai dodiawo wohaluhu, ”Uwee, gënanga maraioka O Gideon ai oworo o Yoas aingohaka, o Israeloka manyawa gënanga! Ma mangarati ma Jou Madutu wihidöaka o utumu unangika mangale o Midian manyawa de mata-mata tongone nanga nyawa yopoparagi!”

¹⁵Maöraha o Gideon woihene mangale ai nanere o nyawa gënanga de mamangarati, unangö womaruku wihuba ma Jou Madutu. Ipaha ünanga woma idulu o Israel manga tau-tauika de watemo, ”Nima hidiai! Ma Jou winihi döaka o utumu nginika mangale o Midian manyawa yopoparangi!”

¹⁶Daha o Gideon ainyawa yaratuhu hange waregu idadi o regu hange. O nyawa imatengo wahi döaka moi o torompet de moi o buyu madol̄a o oboro.

¹⁷O Gideon wätemo onangika, ”Nako ngohi tomahi ädono o Midian manyawa manga tau-tau mari batingiko, nihihi gihene ngohi nihidodiai, de niadiai okia ngohi tadiai.

¹⁸Mä maöraha ngohi de ahi nyawa mia wuwu o torompet, nginiö kiani nia wuwu nia torompet. Daha ngini kiani nima pöaka o tau nihi gogogilolitino gënanga, ’Mangale ma Jou de mangale o Gideon!ʼ ”

¹⁹O hutu gorona yododagika, o Gideon de ainyawa imahi ädono manga huturu manga tau mabatingoka. Oraha gënanga o nyawa yögoa-goana o tau gënanga, daha ima teke tagalika yo goana. Daha o Gideon de ainyawa yawuwu o torompet de yapooteke hagala toönanga manga buyu.

²⁰O hidoku hinoto mahomoa yodiai hoko genangoli. Daha önanga mata-mata yagoraka hagala toönanga manga oboro de manga giama mahigili, de yawuwu o torompet naga toönanga manga giama manirakoka. Onanga ima poaka, ”O oworo mangale ma Jou de mangale o Gideon!”

²¹Onanga mata-mata kahirahi ima okoino moi-moi manga ngïoka manga tau magilolitino gënanga. Manga haturu manyawa yopoparangi gënanga mata-mata yoara ima hidodöko de yopoa-poaka.

²²Maöraha o Gideon de ainyawa kaya wuwuohi magogiria manga torompet, ma Jou wadiai manga haturu manga nyawa yopo parangi ima teke parangi moi de moika de o oworo. Onanga yoara ya meta o Zereraika hiädono magurutika o Bet-Sita de o Abel-Mehola ma kota o Tabat yadatekuku.

²³O Naftali ai hoana, o Asyer, de o Manasye ai hoana yaoa o wange mahiwaroko yaoa o Yordan ma Ngairi o wange madumuniha ya kokiahoko. Daha önanga yaginïki o Midian manga tentara.

²⁴O Efraim madaira de mal̄oku dema buturungokaö mata-mata, o Gideon wohi dingoto o abari o gogahoko nënanga, ”Nia ino niuti nia parangi o Midian manyawa. Nio goana o Yordan ma Ngairi de o ngairi maiti mata-mata hiädono magurutika o Bet-Abara. Uha nia mal̄aika o Midian manyawa yatobongo doke ngino.” Daha o Efraim ma nyawaö ima hidiai, daha önanga yo goana o Yordan ma Ngairi de o ngairi maiti mata-mata hiädono ma gurutika o Bet-Abara.

²⁵O Midian manyawa manga baluhu yahinoto, enagënanga o Oreb de Zeeb önanga yatagoko. O Oreb iwi toma o Oreb ma helewooka de o Zeeb iwi toma o Zeeb o angguru madedeo mangïoka. O Efraim manyawa gënanga gila-gila yanïki o Midian ma nyawa, daha yao o Oreb de o Zeeb manga häeke o Gideonika o Yordan mahonangaka o wange ma hiwaroko.