Read Tobelo O HIMATOKO 10 Bible Online

O HIMATOKO 10 - Tobelo bible

O HIMATOKO 10

¹Daha ngohi timäke o malaekat mahomoa wonau-nauru womatëngo wouti o horogauku. Unanga iwihawoino o lobi, deʼ moi o ngawatoro ihigöuku aihäekuku. Ai biono mameletongo hokä o wange, deʼ ail̄ou hokä o uku o liate.

²Ai giamoka naga moi o buku malulu mai teteke ihohelengaika. Ai l̄ou maniraka womahidoko o ngötuku, deʼ ail̄ou mahigili womahidoko o dudunguku.

³Daha ünanga wopöaka de aiilingi makuata hokä o singa ipöaka. O malaekat gënanga wopöaka iböto, o dotoreke tumidi ihaluhu de mailingi ipopotoka.

⁴O dotoreke tumidi gënanga mailingi hoko gënanga, ngohi tomau tatulihi, mä ngohi toihene o ilingi o horogauku yato, ”Narahasia okia o dotoreke tumidi i temoka gënanga; uha natulihi!”

⁵ Daha o malaekat ngohi tamö make-make imahidoko o ngötuku deʼ o dudunguku gënanga yagoraka magiama maniraka o dihangil̄e.

⁶Unanga wokoboto de ma Jou Madutu airomanga wowango-wango kahiado-adonika wohidadioka o dihanga, o dunia deʼ o ngöto de hagala okia honanga naga magoronaka. O malaekat gënanga itemo, ”Maöraha aha itudaokauaoli!

⁷Mä maöraha okia o malaekat matumidoka aitrompet wawuwu, ma Jou Madutu aha wamanarama aidatoro irorahasia, hokä ünanga wohi ngahuoka aigogilaongika, enagënanga o nabi-nabi.”

⁸ Ipahaika o ilingi ngohi toö ihe-ihene o horogauku gënanga, itemoli ngohino. Enanga yato, ”Noiki nal̄ë o buku malulu ihohelengaika o malaekat magiamoka imahidodoko-doko o ngötuku deʼ o dudunguku gënanga.”

⁹Ngohiö toiki o malaekatika gënanga deʼ tögahoko laʼ unanga wohihidöaka ngohino iluluino maiteteke gënanga. Unanga wato, ”Nal̄ë deʼ naol̄omo nënanga. Ani mämata magoronaka ënanga aha idadi imali, mä aniuru magoronaka ënanga mamutiti hokä o ohungu magula.”

¹⁰Ngohi tal̄ë aigiamoka malulu maiteteke gënanga daha taol̄omo. Ahi uruoka tamäo hokä o ohungu magula, mä ngohi tal̄ahiri iböto, ahimämata magoronaka idadi mamali.

¹¹Ipaha ihi pareta ngohi, ”Nohigerewoto mamoioli ma Jou Madutu aiabari mangale o hoana-o hoana de o berera, o negara-o negara, o bahasa-o bahasa, de okokoano-okokoano.”