Read Tobelo O HAKIM-HAKIM 8 Bible Online

O HAKIM-HAKIM 8 - Tobelo bible

O HAKIM-HAKIM 8

¹O Efraim manyawa iwitemo o Gideonika, ”Yadodoa nomihi garoua ngomi maöraha nimä jobo mangale naparangi o Midian manyawa?” Hok gënanga önanga yotaiyana o Gideonika.

²Mä o Gideon wohaluhu, ”Okia ngohi tadodiai hokokiaua mamangarati nako hohitotero de okia ngini nia dodiaioka. Ngaroka ngini nia dodiaiö duga-duga mahuhutulu, mä ma huhutulu gënanga iholoi ikurutia maragane ngaro yadodiaioka mata-mata tongohi ahi nyawa manga duduono ingodumu.

³ Ngini nia make o kuaha ma Jou Madutuino hiädono yakunu nia toma o Oreb de o Zeeb, o Midian manga baluhu yahinoto gënanga! Hohi totero de gënanga, o kia tongohi ahi manarama maoa?” O Gideon wotemo ipaha hoko gënanga, önanga yongamo okaua.

⁴Oraha gënanga o Gideon de ainyawa yaratuhu hange imahi ädono o Yordan ma Ngairi mahonongaka. Onanga duru yäbole mä gila-gila kayaginikohi manga haturu.

⁵Ipaha önanga imahi ädono o Sukutoka. Genangoka o Gideon wätemo o kota ma nyawaika, ”Nihiriwo nia hidöaka ahi nyawaika o inomo mahuhutulu. Onaga duru yäbole mago giria ngomi mia ginïkohi o Zebah de o Salmuna, o Midian manga koano gënanga.”

⁶Mä manga tutuda-tutuda o Sukot gënanga yohaluhu, ”See, ngini nia tagokuahi o Zebah de o Salmuna, ngini nigahokoka o inomo! Mangale okia ani nyawa kiani mia hidöaka yolomo?”

⁷O Gideon wätemo, ”Kayaoa! Damä nako ma Jou wohihi döaka ngohino o utumu mangale o Zebah de o Salmuna, ngini aha tigohara de o iwi de o hihika o tonaka makokakahaino!”

⁸Ipaha o Gideon wohi gla-gila ai dodagi daha imahi ädono o Pnueloka. Dokengokaö ünanga wogahokoli o inomo mangale ainyawa. Mä o Pnuel manyawa manga bobaluhu kaitero de o Sukot manyawa manga bobaluhu.

⁹Mangale karana gënanga o Gideon wätemo onangika, ”Damä ngohi aha toma idulu de mahalamati. De öraha gënanga ngohi aha taruba nia kota macandi nënanga!”

¹⁰Oraha gënanga o Zebah de Salmuna de toönanga manga duduono mata-mata magogiria naga o Kakoroka. O tonaka makokakahaino manyawa mata-mata manga duduono, duga-duga naga done yangimoi de motoa manga ribuhu dika mahou; yaratuhu moi deya monaoko manga ribuhu manga tentara yohonengoka.

¹¹O Gideon waigoro o tonaka makokakaha mabatingi o Noban o wange ma hiwaroko de o Yogbeha daha yaparangi manga haturu ya hi todokanika.

¹²O Zebah deo Salmuna, O Midian manga koano yahinoto gënana yoara, mä o Gideon wänïki dewa tagoko önanga, hiädono toönanga manga nyawa yopoparangi idadi imahi örikokaua.

¹³Ipaha ai dodagi magoronaka wolio o parangioka de waino, o Gideon wa l̄e o ngekomo yatilakuru o Heres il̄e idö doa-doa.

¹⁴Genangoka ünanga witagoko o goduru womatengo o Sukotino, daha ünanga wileha o nyawa gënanga mangale manga romanga ihibö balu-baluhu o Sukotoka. Daha o nyawa gënanga watulihi manga roma-romanga gënanga mangale o Gideon — mata-mata naga o nyawa yamori tumidi de tumidi.

¹⁵Iböto gënanga o Gideon woiki ima kamake de o kota gënanga mabalu-baluhu daha wato, ”Maraioka ngini kanio hiningahi mamoi iböto nioluku mangale nihiriwo ngohi, karana ngohi tätagokuahi o Zebah de o Salmuna, koigoungua? Ngini nioluku nia hidöaka o inomo tongohi ahi nyawaika; ena hioko o öraha gënanga magogiriaka yabole. Nia make, nënanga o Zebah de o Salmuna.”

¹⁶Iböto gënanga o iwi de ma hihikaka o tonaka mako kakahaino gënanga, o Gideon woma l̄e, daha wagohara o Sukot ma kota mabalu-baluhu gënanga.

