Read Tobelo O HAKIM-HAKIM 9 Bible Online

O HAKIM-HAKIM 9 - Tobelo bible

O HAKIM-HAKIM 9

¹O wange moiuku o Abimelekh o Gideon aingohaka woiki o Sikhem ma kotaika ngoi ayo ami roriadodotika. Dokengoka ünanga ima koketemo dede önanga, wato,

²”Beika nia leha o Sikhem ma nyawaika mata-mata kiaka iholoi yaoa: Inipareta o Gideon aingohaka yamori tumidi, ekola o nyawa womatengo dika? Nia hito ihene onangö ngohi nagahi oawunu moi dede önanga.”

³O Abimelekh ngoi ayo ami roriadodoto gënanga yoiki o Sikhem ma nyawaika de ihi ädono o Abimelekh ai behehongo onangika. Daha o Sikhem manyawa gënanga yaputuhu mangale iwi nïki o Abimelekh, hababu imoteke önanga igoungu ünanga nagahi o awunu moi dede önanga.

⁴Ipaha önanga iwihi döaka o tiwi o haaka mori tumidi ya l̄ë o gomanga Baal-Berit mahuba ma tauino. De o tiwi gënanga o Abimelekh wahi hewa o nyawa o doomu moi manga manarama itotorou mangale ima teke rimoi de ünanga,

⁵daha woiki ai ama ai kapongo madutuika o Ofra mabereraka. Dokengoka ünanga wätoma ai riadodoto yamori tumidi o helewo moi ma amo-amoko mal̄okuoka. Mä o Yotam, o Gideon aingohaka madodoto iwi tomaua karana ünanga woma ngiunoka.

⁶Daha ima toomu o Sikhem manyawa mata-mata de o Bet-Milo, daha yoiki o terpentin mautu itebi-tebinika o Sikhem mabereraka. Dokengoka önanga iwi tede o Abimelekh wodadi o koano.

⁷O Yotam woihene iböto o hali gënanga ünanga woiki woma oko o Gerizim mal̄oku matubuoka, daha woma pöaka mameta hagala o nyawaika gënanga, ”Ni hi hi gihene ngohi, hei hagala o Sikhem manyawa, hupaya ma Jou Madutuö wini gihene ngini!

⁸O öraha moiuku o gota-gota mautu ima toomu mangale önanga yomau ima ngiriki o koano. ”Onanga yo temo o zaitun mautuika, ’Nodadi tongomi mia koano.’

⁹O zaitun mautu ihaluhu, ’See, ngohi toluku. Hababu nako ngohi todadi nia koano, ngohi kiani toma togumu tohi hasili o zaitun maminya yapö pake-pake mangale ihi horomati o goma-gomanga de o nyawa.’

¹⁰Daha o gota mautu-mautu itemo o ara mautuika, ’Ngona dika nodadi tongomi mia koano.’

¹¹Mä o ara mautu ihaluhu, ’Ngohi toluku, hababu mangale to dadi nia koano ngohi kiani tomatogumu tohihasili o ara ma hohoko mamuti-mutiti.’

¹²Iböto gënanga, o gota mautu-mautu itemo o angguru ma utuika, ’Aa, ngona nodadi tongomi mia koano.’

¹³Mä o angguru maröehe ihaluhu, ’Kiaka yakunu ngohi kiani tomatogumu tohihasili o angguru yasosanangi o gomanga de o nyawa manga hininga, duga-duga mangale todadi nia koano!’

¹⁴Karana gënanga o gota mautu-mautu mata-mata itemo o iwi de mahihikaika, ’Ngona dika nodadi tongomi mia koano.’

¹⁵O iwi dema hihika gënanga ihaluhu, ’Nako ngini nia gou-goungu nimau nihihidadi ngohi nia koano, niaino nimahi dutuluku to ngohi ahi hohongo matimioka. Nako ngini nioluku, tongohi ahi jaga-jagaino ihö hohihika nënanga aha ihupu o uku yatuhuku yamata o ara ma utu-utu o Libanonoka.’ ”

¹⁶”Aa,” o Yotam wotemo wohi gila-gila, ”Boteka de o Abimelekh iwi tede wodadi o koano, ngini nidiaioka de nia hininga itebini de irikoto? Ngini nia diaioka ipatu-patutu o Gideonika, ahi ama, de ai roriadiodoto? Ngini nia balaha iböto ahi ama ai oa-oa,

¹⁷woparangioka mangale ngini? Niohininga, ünanga wohi taioka ainyawa mangale winihilapahi ngini o Midian manyawa manga kuahaino.

¹⁸Maöraha nënanga ngini nisetia okaua ahi ama ai tau ma nyawaika. Ai ngoha-ngohaka ngini nia toma nia mata-mataka — o nyawa yamori tumidi kamamoi o helewo moi ma l̄okuoka. O Abimelekh ganga ahi ama aingohaka ngoi gilaongino. Mä ngini niwi tedeoka ünanga wodadi o Sikhem manga koano, karana duga-duga ünanga naga ahi o awunu moi dede ngini.

