Read Tobelo O YUDAS 1 Bible Online

O YUDAS 1 - Tobelo bible

O YUDAS 1

¹ O Roriadodoto ma Jou Madutu o Ama winï ahokoka deʼ duru winï dora-dora de inoli inï göana mangale o Yesus Kristus. Hokä o Yesus Kristus ai gilaongo, ngohi — o Yudas — o Yakobus ai dodoto,

²tonganono: Tanu ma Jou Madutu winihidöaka o barakati, de Ai hayanga de Ai dora deʼ o lolä de maboloioka nginika.

³O Roriadodoto tinïho hininga! Ngohi igou-goungu ahi dungutu totulihi o hurata nginika, imakorona o halamati ngone homakomoteke hamäo-mäoka. Mä oraha nënanga ngohi tamäo o hititila mangale tinïnasihati ngini de o hurata nënanga hupaya hoko genangika ngini nimanarama nia gou-goungu mangale o ngongaku ma Jou Madutu wohidöaka ma moi iböto Ai umatika mangale kahiado-adonika.

⁴Hababu ngone koha mäo-mäoua, naga o nyawa-o nyawa yätumu-tumutoka kaima ngiu-ngiunu yowohama tongone nanga hi dogoronaika. Onanga o nyawa madorou yatötaka idulu o abari mangale tongone nanga Jou Madutu Ai hayanga de Ai dora, la imämäke öraha ihi aiki to önanga manga nahihu. Deʼ onanga iwitila o Yesus Kristus, woma tëngo-tëngo woko Kuaha deʼ tongone nanga Jou. Kahuruoninohi mangale to önanga manga hukumanga ihi ngahuoka Ma Jou Ai Demo ma Buku magoronaka.

⁵ Mata-mata gënanga ngini nihiorikoka. Mä ngohi töigo tinihidöakoli ngini o hohininga, mangale sarakia ma Jou wahihalamati o Israeloka ma umati o Mesir mabereraka, mä ipahaino wahibinaha o nyawa yongaku-ngakua to önanga manga hidogoronaka.

⁶Nio hiningali o malaekat-malaekat yatotilakuru mabatingi-batingi to önanga manga kuaha, hiädono yoiki yamal̄a to önanga manga ngï yögögogere. Ma Jou Madutu walara o malaekat-malaekat gënanga de o rante ikokakali, o ngï mahohuhutu magoronaka o dunia matimioka. Dokengoka önanga yätumunguku hoko genangika hiädono yägelenga o hukumanga onanguku damä ma Wange ma amo-amokoka gënanga.

⁷ Nio hiningaö o Sodom deʼ o Gomora maberera de inoli o berera-o berera madate-datekino, maberera manyawa yadiaioka o hali-o hali hokä yadiaioka o malaekat-malaekat gënanga. Onanga yadiai o hali-o hali ihowo-howono deʼ itotorou, hiädono önanga yähangihara de o hukumanga o uku ikokakali, la idadi o hohininga o nyawa mata-mataika.

⁸Hoko genangö o nyawa-o nyawa gënanga yohohayali hiädono önanga yodiai o baradoha to önanga manga röehika mahirete. Onanga yapulono itipokouku ma Jou Madutu ai kuaha deʼ ihikauku o dodadi-o dodadi imomulia o horogaka.

⁹ O Mikhael mahirete, wahibö balu-baluhu o malaekat, komaiwahi wodiai hokä hoko gënanga. Oraha gënanga ünanga imateke ributu de o Ibilihi imakalawani magoronaka mangale o nagona aha yamäke o Musa ai mayeti, o Mikhael wobaraniua o Ibilihi wohihakimi de o hikauku mademo-demo. Duga-duga o Mikhael wato, ”Ma Jou aha wonï banarata ngona!”

¹⁰Mä de o hikauku-o hikauku, o nyawa gënanga yalawani hagala moi-moi önanga ima mömangaratiua. Onanga imatero hokä o aiwani-aiwani koiwa-iwa ma akali, ihiöriki ohali-ohali de mahininga manahihu. Mä de hababu ohali-ohali genangalä idadi hababu önanga yowedere.

¹¹ Onanga yobodito! Onanga yanïkoka o ngëkomo o Kain wabö böa-böaka. Hupaya yamäke o tiwi, önanga ima otakoka manga diri o howono mawaimagoronauku, imadäene hokä o Bileam. Deʼ onangö yäwedere karana ima lawani hokä o Korah.