¹⁷O Pnuelokaö ünanga waruba manga candi de o nau-nauru o kotaka gënanga mata-mata wätoma.

¹⁸Iböto gënanga o Gideon waleha o Zebah de o Salmunaika, ”Sarakia marupa ngini nia toma o nyawa o Taboroka gënanga?” O Zebah de o Salmuna yohaluhu, ”Onanga mata-mata ngadeke ima tero de ngona, hokä o nyawa yomomulia manga gutiuku.”

¹⁹O Gideon wato, ”Genanga tongohi ahi roriadodoto — tongohi ami ngoha-ngohaka.” ”Hohi ade ngini nia tomaua önanga, igoungu ngohi tohonenge aha tini tomaua nginiö.”

²⁰Daha o Gideon witemo o Yeterika, aingohaka mariaka, ”Natoma önanga!” Mä o Yeter kawogö ohi. Ho ünanga wo hawana hiädono woma rahukua ai oworo mangale wätoma.

²¹O Zebah de o Salmuna yotemo o Gideonika, ”Ika, nako ngona nonauru, nomi toma ngomi de ani giama mahirete!” O Gideonö wätoma önanga daha wa l̄e manga poromu mata-mata naga toönanga manga onta matomaroka.

²²Ipaha o Israeloka manyawa yotemo o Gideonika, ”Ngona nomi hilapahioka ngomi o Midian manyawa manga kuahaino. Hababu gënanga kokiani ngona nodadi tongomi mia tutuda — ngona de ani difauku.”

²³O Gideon wohaluhu, ”Kowali. Ngohi aha todadiua nia tutuda; tongohi ahi ngohakö makowali. Ma Jou nia tutuda.”

²⁴Mä ipaha o Gideon wotemoli, ”Duga-duga moi tonohi ahi gogahoko; o ngati-ngati ngini nia ora-oraino nia haturuoka, kokiani nihi lapahi mata-mata ngohino.” (O Midian ma nyawa biaha yapake o ngati-ngatiö gurasi; hokä imatero o nyawa mahomoa yogogogere o tonaka makokakahaka).

²⁵”Kayaoa,” onanga yohaluhu, ”de tongomi mia hininga isosanangi aha mihidöaka ngonaika.” Daha önanga ihi hoheika moi o ngoere, ipaha moi-moi o nyawa yoboa de yakelenga genangoka o ngati-ngati yaora-oraino manga haturuoka.

²⁶Mata-mata o ngati-ngatiö ihi lapahi o Gideonika öraha gënanga madubuho ngadeke o kilo monaoko, iwohamuahi hagala o promu, o gule, o pakeanga maungu-ungu yapö pake-pake o Midian manga koano, de o gule naga toönanga manga onta-onta ma tomaruku.

²⁷De o gurasi ino gënanga, o Gideon wadiai moi o gomanga madulada, daha wohigogere ai kapongoka, enagënanga o Ofra mabereraka. O Israeloka manyawa mata-mata yoiki dokengika mangale yahuba o gomanga madulada gënanga, hiädono önanga iwi hininga okaua ma Jou Madutu. De o hali gënanga hokä o modoi mangale o Gideon de ai roriadodoto.

²⁸O Midian manyawa kaima keluö mayakunokaua; önanga yahihangoka o Israel manyawa. O taongo moruata madekana o berera gënanga irïdi maöraha o Gideon kawowangohi.

²⁹O parangi gënanga ipaha, o Gideon woma idulu ai kapongo madutuika de wogogere dokengoka.

³⁰Tounanga aingohaka o nauru yamori tumidi, hababu ngoi hekata yowöe.

³¹Nagaö o Sikhemoka ngoi hekata paliara; ngoi hekata o paliaraino nënanga ünanga wo ma make o ngohaka o nauru womatengo wihi romanga o Abimelekh.

³²Ipaha ai umuru duru kohagurutu, daha o Gideon o Yoas aingohaka gënanga wohonenge. Unanga iwi lungunu ai ama, o Yoas ai jereoka. O jere gënanga mangï o Ofra makotaka, enagënanga o Abiezer manyawa manga kota.

³³O Gideon wohonenge ipahaika, o Israeloka manyawa yosetia okauaoli ma Jou Madutuika. Onanga yahuba o gomanga o Baal de o Baal-Berit ihidadi toönanga manga gomanga.

³⁴Onanga iwi pujiokauaoli ma Jou Madutuika, toönanga manga Jou, wahilapahioka önanga manga haturu mata-mata manga kuahaino yahi gogilolitino önanga.

³⁵Onangö yabalahua o Gideon ai roriadodoto mangale hagala ai oa-oa o Gideon mangale o Israel manyawa.