¹⁹Nako nia manarama o wange nënanga ahi amaika de ai tau ma nyawa gënanga nia hininga itebini de irikoto, ika nimahi so sanangi de o Abimelekh, deʼ mal̄aika ünanga womahi sosanangi dede ngini.

²⁰Mä nako hoko genangua mahali, tanu o Abimelekhino ihupu o uku yatuhuku yamata o Sikhem manyawa ima nïki o Bet-Milo. De tanu o Sikhemino manyawa imanïki o Bet-Miloö ihupu o uku o Abimelekh iwi tuhuku mata.”

²¹Iböto gënanga o Yotam wohi oara ai diri daha wogogere o Beeroka, karanaünanga wimodongo o Abimelekhika, ai riadodoto gënanga.

²²O taongo hange madekana o Abimelekh wapareta o Israeloka.

²³Daha ma Jou wohi puda o haturu o Abimelekh deʼ o Sikhem ma nyawa manga hidogoronaka hiädono önanga iwi lawana unanga.

²⁴O hali gënanga idadi hupaya yamake mabalahi o Abimelekh de o Sikhem manyawa manga dorou iwidofo-dofo ünanga mangale wätoma o Gideon ai ngoha-ngohaka yamori tumidi.

²⁵O Sikhem manyawa gënanga yahigogere yotä tatoko ol̄oku matubu-tubuoka mangale iwi tagoko o Abimelekh. O nyawa moi-moi yatilakuru genangino yotö tatatoko gënanga yaora. O hali gënanga ihi ngahu o Abimelekhika.

²⁶O öraha gënanga o Gaal o Ebed aingohaka woboaka imaki nïki de ai roriadodoto mangale yogogere o Sikhem makotaka; de o Sikhem manyawa iwi ngaku unangika.

²⁷Onanga yoiki yopagele o angguru, o angguru madumuleoka daha yadiai o angguru yaoke-okere de yodiai o rameanga. ”Onanga yol̄omo de yokere toönanga manga gomanga yahuba-huba mangïoka de wihilolai o Abimelekh.

²⁸”Ngone nënanga o nagona hiädono ngone kiani hoihene o Abimelekhika?” o Gal wato. ”De madiai o nagona ünanga gënanga? Koigoungua ünanga o Gideon aingohaka de ai wakili gënanga o Zebul wodadioka o Hemor ai gilaongo, o Sikhem ai ama, tongone nanga tohora!”

²⁹”Hohiade ngohi tatuda o Sikhem manyawa nënanga, maraioka imataka o Abimelekh jarita gënanga! Ngohi aha totemo unangika, ’Ika, no tagi ani himangika! Nahidiai ani tentara de naino nohupu hoparangi!ʼ ”

³⁰O Zebul, o Sikhem ma kota wakokuaha idadi wongamo maöraha woihene o Gaal ai demo gënanga.

³¹Unanga wahi dingoto ai huhuloko o Abimelekhika o Arumaika mangale wohi ädono o behehongo nënanga, ”O Gaal o Ebed aingohaka imakinïki de ai roriadodoto yobö boa-boaka o Sikhemika de yadofo-dofo ma kota manyawa hupaya ini lawana ngona.

³²Karana gënanga, kokiani ngona de ani nyawa nioiki nima ngiunu o dumuleoka maöraha o hutu-hutu.

³³Iyarehe o ngorumino maöraha o wange ipotoka, nia parangi o kota gënanga de nia hitodokana. De nako o Gaal de ainyawa yohupu ini lawana ngona, gënanga ani öraha mangale niparangi ünanga!”

³⁴O Abimelekh de mata-mata ainyawa ima hidiai maöraha o hutu-hutu. ”Onanga ima hikabarihi idadi o du duono iata daha yoiki ima ngiunu o Sikhem ma kota magilolitino.

³⁵O Abimelekh de ainyawa iwi make o Gaal wohupu de woma oko o kota mangorana ma amo-amokoka, de manga hiapotoka önanga mata-mata yohupu mangï imangö ngiu-ngiunino.

³⁶O Gaal wämake önanga, daha witemo o Zebulika, ”Na lega! Naga o nyawa gengino o l̄oku matubu-tubuoka de yauku youti!” ”See, gënanga o nyawaua,” o Zebul wohaluhu, ”gënanga duga-duga ol̄oku magurumini.”

³⁷Daha o Gaal wotemoli, ”Itiai! Naga o nyawa youti o l̄oku magelehorino, de o doomu moiohi o terpentin madebi-debini mautuoka de yaino magogiria manga meta gengino!”

