Read Tobelo O HIMATOKO 1 Bible Online

O HIMATOKO 1 - Tobelo bible

O HIMATOKO 1

¹O buku nënanga madol̄a yakorona okia wohimatoko o Yesus Kristus mangale idodadadi aha idadi. Ma Jou Madutu wohi ngahuoka o Kristusika la unanga wohidumutu ma Jou Madutu aigogilaongika okia kiani de madataitoka idadi. O Kristus wahuloko Ai malaekat Ai gilaongika o Yohanis, mangale wohingahu idodadadi gënanga unangika.

²O Yohanisö wohiade-ade mata-mata wamomäke-mäkeoka gënanga; deʼ nenangala aihingahu imakorona ma Jou Madutuino aibehehongo ihikuata de o Yesus Kristus aihakihi.

³Youtumu o nyawa yabasa deʼ o nyawa yoihe-ihene o abari nubuat o buku nënanga imanïki ihingounu okia ituli-tulihi magoronaka. Hababu koi tedekanokauaoli mata-mata nënanga aha idadi.

⁴ Roriadodoto naga o jemaat tumidi o Asia madaeraoka! Ngohi, o Yohanis töngänono ma Jou Madutuino winihidöaka o barakati deʼ o lolä — enagënanga Unanga naga, de nagaka, deʼ hokogenangika naga — deʼ hoko genangö o womaha tumidino ma Jou Madutu aikuruhi imomulia mahimangoka,

⁵ deʼ o Yesus Kristusino, o hakihi wososetia. Unangala madodihiraka iwihiwangokali o honengino deʼ Unangala wäkuaha o kokoano o duniaka. O Yesus wonadora ngone, deʼ de Ai honenge Unanga wonahi lapahioka tongone nanga baradoha,

⁶ deʼ wonahidadi ngone o imam-imam manga hoana de o berera moi womadinga-dingakoka, iwï leleani ma Jou Madutu, Ai Ama. O Yesus Kristus gënanga womulia deʼ wokuaha kahiado-adonika. Amin!

⁷ Niwilega, Unanga woböa iwihawoino o lobi! O nyawa mata-mata aha iwimäke Unanga, yodogoika onangohi iwitötudu-tuduku. Hagala o hoana o duniaka aha yododora karana Unanga. Ia, igoungu! Amin!

⁸ Ma Jou Madutu wato, ”Ngohi madodihiraka deʼ mabobahaka,” nä naga, nagaka, deʼ naga kahoko genangika Duru woko Kuaha.

⁹Ngohi o Yohanis, niariadodoto o mamäo moi hororimoi dede ngini o hangihara magoronaka de haohana moi-moi hininïki o Kristus. Ngone hotongohono hatagongo o hangihara hokä o umati to Unanga madutu. Ngohi ihiumo o Patmos manühika karana ngohi tohigerewoto o behehongo ma Jou Madutuino, wohikuata o Yesus de to Unanga aihakihi.

¹⁰Ma Jou aiwangeoka, ngohi ihikuaha ma Jou Madutu ai Womaha, daha ngohi toihene o ilingi kohakuatil̄e — hokä o trompet mailingi — itemo tongohi ahi poretoko.

¹¹O ilingi gënanga itemo, ”Natulihi okia namäke-mäkeoka, deʼ nohidingoto o buku gënanga o jemaat tumidika nënanga: O Efesus, o Smirna, o Pergamus, o Tiatira, o Sardis, o Filadelfia, deʼ o Laodikia.”

¹²Ngohi tomalega ahiporetoko mangale tätailako o nagona gënanga ihitemo ngohino. Daha ngohi tamäke o hilo matotodenge o gahumu tumidi o gurasi.

¹³ O hilo matotodenge mahidogoronaka gënanga womaokoino womatëngo hipulo-pulono hokä o nyawa. Unanga womahinoauku aijuba magogurutuku hiädono Ai l̄ouku. Ai aluoka Unanga wohitamunoko o alu madadamunu o gurasi.

¹⁴ Ai tadauru mamagarehe hokä o duba magogo, mamagarehe hokä o kapas. Ai lako mamajanga hokä o uku;

¹⁵ Ai l̄ou icahaya-cahaya hokä o tabaga haharongoka. Ai ilingi hokä giwe ma amo-amoko ma akere maruruhu.

¹⁶Ai giama manirakoka wasöika o murumu o gahumu tumidi, deʼ Ai uruiha ihupu o oworo moi kahadöto madöto hinotoka. Ai biono mameletongo hokä o wange, o wange ikorona itotiaiuku.

¹⁷ Maöraha ngohi timäke, ngohi tomahi tudukuku Ai himangoka hokä o nyawa yohonengoka. Mä Unanga wakelenga Ai giama maniraka ngohiuku daha wotemo, ”Uha nohawana! Ngohi madodihiraka deʼ mabobahaka.

¹⁸Ngohi ne Unanga wowö wango-wango! Ngohi tohonengoka, mä nolega, ngohi towango mangale kahiado-adonika. Ngohi takuaha o honenge, deʼ o nyawa yohone-honenge manga dunia.

¹⁹Hababu gënanga, natulihi o hali-o hali namömäke-mäke enagënanga o hali-o hali öraha nënanga naga, deʼ o hali-o hali damä aha idadi.

²⁰Nënanga o murumu tumidi marahasia namäke-mäke Ahi giama manirakoka deʼ o hilo o gurasi matotodenge tumidi gënanga: O murumu tumidi gënanga enagënanga o malaekat-malaekat o jemaat tumidi, deʼ o hilo matotodenge tumidi gënanga ganga o jemaat tumidi gënanga.”