Read Tobelo O HIMATOKO 11 Bible Online

O HIMATOKO 11 - Tobelo bible

O HIMATOKO 11

¹ Ipaha gënanga ihihidöaka ngohi o gota o dobiki moi tanu hokä o diki-diki o duduga o ngahiri moi, daha ihipareta, ”Noiki natuga ma Jou Madutu ai Tau deʼ o huhuba mangï. Naetongo hokokia manga ngöe o nyawa magoronaka yopuji.

² Mä uha natuga ma Jou Madutu ai Tau malöa maporetoka gënanga, hababu o hidoku gënanga yahilapahioka o nyawa iwinäko-näkoua ma Jouika. Onanga aha yadoko-doko o kota itebi-tebini gënanga o mede moruata de hinotoino madekana.

³Ngohi aha tahuloko o nyawa yahinoto ahihakihi imahinoa o duka mapakeanga, deʼ onanga aha ihibobita ma Jou Madutu aiabari o wange o ribuhu moi o ratuhu hinoto de mori butangaino madekana.”

⁴ O hakihi yahinoto gënanga ganga o zaitun mautu maröehe hinoto deʼ o hilo matotodenge hinoto ikokelenga o alami magilolitino ma Jou aihimangoka.

⁵Nako o nyawa ihitaili yodiai okia naga moi yaoa-oaua onangika, to önanga manga uruiha ihupu o uku yahibinaha manga haturu-haturu. De madodagi hokogënanga, mata-mata o nyawa yomau yahangihara önanga, aha yätoma.

⁶ To önanga manga kuaha mangale yatamunu o dihanga laʼ uha iuti o awana hokokia madekana önanga ihibobita o abari ma Jou Madutuino. To onangö manga kuaha o akere mata-mataika, la yangali o akere idadi o awunu. Deʼ to önanga manga kuahali laʼ yagohara o dunia de hagala irupa o huha, maöraha okia dika önanga yomau yadiai.

⁷ To önanga manga abari ihingahu ipaha iböto, o aiwani ihupu o honenge mawaiil̄e aha yalawani önanga.

⁸ Deʼ to önanga manga mayeti aha ibitikangika o kota maago-agomo mangëkomo malago-agomoka, kiaka toönanga manga Jou iwisosalib. Ihitotero o kota gënanga maromanga enagënanga o Sodom ekola o Mesir.

⁹O nyawa mata-mata o negaraino, o hoana, o bahasa, o hoana de o berera aha yamäke toönanga manga mayeti o wange hange de mahonongaino madekanino, deʼ yahigumal̄aua o mayeti gënanga yalungunu.

¹⁰O dunia manyawa aha yomörene mangale o hakihi yahinoto gënanga manga honenge. Onanga aha ihilamoko deʼ ima hikidingoto o ngongike, karana o nabi yahinoto gënanga ihiböaka o hangihara mangöe o nyawa mata-mataika o duniaka.

¹¹ Ipaha o wange hange de mahononga, iböa o ngango mawomaha ma Jou Madutuino deʼ iwohamoli o nabi yahinoto manga goronaika gënanga. Onangö yomomiki imaokoil̄e, hiädono o nyawa mata-mata yämäke önanga idadi duru yohawana.

¹² Ipaha o nabi yahinoto gënanga yoihene o ilingi kohakuatil̄e yaahoko önanga o horogauku, ”Niaino nidoa nenangil̄e!” Daha to önanga manga haturu manga lako mahimangoka, onangö yodoa o horogail̄e, yahawoino o lobi.

¹³ Oraha gënanga o ohu kohagiria. O hidoku moi o regu ngimoi o kota gënanga iwedere, deʼ o nyawa yaribuhu tumidi yohonenge karana o ohu gënanga. O nyawa mahomoa idadi duru yohawana, daha önanga ihigiriri ma Jou Madutu aimulia o horogaka.

¹⁴O bodito mahinoto ipahaka. Mä niolega! Botinoli o bodito mahange aha yanïkino.

¹⁵ Daha o malaekat matumidoka aitrompet wawuwu, o horogaka toihene o ilingi-o ilingi duru kohakuatil̄e itemo, ”O kuaha mangale wapareta o dunia örahanënanga naga tongone nanga Jou aigiama mahoatoka deʼ o Koano Wohihohalamati wihijäjajioka. Unanga aha wopareta mangale kahiado-adonika!”

¹⁶O tutuda yamonaoko de yäruata yogögogeruku toönanga manga kuruhi imomuliaoka ma Jou Madutu aihimangoka, yatilabuku deʼ iwihuba ma Jou Madutu.

¹⁷Onanga yotemo, ”Jou, Jou Madutu noko Kuaha, nänaga, deʼ nagaka! Ngomi mitarima kasi Ngonaika hababu Ngona napäkeoka Ani kuaha i lamo-amoko, deʼ mulaengoka nopareta!

¹⁸ O nyawa ininäko-näkoua Jou, yokinïki yongamo hababu maöraha iböto Ngona anigangamo nakopoa, deʼ maöraha yadonokali Ngona nätailako o nyawa yohone-honenge. Nënanga maöraha mangale Nahidöaka manga hewa Ani go gilaongika, o nabi-nabi, deʼ mata-mata Ani umatika, enagënanga mata-mata o nyawa yopuji-puji Ngonaika, yolamoko ekola yoëteke. Nënanga maöraha mangale näwedere o nyawa yawede-wedere o dunia!”

¹⁹ Ihelenga ma Jou Madutu ai Tau o horogaka, deʼ magoronaka tamäke o Jaji ma Peti. Daha idadi o leletongo isawi iloliliara deʼ o dotoreke mailingi idilongo matühu deʼ ipopotoka, de o ohu deʼ o awana o es koharikimi.