³⁸O Zebul witemo o Gaalika, ”Beika, öraha nënanga ani uru ma amo-amoko gënanga kiaka? Mahira ani demo mangale okia ngone kiani hihigihene o Abimelekhika gënanga? Neunanga ma nyawa nihi kokauku gënanga. Ika notagika mahimangika öraha nënanga naparangi önanga!”

³⁹Daha o Gaal wa ao wahihupu o Sikhem manyawa de iwi lawana o Abimelekh.

⁴⁰Mä o Abimelekh wiparangi ünanga hi ädono ünanga wohi oara ai diri. O honenge kai ruba-rubauku hiädono o kota ma ngorana ma amo-amoko mahimangoka.

⁴¹Mabaha o Abimelekh woma idulu o Arumaika, de wotatapu dokengoka. O Zebul wäduhu o Gaal de ai roriadodoto yahupu o Sikhemino, hiädono önanga yakunokaua yogogeroli dokengoka.

⁴²Iyarehino o Sikhem manyawa yomulaenge yamal̄a o kota, yomau o dumuleika de o hali gënanga ihi ngahu o Abimelekhika.

⁴³Daha o Abimelekh watoomu ainyawa, de önanga waregu idadi o duduono hange, daha önanga yoiki ima ngiunu o dumule-dumuleika. Maöraha ünanga wamake o kota manyawa gënanga manga meta o dumuleika, ünanga wohupu woma ngiu-ngiunino daha wätoma önanga.

⁴⁴Maöraha o Abimelekh de ai duduono ima tai-taiti manga himangika yoparangi o kota mangorana ma amo-amoko, o duduono hinoto mahomoa yanïki de yätoma o nyawa yoö oa-oara o dodumule ika.

⁴⁵O Abimelekh gila-gila woparangi o wange moi iahumu de wö gogere o kota gënanga; ma kota manyawa yätoma, daha ma kota yawedere ipaha o gahi ihi barihi.

⁴⁶Maöraha o nyawa naga o Sikhem mabebeno o mehele magoronaka yoihene mangale o hali gënanga, önanga yowohama o baiti magoronaika o El-Berit mapuji matau matimiuku mangale ima hitatoko.

⁴⁷Daha o nyawa iwihi ngahu o Abimelekhika o Sikhem ma bebeno o meheloka gënanga o nyawa imatoomu inoka dokengoka.

⁴⁸Karana gënanga, o Abimelekh de ainyawa yoiki o Zalmon mal̄okuika. Dokengoka ünanga watobi-tobiki o gota majaga de o bahuku, daha wamoku o jaga-jaga gënanga ai belekaka, ipaha wa huloko ai nyawaö ima tai-taiti yadiai hoka ünanga wadiaioka.

⁴⁹Daha önanga moi-moi yatobiki o gota majaga-jaga, daha i madagi iwi nïki o Abimelekh. O gota majaga mata-mata gënanga önanga yatopiorono manga puji matau mabaiti mauruoka gënanga, daha yatuhuku maöraha o Sikhem manyawa gënanga ka nagahi magoronaka. Karana gënanga o Sikhem manyawa gënanga yohonenge mata-mata, done yaribuhu moi o nyawa o nauru de o ngoheka.

⁵⁰Ipaha gënanga o Abimelekh woiki o Tebesika. Unanga wogoana wakiloliti o kota gënanga daha wogogere.

⁵¹O kota mago goronaka gënanga naga moi o candi ikö kua-kuata. O kota manyawa mata-mata gënanga yoara dokengika. ”Onanga yowohama o candi gënanga magoronaika de yakusi ma ngorana, daha yodoa daku il̄e.

⁵²Ipaha o Abimelekh waino genangino mangale waparangi o candi gënanga. Maöraha unanga wohiadono o candi ma ngoranino genanga de womau watuhuku, de womau watuhuku,

⁵³ o ngoheka momatengo miditifa o gulinga mahelewo moi ai häeke ma l̄okuku, hiädono itororata ai häeke gënanga.

⁵⁴O Abimelekh wiahoko witataiti o goduru wamö moku-moku ai daë de wotemo, ”Narahuku ani oworo de nohi toma ngohi; ngohi toluku o nyawa yotemo ihi toma o ngoheka.” O goduru gënanga witopoko ünanga hiädono wohonenge.

⁵⁵Maöraha o Israeloka manyawa yamake o Abimelekh wo honengoka, önanga mata-mata yolio.

⁵⁶Hoko gënanga madodagi ma Jou Madutu wabalahi mangale o Abimelekh ai dorou wadodiaioka ai amaika, maöraha ünanga wa toma yamori tumidi ai roriadodoto.

⁵⁷De ma Jou wahukumö o Sikhem manyawa karana toönanga manga dorou. O hali gënanga yakokorona hoka o Yotam o Gideon aingohaka mangale önanga maöraha ünanga wahilolai önanga.