¹²Maöraha ngini nidiai o ngol̄omo marameanga, o nyawa geönanga manga jako haemono nia hidogoronaka. Hababu önanga yol̄omo de manga kal̄il̄u ima mal̄e-mal̄ekua, deʼ duga-duga ihi akunu manga diri mahirete. Onanga hokä o lobi yawuwu o hidal̄oko, mä iutiua o awana. Onangö hokä o gota ihi döakua mahohoko ngarokö ihö hohoko maöraha i hohoko; o gota-o gota mautu yarahukoka mangutuku deʼ kama moiuku i honengoka.

¹³Ima tero hokä o moku-moku ifaë-faë o ngötoka yapuda ma abo, hoko genangoli önanga ya abo, manga manarama-manarama yahimö mal̄e-mal̄eke. Onanga ganga hokä o murumu-o murumu iyoiki okiaika hönanga de ma Jou Madutu wasadiaka mangï duruë mahohuhutu magoronaka mangale kahi ado-adonika.

¹⁴ O Henokh, o Adam ai difauku matumiduku, mahira wohidodemoka mangale hagala o nyawa gënanga. O Henokh wato, ”Niolega, ma Jou aha woböa de Ai malaekat yotebi-tebini manga ribu-ribuhu,

¹⁵la wahihakimi o nyawa mata-mata. Ma Jou aha wähukumu hagala o nyawa madorou karana to önanga manga manarama-manarama itotorou. Deʼ Unanga aha wähukumu o baradoha manyawa deʼ manga lolawani karana ohikauku mademo mata-mata ihi dödemo-demoka.”

¹⁶Hagala o nyawa gënanga kahoko genangika dika yokurubungu de yahihowono o nyawa mahomoa. Onanga yowango yamoteke to önanga manga nahihu-nahihu ibö baradoha. Onanga imahi ngarokö mangale manga diri mahirete, deʼ yahigogiriri o nyawa hupaya imä mäke o utumu.

¹⁷Mä ahi Roriadodoto tinï hohininga, nio hininga tongone nanga Jou Yesus Kristus ai rasul-rasul naga okia yotemoka.

¹⁸ I holoi ihira önanga ihi ngahuoka nginika yododagika öraha mabaha aha yoböa hagala o nyawa aha ini hohedu ngini, enagënanga o nyawa yowango imamoteke to önanga manga nahihu-nahihu iböbaradoha.

¹⁹O nyawa neonangala yapö puda-puda o gitingaka. Onanga yäkuahaua ma Jou Madutu ai Womaha, mä o dunia mabiaha manahihu-manahihu.

²⁰Mä ngini, ahi Roriadodoto, nia paliara nihi gila-gila nia wowango nihihol̄e nia ngongaku o Yesus Kristusika. Nia ngongaku gënanga duru itebini. Ma orahoka gënanga nimä niata de ma Jou Madutu ai Womaha makuaha,

²¹deʼ niwango hoko genangika ma Jou Madutu ai dora mahohongo magoronaka hokokia madëkana ngini nio damä tongone nanga Jou Yesus Kristus Ai hayanga de Ai dora aha winihi döaka nginika o ngango madutu deʼ i kakali.

²²Hagala o nyawa manga hininga imahi orikokaua, onangika kokiani ngini nihi dumutu nia hayangi.

²³Nia tauru o nyawa yohupu o uku magoronaino, mangale nia hihalamati önanga. Hagala o nyawa mahomoaika kokiani ngini nihi dumutu nia hayangi, ima nïki nia mamäo de mamodongo, mä nio dohata nia goungu de to onangö manga pakeanga yapö pese-pesekoka de to önanga manga nahihu i böbaradoha.

²⁴Ma Jou Madutu, wakunu winï göana hupaya ngini inï otakua, de wakunu winïao Ai himanga imomuliaika de nia mörene deʼ koiwa nia kuranga,

²⁵Unangala ma Jou Madutu woma tëngo-tëngoka, ngone Wonahihalamati mangale o Yesus Kristus tongone nanga Jou. Unangala ma Jou Madutu womomulia, wokö kurutil̄e, wokö kokuaha deʼ wokokumati ka o öraha kahuruoninohi hiädono öraha nënanga de mangale kahi ado-adonika! Amin.